ନ୍ୟୁଜ୍/ ପଲିଟିକ୍ସ

ଅଧିକ ଭୋଟରେ ହିଞ୍ଜିଳିରୁ ଜିତିଲେ,ବିଜେପୁର ଆସନରୁ ନବୀନ ଦେଇପାରନ୍ତି ଇସ୍ତଫା!

BIJEPUR-BY-Election

ବିଜୁ ପଟ୍ଟନାୟକ ନିଜର ଶେଷ ନିର୍ବାଚନ ଦୁଇଟି ଆସନରୁ ଲଢ଼ିଥିଲେ।୧୯୯୬ନିର୍ବାଚନରେ କଟକ ଏବଂ ଆସିକା ଲୋକସଭା ଆସନରୁ ବିଜୁ ପଟ୍ଟନାୟକ ପ୍ରତିଦ୍ୱନ୍ଦ୍ୱିତା କରିଥିଲେ।ଆଉ ଉଭୟ ଆସନରୁ ବିଜୁ ପଟ୍ଟନାୟକ ବିଜୟୀ ହୋଇଥିଲେ। ତେବେ ଅଧିକ ଭୋଟ ପାଇଥିବାରୁ ନିଜ ଜିଲ୍ଲା ଗଞ୍ଜାମର ଆସିକା ଆସନକୁ ରଖି କଟକ ଆସନରୁ ଇସ୍ତଫା ଦେଇଥିଲେ ବିଜୁବାବୁ। ନବୀନ ପଟ୍ଟନାୟକ ମଧ୍ୟ ବାପାଙ୍କ ପରି ଏଥର ଦୁଇଟି ଆସନରୁ ନିର୍ବାଚନ ଲଢ଼ୁଛନ୍ତି।ଗଞ୍ଜାମ ଜିଲ୍ଲାର ହିଞ୍ଜିଳି ସହ ବରଗଡ଼ ଜିଲ୍ଲାର ବିଜେପୁର ଆସନରୁ ନବୀନ ଲଢ଼ିବେ।ମୁଖ୍ୟମନ୍ତ୍ରୀ ଲଢ଼ିବାକୁ ଯାଉଥିବା ଉଭୟ ଆସନରେ ବିଜେଡିର ଜିତାପଟ ପ୍ରାୟତଃ ନିଶ୍ଚିତ।ଯେପରି ନବୀନଙ୍କ କ୍ରେଜରେ ହିଞ୍ଜିଳି ସହ ଗଞ୍ଜାମର ଅନ୍ୟ ୧୨ଟି ଆସନରେ ବିଜେଡି ଜିତୁଛି,ଠିକ୍ ସେହିପରି ବରଗଡ଼ରେ ବିଜେଡି ଲାଗି ନବୀନଙ୍କ ବିଜେପୁରରୁ ଲଢ଼ିବା ସହାୟକ ହେବ।

Naveen@WesternOdisha

ହିଞ୍ଜିଳିରେ ଜିତିବା ବ୍ୟବଧାନ ବଢୁଛି
ଅନ୍ୟପକ୍ଷରେ ୨ଟି ଆସନରୁ ବିଜେଡି ଜିତିଲେ,ହିଞ୍ଜିଳି ବା ବିଜେପୁର ଗୋଟିଏ ଆସନରୁ ନବୀନଙ୍କୁ ଇସ୍ତଫା ଦେବାକୁ ପଡିବ। ଯାହା ଅନୁମାନ କରାଯାଉଛି ଲଗାତର ୪ଥର ଜିତୁଥିବା ହିଞ୍ଜିଳି ଆସନରୁ ନବୀନଙ୍କ ଜିତିବାର ବ୍ୟବଧାନ ଅଧିକ ହେବ। ୨୦୧୪ନିର୍ବାଚନରେ ହିଞ୍ଜିଳିରେ ୭୬ହଜାର ୫୮୬ ଭୋଟ ବ୍ୟବଧାନରେ ନବୀନ ବିଜୟ ହୋଇଥିଲେ। ଯାହାକି ୨୦୦୯ ନିର୍ବାଚନର ବିଜୟ ବ୍ୟବଧାନ ଅପେକ୍ଷା ୧୫ ହଜାର ୩୧୩ ଖଣ୍ଡ ଭୋଟ ଅଧିକ ରହିଥିଲା। ସେପଟେ ଯଦିଓ ୨୦୧୮ ବିଜେପୁର ଉପନିର୍ବାଚନରେ ବିଜେଡି ୪୧ହଜାର ୯୩୩ ଭୋଟ ବ୍ୟବଧାନରେ ବିଜେଡି ବିଜୟୀ ହୋଇଥିଲା। କିନ୍ତୁ ୨୦୧୪ନିର୍ବାଚନରେ ବିଜେଡିର ହେଭିଓ୍ୱେଟ୍ ପ୍ରସନ୍ନ ଆଚାର୍ଯ୍ୟ ୪୫୮ଭୋଟ ବ୍ୟବଧାନରେ ପରାସ୍ତ ହୋଇଥିଲେ। ଏସବୁକୁ ଦେଖିଲେ ଲାଗୁନି ବିଜେପିର ଗଡ଼ ବିଜେପୁରରେ ନବୀନ ପଟ୍ଟନାୟକଙ୍କ ବିଜୟ ବ୍ୟବଧାନ ଅଧିକ ହେବ।ତେଣୁ ନିର୍ବାଚନ ଫଳାଫଳ ଆସିବା ପରେ ଭୋଟ ଜିତିବାର ହାର ଅଧିକ ଆଧାରରେ ନବୀନ ହିଞ୍ଜିଳି ଆସନକୁ ରଖି ବିଜେପୁର ଆସନରୁ ଇସ୍ତଫା ଦେବେ!

ଯଦି ନବୀନ ପଟ୍ଟନାୟକ ହିଞ୍ଜିଳି ଆସନକୁ ୫ମ ଥର ଲାଗି ପତିନିଧିତ୍ୱ କରିବେ ତେବେ ବିଜେପୁର ଦେଖିବ ଉପନିର୍ବାଚନ।କଂଗ୍ରେସ ବିଧାୟକ ସୁବଳ ସାହୁଙ୍କ ଦେହାନ୍ତ ପରେ ଫେବ୍ରୁଆରୀ ୨୦୧୮ରେ ବିଜେପୁରବାସୀ ଦେଖିଥିଲେ ଦ୍ୱିତୀୟ ଉପନିର୍ବାଚନ।ସେହି ଉପନିର୍ବାଚନରେ ସୁବଳ ସାହୁଙ୍କ ସ୍ତ୍ରୀ ରୀତା ସାହୁ ବିଜେଡି ଟିକେଟରେ ବିଜୟୀ ହୋଇଥିଲେ। ଏହା ପୂର୍ବରୁ ୧୯୯୧ରେ ବିଧାୟକ ନିକୁଞ୍ଜ ବିହାରୀ ସିଂଙ୍କ ଦେହାନ୍ତ ହେବାରୁ ବିଜେପୁରରେ ହୋଇଥିଲା ପ୍ରଥମ ଉପନିର୍ବାଚନ।ସେହି ଉପନିର୍ବାଚନରେ ନିକୁଞ୍ଜ ବିହାରୀ ସିଂଙ୍କ ସ୍ତ୍ରୀ କିଶୋରମଣି ଜନତା ଦଳ ଟିକେଟରେ ବିଜୟୀ ହୋଇଥିଲା। ତାହେଲେ ୨୦୧୯ରେ ବିଜେପୁର ଭୋଟର କଣ ପୁଣି ଦେଖିବେ ଉପନିର୍ବାଚନ? 

You Might Also Like

No Comments

Leave a Reply