କଣ ବିଜୁ-ଜେବିଙ୍କ ରେକର୍ଡ ଭାଙ୍ଗିବେ ନବୀନ?

ଭୁବନେଶ୍ୱର: ବିଜେପିକୁ ଟକ୍କର ଦେଇ ବିଜେଡିର ସଭାସମିତି କରୁଛି। ପ୍ରଧାନମନ୍ତ୍ରୀଙ୍କ ବାରିପଦା ଗସ୍ତ ଦିନ ମୁଖ୍ୟମନ୍ତ୍ରୀଙ୍କ ପୁରୀରେ ମହିଳା ସମାବେଶ ବିଜେଡି ଷ୍ଟ୍ରାଟେଜୀର ଏକ ପାର୍ଟ। ସରକାରୀ କାର୍ଯ୍ୟକ୍ରମ ସହ ବିଜେପି କର୍ମୀଙ୍କୁ ଉତ୍ସାହିତ କରିବାକୁ ବାରିପଦା ସାଧାରଣ ସଭାରେ ଭାଷଣ ଦେବେ ନରେନ୍ଦ୍ର ମୋଦି।ଏମିତି ବି ନିର୍ବାଚନକୁ ଆଉ ମାତ୍ର ୪ମାସ ରହିଲା, ସେଥିପାଇଁ ନରେନ୍ଦ୍ର ମୋଦି ୩ ସପ୍ତାହରେ ୩ ଥର ଓଡ଼ିଶା ଆସୁଛନ୍ତି। ଖୋର୍ଦ୍ଧାର ସ୍ୱାଭିମାନ ସମାବେଶରେ ଗତ ଡିସେମ୍ବର ୨୪ରେ,ବିଜେପି ପାଇଁ ପ୍ରଚାର ଆରମ୍ଭ କରିଥିବା ମୋଦି, ଉପକୂଳ ପରେ ଉତ୍ତର ଓଡ଼ିଶା ବାରିପଦାକୁ ଜାନୁଆରୀ ୫ରେ ଆସୁଛନ୍ତି। ଆଉ ଜାନୁଆରୀ ୧୬ରେ ପଶ୍ଚିମ ଓଡ଼ିଶାର ବଲାଙ୍ଗିରିରେ ଦଳୀୟ କର୍ମୀଙ୍କୁ ଉତ୍ସାହିତ କରିବାକୁ ଆସୁଛନ୍ତି ବିଜେପିର ଟ୍ରମ୍ପ କାର୍ଡ ମୋଦି।
ବିଜୁଙ୍କ ପରି ଶ୍ରୀକ୍ଷେତ୍ରରୁ ଆରମ୍ଭ
ବାପା ବିଜୁ ପଟ୍ଟନାୟକଙ୍କ ପରି, ନବୀନ ମଧ୍ୟ ଶ୍ରୀକ୍ଷେତ୍ରରୁ ନିର୍ବାଚନୀ ପ୍ରଚାର ଆରମ୍ଭ କରୁଛନ୍ତି। ସେଥିପାଇଁ ମହିଳା ସ୍ୱୟଂ ସହାୟକ ଗୋଷ୍ଠୀର ସମାବେଶ ହେବ। ଜାନୁଆରୀ ୫ରେ ପୁରୀ ମିନି ଷ୍ଟାଡିୟମରେ ମହିଳା ସ୍ୱୟଂ ସହାୟିକା ଗୋଷ୍ଠୀଙ୍କ ଜିଲ୍ଲାସ୍ତରୀୟ ସମ୍ମିଳନୀ ଅନୁଷ୍ଠିତ ହେବ। ଯେଉଁଥିରେ ୪୨ହଜାର  ସ୍ୱୟଂ ସହାୟିକା ଗୋଷ୍ଠୀ ଯୋଗ ଦେବେ। ମୁଖ୍ୟମନ୍ତ୍ରୀ ସ୍ୱୟଂ ସହାୟିକା ଗୋଷ୍ଠୀ ଓ ମହିଳା ମହାସଂଘ ଗୁଡିକୁ ଯଥାକ୍ରମେ ୧୫ହଜାର ଓ ୨୫ଲକ୍ଷ ଟଙ୍କାର  ସହାୟତା ଦେବେ। ଏହାସହ ମୋବାଇଲ୍‍ ଫୋନ୍‍ ବାଣ୍ଟିବେ ମୁଖ୍ୟମନ୍ତ୍ରୀ। ତେବେ ରେକର୍ଡ ସୃଷ୍ଟିକାରୀ ନବୀନଙ୍କ ନଜରରେ ରହିଛନ୍ତି ମହିଳା ଭୋଟର। ୨୦୦୯ରେ ବିଜେପି ଠାରୁ ଅଲଗା ହୋଇ ୧୦୩ଟି ବିଧାନସଭା ଆସନରେ ବିଜେଡି ପ୍ରାର୍ଥୀଙ୍କୁ ବିଜୟୀ କରାଇଥିଲେ। ୨୦୧୪ରେ ମୋଦି ମ୍ୟାଜିକକୁ ଫୁସ୍ କରି ୨୦ଟି ଲୋକସଭା ଓ ୧୧୭ଟି ବିଧାନସଭା ଆସନରେ ବିଜେଡି ଜିତିଲା। ଲଗାତର ୪ର୍ଥ ଥର ମୁଖ୍ୟମନ୍ତ୍ରୀ ହେଲେ ନବୀନ ପଟ୍ଟନାୟକ। ଯାହାକି ଓଡ଼ିଶା ଇତିହାସରେ ରେକର୍ଡ। ଏବେ ସିନିଅର ପଟ୍ଟନାୟକଙ୍କ ରେକର୍ଡ ଭାଙ୍ଗିବାର ଚ୍ୟାଲେଞ୍ଜ ଅଛି ନବୀନଙ୍କ ଆଗରେ।

ବିଜୁ ଏବଂ ଜାନକୀ ବଲ୍ଳବ ପଟ୍ଟନାୟକ ଉଭୟ ମିଶି ୫ଥର ମୁଖ୍ୟମନ୍ତ୍ରୀ ହୋଇଛନ୍ତି। ୧୯୬୧ ଓ ୧୯୯୦ର ବିଜୁ ପଟ୍ଟନାୟକ ମୁଖ୍ୟମନ୍ତ୍ରୀତ୍ୱ କାର୍ଯ୍ୟକାଳ ପ୍ରାୟ ୭ବର୍ଷ ୪ମାସ ଅଟେ। ସେହିପରି ଜେବି ପଟ୍ଟନାୟକ ୧୯୮୦ରୁ ୧୯୮୯ ଏବଂ ୧୯୯୫ରୁ ୧୯୯୯ ମଧ୍ୟରେ ୩ଥର ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି। ଜେବିଙ୍କ ସିଏମ୍ କାର୍ଯ୍ୟକାଳ ୧୩ବର୍ଷ ୫ ମାସ।
ବିଜୁଙ୍କ ମୁଖ୍ୟମନ୍ତ୍ରୀତ୍ୱ ସମୟ
କଂଗ୍ରେସ    ୨/୬/୧୯୬୧ ରୁ ୨/୧୦/୧୯୬୩
ଜନତା ଦଳ ୫/୩/୧୯୯୦ ରୁ ୧୫/୩/୧୯୯୫
ଜେବିଙ୍କ ମୁଖ୍ୟମନ୍ତ୍ରୀତ୍ୱ
କଂଗ୍ରେସ  ୯/୬/୧୯୮୦ ରୁ  ୭/୧୨/୧୯୮୯
କଂଗ୍ରେସ  ୧୫/୩/୧୯୯୫ ରୁ ୧୭/୨/୧୯୯୯

ଉଭୟ ବିଜୁ ଓ ଜାନକୀଙ୍କ ମୁଖ୍ୟମନ୍ତ୍ରୀତ୍ୱ କାର୍ଯ୍ୟକାଳ ୨୦ବର୍ଷ ୯ମାସ। ଯାହାକି ନବୀନଙ୍କ ଠାରୁ ଅଢ଼େଇ ବର୍ଷ ଅଧିକ। ଏବେ ନବୀନ ବାହାରିଲେଣି ସିନିଅର ପଟ୍ଟନାୟକଙ୍କ ରେକର୍ଡ ଭାଙ୍ଗିବାକୁ।
ଲୋକାର୍ପଣ-ଶିଳାନ୍ୟାସ
୨୦୧୪ କ୍ୟାମ୍ପେନ୍ ଷ୍ଟାଇଲକୁ ରିପିଟ୍ କରିବେ ନବୀନ।ନିର୍ବାଚନ ବିଜ୍ଞପ୍ତି ପ୍ରକାଶ ପାଇବା ଆଗରୁ ପ୍ରତି ନିର୍ବାଚନ ମଣ୍ଡଳୀକୁ ଗସ୍ତ କରିବେ ବିଜେଡି ସଭାପତି ନବୀନ। ଦିନକୁ ଗୋଟିଏରୁ ଅଧିକ ବିଧାନସଭା ନିର୍ବାଚନ ମଣ୍ଡଳୀକୁ ଯାଇ ବିଭିନ୍ନ ବିଧାନସଭା କ୍ଷେତ୍ରରେ ଚାଲିଥିବା ଭିନ୍ନ ଭିନ୍ନ ପ୍ରକଳ୍ପକୁ ଲୋକାର୍ପିତ କରିବେ। ଏଥିପାଇଁ ଚାଲିଥିବା ପ୍ରକଳ୍ପ ଗୁଡିକୁ ଶୀଘ୍ର ଶେଷ କରିବାକୁ ସମସ୍ତ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦିଆଯାଇଛି। ଏହାସହ ଲୋକମାନେ ଦାବି କରୁଥିବା ନୂଆ ପ୍ରକଳ୍ପର ଲିଷ୍ଟ ପ୍ରସ୍ତୁତ କରିବା ଲାଗି ମୁଖ୍ୟମନ୍ତ୍ରୀଙ୍କ ଅଫିସରୁ ଜିଲ୍ଲା ପ୍ରଶାସନକୁ କୁହାଯାଇଛି।ଦାବି ଅନୁସାରେ ନୂଆ ପ୍ରକଳ୍ପର ଶିଳାନ୍ୟାସ ଦେଇ ଲୋକଙ୍କୁ ବିଜେଡି ପ୍ରତି ଆକୃଷ୍ଟ କରିବା ମୁଡରେ ଅଛନ୍ତି ନବୀନ। ତେବେ ବିଜୁ-ଜେବିଙ୍କ ରେକର୍ଡ ଭାଙ୍ଗିବାକୁ ନବୀନ ପଟ୍ଟନାୟକଙ୍କ ଉପରେ କଣ ଆସ୍ଥା ରଖିବେ ଓଡ଼ିଶା ଭୋଟର? ଏଥିପାଇଁ ମେ ମାସ ପର୍ଯ୍ୟନ୍ତ ଲାଗି ଅପେକ୍ଷା କରିବାକୁ ପଡ଼ିବ। ଅବଶ୍ୟ ସିକିମ୍ ଡେମକ୍ରାଟିକ୍ ଫ୍ରଣ୍ଟର ନେତା ପବନ କୁମାର ଚାମଲିଙ୍ଗ ୧୨ଡିସେମ୍ବର ୧୯୯୪ରୁ ୨୩ବର୍ଷ ହେଲାଣି ମୁଖ୍ୟମନ୍ତ୍ରୀ ଆସନରେ ବସିଛନ୍ତି। ଯାହାକି ଭାରତ ବର୍ଷରେ ରେକର୍ଡ।
ପଢ଼ନ୍ତୁ
ବଲକୁ ହାତ ମୁଠାରେ ରଖିଥିବା କ୍ରିକେଟର, କେବେ ଫିଙ୍ଗି ନାହାନ୍ତି ଓ୍ୱାଇଡ୍ କି ନୋ-ବଲ୍
ଅନେକ ବ୍ୟକ୍ତିଙ୍କ ଲାଇଫ୍ ଟାଇମ୍ ଇନକମ୍ ଠାରୁ ବଲିଉଡର ଏହି ଷ୍ଟାର୍ସଙ୍କ ମାସିକ ବିଦ୍ୟୁତ ବିଲ୍ ଅଧିକ