ଟାର୍ଗେଟରେ କଂଗ୍ରେସ; କିନ୍ତୁ ପିପିଲି ଦୁଷ୍କର୍ମର ତଦନ୍ତ ପୁଣି ଥରେ କରାଇବାକୁ PMଙ୍କ ପରାମର୍ଶ

ବାରିପଦା: ବିଜେପିର ଗଡ଼ ମୟୂରଭଞ୍ଜରେ କଂଗ୍ରେସ ଉପରେ ନିର୍ଧୁମ ବର୍ଷିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି।“ପୂର୍ବ ସରକାର ସମୟରେ ପ୍ରତିରକ୍ଷା ଦଲାଲ ମାନଙ୍କ ଦୈରାତ୍ମ ବଢ଼ି ଯାଇଥିଲା। ପ୍ରତିରକ୍ଷା ସମ୍ପର୍କିତ ଫାଇଲ୍ କେଉଁ ସରକାରୀ ଟେବୁଲରେ ଅଛି, ସେ ସବୁର ତଥ୍ୟ ଦଲାଲଙ୍କ ପାଖରେ ରହୁଥିଲା। ଏପରିକି ପ୍ରଧାନମନ୍ତ୍ରୀଙ୍କ ଅପେକ୍ଷା କଂଗ୍ରେସର ଟପ୍ ନେତାଙ୍କ ସହ ସମ୍ପର୍କ ଥିବା କ୍ରିଷ୍ଚେନ୍ ମିସେଲଙ୍କ ପରି ଦଲାଲଙ୍କ ନିକଟରେ ପ୍ରତିରକ୍ଷା ଫାଇଲର ମୁଭମେଣ୍ଟ ବାବଦରେ ଅଧିକ ଖବର ରହୁଥିଲା। ଏଥିପାଇଁ ଦଲାଲଙ୍କ ମେଳି ଚୌକିଦାରକୁ ହଟାଇବାକୁ ଚାହୁଁଛନ୍ତି। କିନ୍ତୁ ଯେ ପର୍ଯ୍ୟନ୍ତ ଚୌକିଦାର ଅଛି, ସେମାନଙ୍କ ଦୁର୍ନୀତିର ପର୍ଦ୍ଦାଫାସ ହେଉଥିବ। ଯାହା ପ୍ରତିରକ୍ଷା ଦଲାଲ କ୍ରିଷ୍ଚେନ୍ ମିସେଲଙ୍କ ଜେରାରୁ ଜଣାପଡୁଛି କଂଗ୍ରେସ ସରକାର ଚଳାଉ ଥିଲା ନା ମିସେଲ୍ ମାମାଙ୍କ ଦରବାର ଚାଲିଥିଲା? କଂଗ୍ରେସର ଏଭଳି କାର୍ଯ୍ୟକଳାପର ଜବାବ ଲୋକମାନେ ଦେବେ”ବୋଲି ପ୍ରଧାନମନ୍ତ୍ରୀ କହିଥିଲେ।
ଅନ୍ୟପଟେ ମୋଦିଙ୍କ ଅଭିଭାଷଣରୁ ଗୋଟିଏ କଥା ସ୍ପଷ୍ଟ ହେଉଛି ଯେ ନିର୍ବାଚନ ଯେତିକି ପାଖେଇ ଆସୁଛି ତାଙ୍କର ବିଜେଡି ପ୍ରତି ଆଭିମୁଖ୍ୟରେ ପରିବର୍ତ୍ତନ ଆସୁଛି। ଗତ ସେପ୍ଟେମ୍ବର 24ରେ, ଝାରସୁଗୁଡାରେ ରାଜ୍ୟ ସରକାରଙ୍କୁ ଭ୍ରଷ୍ଟ ତଥା ପିସି ସରକାର ବୋଲି କହିଥିଲେ। ଡିସେମ୍ବର 24 ଖୋର୍ଦ୍ଧାରେ ବିଜେପିର ସ୍ୱାଭିମାନ ସମାବେଶରେ ପିସି ଦାନବକୁ ଦାନା କିଏ ଦେଉଛି ବୋଲି ରାଜ୍ୟ ସରକାରଙ୍କୁ ପ୍ରଶ୍ନ କରିଥିଲେ। କିନ୍ତୁ ଆଜିର ସମାବେଶରେ ରାଜ୍ୟ ସରକାରଙ୍କ ଅପେକ୍ଷା କଂଗ୍ରେସ ଉପରେ ଅଧିକ ବର୍ଷିଥିଲେ। ତେଣୁ ରାଜ୍ୟର ନେତା ଆକଳନ କରୁଥିଲେ ବିଜେପିର ଗଡ଼ ବାରିପଦାରେ ମୋଦି ବିଜେଡି ସରକାର ଉପରେ ବର୍ଷିବେ।
ଫୋକସରେ ନାରୀ ସୁରକ୍ଷା
ବାରିପଦାରେ ମହିଳାଙ୍କ ଦ୍ୱାରା ଦେବୀ ସୁଭଦ୍ରାଙ୍କ ରଥଟଣାକୁ  ନାରୀ ସଶକ୍ତି କରଣର ଉଦାହରଣ ବୋଲି ପ୍ରଧାନମନ୍ତ୍ରୀ କହିଥିଲେ। ଅପର ପକ୍ଷରେ ନାରୀଙ୍କ ଶିକ୍ଷା, ସ୍ୱାସ୍ଥ୍ୟ ଏବଂ ରୋଜଗାର କ୍ଷେତ୍ରରେ କେନ୍ଦ୍ର ସରକାର ଯୋଜନାରୁ ଓଡ଼ିଶା ସରକାର ଫାଇଦା ନେଇ ପାରୁନାହାଁନ୍ତି। ନାରୀଙ୍କୁ ନ୍ୟାୟ ଦେବାରେ ମଧ୍ୟ ରାଜ୍ୟ ସରକାର ବିଫଳ ବୋଲି କହିଛନ୍ତି। ପୁରୀ ଜିଲ୍ଲା ପିପିଲିର ବେବିନା ମୃତ୍ୟୁ ଘଟଣାର ଉଦାହରଣ ଦେଇ ଓଡ଼ିଶାରେ ନାରୀ ଅସୁରକ୍ଷିତ ବୋଲି ରାଜ୍ୟ ସରକାରଙ୍କୁ ଟାର୍ଗେଟ କରିଥିଲେ ମୋଦି। ଅଭିଯୁକ୍ତମାନେ ନିର୍ଦ୍ଦୋଷରେ ଖସିଯିବାକୁ ଗମ୍ଭୀରତାର ସହ ନେଇ ପିପିଲି ଘଟଣାର ପୁଣିଥରେ ଯାଞ୍ଚ କରାଯାଉ। ଏଭଳି ହେଲେ ଆସୁରିକ ପ୍ରବୃତ୍ତି ରଖୁଥିବା ବ୍ୟକ୍ତିଙ୍କୁ କଡ଼ା ବାର୍ତ୍ତା ଯିବ ବୋଲି ମୋଦି କହିଥିଲେ। ଏହାସହ ଗରିବ ଲୋକଙ୍କ ଚିକିତ୍ସା ଲାଗି ଆୟୁଷ୍ମାନ ଯୋଜନାରେ ରାଜ୍ୟ ସାମିଲ ହେଉ ବୋଲି ପ୍ରଧାନମନ୍ତ୍ରୀ ଓଡ଼ିଶା ସରକାରଙ୍କୁ ପରାମର୍ଶ ଦେଇଛନ୍ତି।
ପଢ଼ନ୍ତୁ
ମହିଳାଙ୍କ ଲାଗି ନବୀନଙ୍କ ତୋଫା:୧୮୦ କୋଟି ଟଙ୍କାର ମୋବାଇଲ୍ ବାଣ୍ଟିବେ