କମୁଛି ପେଟ୍ରୋଲ-ଡିଜେଲ ଦର,ଘାଟାରେ ଓଡ଼ିଶା

ଭୁବନେଶ୍ୱର:ପେଟ୍ରୋଲ-ଡିଜେଲ ଦର ବୃଦ୍ଧି ଘଟିଲେ ଓଡ଼ିଶା ରାଜ୍ୟ ରାଜନୀତି ସରଗରମ ହୋଇଯାଏ।ତୈଳ ଦର ନେଇ ବିଜେଡି-କଂଗ୍ରେସ ଚକା ଜାମ୍ କରନ୍ତି। ଗତ ସେପ୍ଟମ୍ବର ୭ରେ ସାରା ରାଜ୍ୟରେ ୩ଦିନ ପାଇଁ ଆନ୍ଦଳୋନ କରିଥିଲା ବିଜୁ ଜନତା ଦଳ। ବିଜେଡିର ଦୈନିକ ୨ଘଣ୍ଟିଆ ଆନ୍ଦଳୋନର ଟାର୍ଗେଟରେ ଥିଲେ କେନ୍ଦ୍ର ପେଟ୍ରୋଲିୟମ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ।ଲୋକଙ୍କ ସ୍ୱାର୍ଥ ପାଇଁ ବିଜେଡିର ଆନ୍ଦୋଳନର ମଧ୍ୟ ଯଥାର୍ତତା ରହିଥିଲା। କାରଣ ସେପ୍ଟେମ୍ବର ୭ରେ ପେଟ୍ରୋଲ ଲିଟର ଦର ୭୮ଟଙ୍କା ୯୪ପଇସା ହୋଇଥିଲା।ସେହିଭଳି ଡିଜେଲ ଲିଟର ଦର ୭୭ଟଙ୍କା ୪୨ପଇସାରେ ପହଞ୍ଚିଥିଲା। ବିଜେଡିର ଆନ୍ଦଳୋନ ପରେ ପେଟ୍ରୋଲ-ଡିଜେଲ ଦର କମିବା ପରିବର୍ତ୍ତେ ୮୨ଟଙ୍କାଙ୍କୁ ଛୁଇଁଥିଲା। ସାରା ଦେଶରୁ ଚାପ ପଡ଼ିଲା, ବାଧ୍ୟହୋଇ ଗତ ଅକ୍ଟୋବର ୪ରେ କେନ୍ଦ୍ର ସରକାର ପେଟ୍ରୋଲ-ଡିଜେଲ ଲିଟର ପିଛା ଦେଢ଼ ଟଙ୍କା କମାଇଥିଲେ। ଆଉ ତୈଳ କମ୍ପାନୀଗୁଡିକଙ୍କୁ ୧ଟଙ୍କା କମାଇବାକୁ ନିର୍ଦ୍ଦେଶ ଦେଇଥିଲେ।ଏହାସହ ଅଢ଼େଇ ଟଙ୍କା ହ୍ରାସ କରିବାକୁ  ସମସ୍ତ ରାଜ୍ୟ ସରକାରଙ୍କୁ ପରାମର୍ଶ ଦେଇଥିଲେ କେନ୍ଦ୍ର ଅର୍ଥମନ୍ତ୍ରୀ ଅରୁଣ ଜେଟଲୀ।
ନିର୍ବାଚନୀ ତୋଫା ଲାଗି ଟଙ୍କା ଆସିବ କେଉଁଠୁ?
ତେବେ ବିଜେଡିର ସେପ୍ଟମ୍ବର ଆନ୍ଦଳୋନ ଠାରୁ ଏହା ଭିତରେ ପେଟ୍ରୋଲ ଦର ଲିଟର ପିଛା ୧୧ଟଙ୍କା ୪୦ପଇସା କମିଗଲାଣି। ଅର୍ଥାତ ଆଜି(ମଙ୍ଗଳବାର) ଭୁବନେଶ୍ୱରରେ ପେଟ୍ରୋଲ ଦର ଲିଟର ପିଛା ୬୭ଟଙ୍କା ୫୪ପଇସା ରହିଛି। ବିଶ୍ୱ ବଜାରରେ ଅଶୌଧିତ ତୈଳ ଦର ହ୍ରାସ ଯୋଗୁ ଡିଜେଲ ଦର ୧୦ଟଙ୍କା ୪୦ପଇସା ମଧ୍ୟ କମିଛି, ଏବେ ୬୭ଟଙ୍କା ୨ପଇସାରେ ପହଞ୍ଚିଲାଣି। ଯେଉଁଥିପାଇଁ ଲୋକମାନେ ଏବେ ଟିକେ ଆଶ୍ୱସ୍ଥି ଅନୁଭବ କରିଛନ୍ତି। କିନ୍ତୁ ବିଜେଡି ସରକାରଙ୍କ ଚିନ୍ତା ବଢ଼ି ଯାଇଛି। କାରଣ ସେପ୍ଟମ୍ବରର ଆନ୍ଦଳୋନ ଦିନ ଅପେକ୍ଷା ଏବେ ଓଡ଼ିଶା ସରକାର କମ୍ ରାଜସ୍ୱ ପାଉଛନ୍ତି। ଦର ହ୍ରାସ ଯୋଗୁ ୨୬% ଭାଟ୍(ମୂଲ୍ୟ ଯୁକ୍ତ କର) ହିସାବରେ ସେପ୍ଟମ୍ବର ମାସ ତୁଳନାରେ ପ୍ରତି ପେଟ୍ରୋଲ ଲିଟରରେ ୨ଟଙ୍କା ୩୫ପଇସା କମ୍ ଟ୍ୟାକ୍ସ ପାଉଛି ଓଡ଼ିଶା। ସେହିପରି ଡିଜେଲ ଲିଟର ପିଛା ୨ଟଙ୍କା ୧୫ପଇସା କମ୍ ଆଦାୟ ହେଉଛି। ଏଭଳି ତୈଳ ଦର କମିବା ଫଳରେ କେବଳ ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ କରିବାକୁ ସୁଯୋଗ ହରାଇଲାନି ବିଜେଡି, ନିର୍ବାଚନୀ ବର୍ଷରେ ବିଭିନ୍ନ ଲୋଭନୀୟ ଯୋଜନା ଘୋଷଣା କରିବାକୁ ମଧ୍ୟ ସାହସ କରିପାରୁ ନାହିଁ।କାରଣ ଚଳିତ ଆର୍ଥିକ ବର୍ଷରେ ପେଟ୍ରୋଲ-ଡିଜେଲରୁ ୫ହଜାର ୬୦୦କୋଟି ଟଙ୍କା ଆଦାୟ କରିବାକୁ ଲକ୍ଷ୍ୟ ରଖିଥିଲେ ଓଡ଼ିଶା ସରକାର। କିନ୍ତୁ ଏହିଭଳି ଦର ହ୍ରାସ ପାଇଲେ ଓଡ଼ିଶା ରାଜକୋଶକୁ ଟଙ୍କା ଆସିବାରେ ବ୍ରେକ୍ ଲାଗିଯିବ।

୫୧ ପଇସା କମିଥିଲା ବେଳେ ବ୍ୟସ୍ତ ହେଉଥିଲେ
ଏମିତି ବି ୨୦୧୪ମସିହାରେ ପେଟ୍ରୋଲ-ଡିଜେଲରୁ ୨ହଜାର ୮୬୫କୋଟି ଟଙ୍କା ରାଜସ୍ୱ ପାଉଥିବା ଓଡ଼ିଶା ୨୦୧୭-୧୮ ଆର୍ଥିକ ବର୍ଷରେ ୪ହଜାର ୮୦୦କୋଟି ଟଙ୍କା ସଂଗ୍ରହ କରିଥିଲା। ତୈଳ ବିକ୍ରିରୁ ଭଲ ରାଜସ୍ୱ ପାଇବା ଆଶାରେ ଓଡ଼ିଶା ସରକାର ପେଟ୍ରୋଲ-ଡିଜେଲ ଉପରେ ୨୧% ଭାଟକୁ ୨୬%କୁ ବୃଦ୍ଧି କରିଥିଲେ। ସେଥିପାଇଁ ତୈଳ ଦର ଲିଟର ପିଛା ଅଢ଼େଇ ଟଙ୍କା ହ୍ରାସ କରିବାକୁ ଜେଟଲୀଙ୍କ ପରାମର୍ଶ ଗ୍ରହଣ କରିନଥିଲେ। ଜେଟଲୀଙ୍କ ଅନୁରୋଧକୁ ସମ୍ମାନ ଜଣାଇ ୧୨ଟି ରାଜ୍ୟ ମୂଲ୍ୟ ହ୍ରାସ କରିଥିଲେ। କିନ୍ତୁ ଜେଟଲୀଙ୍କ ବନ୍ଧୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ତୈଳ ଦର କମାଇବାକୁ ବିରୋଧ କରିଥିଲେ। କେନ୍ଦ୍ର ଓ ତୈଳ କମ୍ମାନୀ ଅଢ଼େଇ ଟଙ୍କା ହ୍ରାସ କରିବା ଯୋଗୁ ଓଡ଼ିଶାର ୫୧ପଇସା ରାଜସ୍ୱ ହାନି ହେଲା ବୋଲି ଅର୍ଥମନ୍ତ୍ରୀ ଶଶିଭୂଷଣ ବେହେରା କହିଥିଲେ। ଏବେ ରାଜସ୍ୱ ଆଦାୟ ଲିଟର ପିଛା ୩ଟଙ୍କା କମିବାକୁ ଗଲାଣି,ତେଣୁ ଭଣ୍ଡାର ଦାୟିତ୍ୱରେ ଥିବା ଶଶିଭୂଷଣଙ୍କ ଚିନ୍ତା ବଢ଼ିବା ସ୍ୱାଭାବିକ!
ପଢ଼ନ୍ତୁ
କ୍ରିସମାସ୍‌ ପର ଦିନ ଖେଳାଯାଉଥିବା ମ୍ୟାଚ୍‌କୁ କାହିଁକି ବକ୍ସିଂ ଡେ’ ଟେଷ୍ଟ କୁହାଯାଏ ?
ଅଣକଂଗ୍ରେସ ସରକାର ସମୟରେ ଶ୍ରୀମନ୍ଦିରରେ ବିଭ୍ରାଟର ମାତ୍ରା ଅଧିକ କାହିଁକି ?