୨୦୧୯ନିର୍ବାଚନରେ ବିଜେଡି ବଡ଼ ବିଜୟ ପଛରେ ଛାତ୍ର ଓ ଯୁବ ସଂଗଠନର ଅବଦାନ ଥିଲା ପରି ଲାଗୁ ନାହିଁ।ଯଦିଓ ଛାତ୍ର ଓ ଯୁବ ବିଜେଡି ସଭାପତିଙ୍କୁ ଟିକେଟ ମିଳି ନଥିଲା।କିନ୍ତୁ ଉଭୟ ସଂଗଠନର କିଛି ପଦାଧିକାରୀଙ୍କ ଉପରେ ଆସ୍ଥା ପ୍ରକଟ କରିଥିଲେ ବିଜେଡି ସଭାପତି ନବୀନ ପଟ୍ଟନାୟକ।ଛାତ୍ର ବିଜେଡିର କାର୍ଯ୍ୟକାରୀ ସଭାପତି ଦେବୀରଞ୍ଜନ ତ୍ରିପାଠୀ ଓ ଯୁବ ବିଜେଡିର ଉପସଭାପତି ରୋମାଞ୍ଚ ରଞ୍ଜନ ବିଶ୍ୱାଳ ବିଧାନସଭା ନିର୍ବାଚନରେ ଲଢ଼ିଥିଲେ।ପୂର୍ବତନ ବିଧାୟକ ପ୍ରଭାତ ତ୍ରିପାଠୀଙ୍କ ପୁଅ ଦେବୀରଞ୍ଜନ,ବାପାଙ୍କ ଆସନ ବାଙ୍କିରୁ ୨୪ହଜାର ୧୧୮ଭୋଟ ବ୍ୟବଧାନରେ ବିଜୟୀ ହେଲେ।କିନ୍ତୁ ରୋମାଞ୍ଚ ରଞ୍ଜନ ଦେବଗଡ଼ରେ ୭ହଜାର ୧୦୬ଭୋଟ ବ୍ୟବଧାନରେ ପରାଜିତ ହୋଇଛନ୍ତି।ସେଥିପାଇଁ ଶାସକ ଦଳ,ଛାମୁଆ ସଂଗଠନକୁ ମଜଭୁତ କରିବା ଲାଗି ଉତ୍ତମ ସଂଗଠକମାନଙ୍କୁ ଦାୟିତ୍ୱ ଦେବ ବୋଲି ଚର୍ଚ୍ଚା ହେଉଛି।

ରେସରେ ଦେବୀ-ସୌଭିକ
ବର୍ତ୍ତମାନର ଛାତ୍ର ସଭାପତି ରାଣାପ୍ରତାପ ପାତ୍ରଙ୍କୁ ବିଦା କରିବାକୁ ବିଜେଡିର ଏକ ଗୋଷ୍ଟୀ ନିଷ୍ପତ୍ତି ନେଇଛନ୍ତି ବୋଲି କୁହାଯାଉଛି।କଲେଜ ଇଲକସେନ୍ ପୂର୍ବରୁ ରାଣାଙ୍କ ସ୍ଥାନରେ ଅନ୍ୟ ଜଣେ ସଭାପତି ଦାୟିତ୍ୱ ନେଇ ପାରନ୍ତି।ତେବେ ଛାତ୍ର ସଂଗଠନ ଅଧିକାଂଶ ସମୟ ୟଙ୍ଗ୍ ବିଧାୟକଙ୍କ ହାତରେ ରହିଛି।ସେ ନୟାଗଡ଼ ବିଧାୟକ ଅରୁଣ ସାହୁ ହୁଅନ୍ତୁ କିମ୍ବା ଚାନ୍ଦବାଲି ବିଧାୟକ ବ୍ୟମୋକେଶ ରାୟ।ସେଥିପାଇଁ ପଲଟିକାଲ୍ ସର୍କଲରେ ଆଲୋଚନା,ପ୍ରଥମ ଥର ବିଧାୟକ ହୋଇଥିବା ଦେବୀରଞ୍ଜନ ତ୍ରିପାଠୀ ବା ସୌଭିକ ବିଶ୍ୱାଳ ଛାତ୍ର ସଂଗଠନର ଦାୟିତ୍ୱ ନେଇ ପାରନ୍ତି।ପ୍ରଭାତ ତ୍ରିପାଠୀଙ୍କ ପୁଅ ଛାତ୍ର ସଂଗଠନ କାର୍ଯ୍ୟକାରୀ ସଭାପତିରୁ ପ୍ରମୋଶନ ଆଶା ରଖିଥିବା ବେଳେ,ପୂର୍ବତନ ବିଧାୟକ ପ୍ରଭାତ ବିଶ୍ୱାଳଙ୍କ ପୁଅ ସୌଭିକ କଟକର ବିଭିନ୍ନ କଲେଜ ଛାତ୍ର ସଂସଦ ନିର୍ବାଚନରେ ପ୍ରାର୍ଥୀ ଦେଉଛନ୍ତି।ତେଣୁ ଦେବୀରଞ୍ଜନ ବା ସୌଭିକ ସଭାପତି ହେଲେ ଛାତ୍ର ସଂଗଠନ ଅଧିକ କ୍ରିୟାଶୀଳ ହେବ ବୋଲି ଉଭୟଙ୍କ କ୍ୟାମ୍ପ୍ ଯୁକ୍ତି କରୁଛନ୍ତି।ପ୍ରଭାତ ବନାମ ପ୍ରଭାତ
ଉଭୟ ଦେବୀ ରଞ୍ଜନ ଓ ସୌଭିକ ନବୀନଙ୍କ ଗୁଡ୍ ବୁକରେ ରହିଛନ୍ତି।କିନ୍ତୁ ବିଜେଡିର ମୁଣ୍ଡ ବିନ୍ଧାର କାରଣ ହେଉଛି ଜଣକୁ ଦାୟିତ୍ୱ ଦେଲେ ଅନ୍ୟ ଜଣେ ସହଯୋଗ କରିବେ ନାହିଁ।କଟକରେ ବିଜେଡିରେ ଫାଟ ସୃଷ୍ଟି ହେବାର ସମ୍ଭାବନା ରହିଛି।ଏଭଳି ସ୍ଥିତିର ଫାଇଦା ଉଠାଇ ପାରନ୍ତି ଅରୁଣ ସାହୁ। କୁହାଯାଏ ଛାତ୍ର ସଭାପତି ଯିଏ ବି ହୁଅନ୍ତୁ ନା କାହିଁକି,ଚାବିକାଠି ଥାଏ ଅରୁଣଙ୍କ ହାତରେ।ବ୍ୟମୋକେଶ ରାଏ ଛାତ୍ର ସଭାପତି ଥିବାବେଳେ ଅରୁଣ ଥିଲେ ସର୍ବେସର୍ବା।

ରାଣାପ୍ରତାପ ଅରୁଣଙ୍କ କ୍ୟାମ୍ପର ନହେବାରୁ ଛାତ୍ର ସଂଗଠନ ଦୁର୍ବଳ ହୋଇଗଲା।ସେଥିପାଇଁ ଏଥର ଛାତ୍ର ଟିମକୁ ଅରୁଣ ସାହୁଙ୍କ ଫେଭରାଇଟଙ୍କୁ ମିଳିବ ବିଜେଡିର ଅଘୋଷିତ ସୁପ୍ରିମୋ ପ୍ରଣବ ପ୍ରକାଶ ଦାସଙ୍କ କ୍ୟାମ୍ପ ଚାହୁଁଛି।ଅରୁଣଙ୍କ ପ୍ରଥମ ପସନ୍ଦ ଛାତ୍ର ବିଜେଡିର ସାଧାରଣ ସମ୍ପାଦକ ହରିଶଙ୍କର ରାଉତ।ରେଭେନ୍ସା ବିଶ୍ୱବିଦ୍ୟାଳୟର ପୂର୍ବତନ ସଭାପତି ହରିଶଙ୍କର,ବିଜେପୁର ଉପନିର୍ବାଚନରେ ସଂଗଠନ କରିବାର ପରାକାଷ୍ଠା ଦେଖାଇଛନ୍ତି।
ବ୍ୟମୋଙ୍କ ଲାଗି ଅରୁଣ ଅଡୁଆ,ଡାର୍କ ହର୍ସ ସଞ୍ଜିତ
ସେହିଭଳି ଅମରେଶ ପତ୍ରୀଙ୍କ ସ୍ଥାନରେ ବିଧାୟକ ବ୍ୟମୋକେଶ ରାୟଙ୍କୁ ଯୁବ ସଂଗଠନ ସଭାପତି କରାଯାଇ ପାରେ। ହେଲେ ବ୍ୟମୋକେଶଙ୍କୁ ଯୁବ ସଭାପତି କଲେ ଉଭୟ ଛାତ୍ର ଓ ଯୁବ ସଂଗଠନକୁ ଅରୁଣଙ୍କ ନିୟନ୍ତ୍ରଣକୁ ଚାଲିଯିବ। ଅରୁଣଙ୍କୁ ସୁପର ପାଓ୍ୱାର କରିବାକୁ ଚାହୁଁ ନଥିବା ପ୍ରଣବ ପ୍ରକାଶ ଦାସ ନିଜର ସମର୍ଥକ ରୋମାଞ୍ଚ ରଞ୍ଜନ ବିଶ୍ୱାଳଙ୍କୁ ଯୁବ ସଂଗଠନର ଦାୟିତ୍ୱ ଦେଇପାରନ୍ତି।

ଦେବଗଡ଼ ଆସନରୁ ପରାଜିତ ରୋମାଞ୍ଚ ରଞ୍ଜନଙ୍କ ଜରିଆରେ ପ୍ରଣବ ପ୍ରକାଶ ପଶ୍ଚିମ ଓଡ଼ିଶା କାର୍ଡ ମଧ୍ୟ ଖେଳି ପାରନ୍ତି।ତେବେ ଯୁବ ସଂଗଠନକୁ ନିୟନ୍ତ୍ରଣରେ ରଖୁଥିବା ସଞ୍ଜୟ ଦାସବର୍ମା ମଧ୍ୟ ଲାଗିଛନ୍ତି ନିଜ ସମର୍ଥକଙ୍କୁ ଥଇଥାନ କରିବା ଯୋଜନାରେ। ଯୁବ ସଂଗଠନର କାର୍ଯ୍ୟକାରୀ ସଭାପତି ସଞ୍ଜିତ ମହାନ୍ତିଙ୍କୁ ସଭାପତି କରିବା ମୁଡରେ ଅଛନ୍ତି ସଞ୍ଜୟ। ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କ ସମ୍ପର୍କୀୟ ଭାଇ ସଞ୍ଜିତଙ୍କୁ,ପ୍ରଣବ ପ୍ରକାଶ ବିରୋଧ କରିନପାରନ୍ତି।ଏମିତି ବି ସମ୍ବଲପୁରକୁ ମନ୍ତ୍ରିମଣ୍ଡଳରେ ସ୍ଥାନ ମିଳି ନଥିବାରୁ,ସଞ୍ଜିତଙ୍କ ଜରିଆରେ ସେହି ଅଭିଯୋଗକୁ ବିଜେଡି ପ୍ରଶମିତ କରିପାରେ।
                                                           ଲେଖା-ଦେବେନ୍ଦ୍ର ନାୟକ