ନୂଆବର୍ଷ ବଲିଉଡ୍ ପାଇଁ ଆଣିଲା ଦୁଃଖ ଖବର। ବର୍ଷିୟାନ୍ ଅଭିନେତା ତଥା କମେଡି ଷ୍ଟାର କାଦର ଖାନଙ୍କ ଦେହାନ୍ତ ହୋଇଛି। ୮୧ ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଛନ୍ତି କାଦର ଖାନ। କାନାଡାର ଏକ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ଦେହାନ୍ତ ହୋଇଛି। କାଦର ଖାନଙ୍କ ବିୟୋଗରେ ସାରା ବଲଉଡରେ ଶୋକର ଛାୟା। ସମସ୍ତେ ଝୁରୁଛନ୍ତି କମେଡି କିଙ୍ଗଙ୍କୁ ।

T 3045 – Kadar Khan passes away .. sad depressing news .. my prayers and condolences .. a brilliant stage artist a most compassionate and accomplished talent on film .. a writer of eminence ; in most of my very successful films .. a delightful company .. and a mathematician !! pic.twitter.com/l7pdv0Wdu1

— Amitabh Bachchan (@SrBachchan) January 1, 2019

କାବୁଲରୁ ଯାତ୍ରା କାନାଡ଼ରେ ଶେଷ

କାବୁଲରେ ଜନ୍ମଗ୍ରହଣ କରିଥିଲେ କାଦର ଖାନ୍। ପ୍ରଥମେ ଫିଲ୍ମ ପାଇଁ ଡାଏଲଗ୍ ଲେଖୁଥିଲେ । ଡାଏଲଗ୍ ରାଇଟର୍ ଭାବରେ ତାଙ୍କୁ ବ୍ରେକ୍ ଦେଇଥିଲେ ସୁପରଷ୍ଟାର ରାଜେଶ ଖନ୍ନା। ୧୯୭୩ରେ ରାଜେଶ ଖନ୍ନାଙ୍କ ସହ ଫିଲ୍ନ ଦାଗ ଜରିଆଗରେ ଅଭିନୟ ଦୁନିଆରେ ପାଦ ଥାପିଥିଲେ କାଦର ଖାନ୍। ତାପରଠୁ ଆଉ ପଛକୁ ଫେରି ଚାହିଁ ନାହାନ୍ତି। ଦର୍ଶକଙ୍କୁ ବାଣ୍ଟି ଚାଲିଥିଲେ ହସର ପସରା। ପାଖାପାଖି ୩ଶହରୁ ଅଧିକ ଫିଲ୍ମରେ ଅଭିନୟର ଛାପ ଛାଡ଼ିଛନ୍ତି କାଦର ଖାନ। ବିଶେଷ କରି ନିଆରା ଶୈଳୀରେ ଡାଏଲଗ୍ କହିବା ଦର୍ଶକଙ୍କୁ ମୁଗ୍ଧ କରେ।

ଅସ୍ତମିତ କାଦର ଖାନ

ରାଜେଶ ଖନ୍ନାଙ୍କ ସମେତ ବିଗ୍ ବିଙ୍କ ଅଭିନୀତ ଫିଲ୍ମ କୁଲି, ଦେଶପ୍ରେମୀ, ସୁହାଗ, ଅମର ଆକବର ଅନ୍ଥୋନୀ ଏବଂ ଜିତେନ୍ଦ୍ରଙ୍କ ହିମ୍ମତଓ୍ୱାଲା, ସର୍ଫରୋସ, ଜଷ୍ଟିସ ଚୌଧୁରୀ, ଫର୍ଜ ଓର୍ କାନୁନ୍ ଜିଓ ଓର୍ ଜିନୋ ଦୋ ଭଳି ଫିଲ୍ମ ପାଇଁ ବି ଡାଏଲଗ୍ ଲେଖିଥିଲେ କାଦର ଖାନ୍। ପ୍ରଥମେ ପ୍ରଥମେ ନେଗେଟିଭ୍ କ୍ୟାରେକ୍ଟରରେ ନଜର ଆସୁଥିଲେ। ପରେ ମିଳିଥିଲା କମେଡି ଚରିତ୍ର। ବିଶେଷ କରି ଗୋବିନ୍ଦାଙ୍କ ଓ ଅନୀଲ କପୁରଙ୍କ ବହୁ ଫିଲ୍ମରେ କାଦର ଖାନଙ୍କ କମେଡି ତଡକା ଦେଖିବାକୁ ମିଳିଛି। ୧୯୯୧ରେ ବାପ ନମ୍ବରୀ ବେଟା ଦଶ ନମ୍ବରୀ ଫିଲ୍ମ ପାଇଁ ଶ୍ରେଷ୍ଠ କମେଡି ଆକ୍ଟର ସମ୍ମାନରେ ସମ୍ମାନିତ ହୋଇଥିଲେ। ସାତ ଥର ଫିଲ୍ମ ଫେୟାର ଆଓ୍ୱାର୍ଡ ପାଇଁ ମନୋନୀତ ବି ହୋଇଥିଲେ  ଆଜି କାଦର ଖାନ ଅସ୍ତମିତ, କିନ୍ତୁ ତାଙ୍କ ସ୍ମୃତି ଫ୍ୟାନଙ୍କ ହୃଦୟରେ ତାଜା ହୋଇ ରହିବ ସବୁଦିନ।