ଦୀନେଶ କାର୍ତ୍ତିକଙ୍କ ସ୍ଥାନରେ ଦିନିକିଆ ଦଳରେ ରୁଷଭ ପନ୍ଥ, ମିଶନ୍ ବିଶ୍ୱକପ୍ ଅଭିଯାନରେ ଟିମ୍ ଇଣ୍ଡିଆ

ଟେଷ୍ଟ ସିରିଜ କ୍ଲିନ୍ ସୁଇପ୍ କରିବା ପରେ ଏବେ ଟାର୍ଗେଟ ଓ୍ୱାନ୍ ଡେ । ଆଜିଠୁ ଆରମ୍ଭ ଭାରତ-ଓ୍ୱେଷ୍ଟଇଣ୍ଡିଜ ଦିନିକିଆ ସିରିଜ । ପ୍ରଥମ ଦୁଇଟି ଓ୍ୱାନ୍ ଡେ ପାଇଁ ୧୨ ଜଣିଆ ଟିମ୍ ଘୋଷଣା କରାଯାଇଛି । ଦଳରେ ସ୍ଥାନ ପାଇଛନ୍ତି ରୁଷଭ ପନ୍ଥ । ଦୀନେଶ କାର୍ତ୍ତିକଙ୍କ ସ୍ଥାନରେ ତାଙ୍କୁ ନିଆଯାଇଛି । ଦିନିକିଆରେ ରୁଷଭଙ୍କ ଡେବ୍ୟୁ । ପୂର୍ବରୁ ଟେଷ୍ଟ ଓ ଟି-ଟ୍ୱେଣ୍ଟିରେ ଭାଗ୍ୟ ପରୀକ୍ଷା କରି ସାରିଛନ୍ତି ରୁଷଭ ପନ୍ଥ । ଓ୍ୱେଷ୍ଟଇଣ୍ଡିଜ ବିପକ୍ଷ ଦୁଇଟି ଟେଷ୍ଟରେ ଶତକ କରିବାରୁ ବଞ୍ଚିତ ହୋଇଥିଲେ । ଦୁଇଟି ଇନିଂସରେ ୯୨ ରନ୍ ଲେଖାଏଁ ହାସଲ କରିଥିଲେ ରୁଷଭ । ଏହାପରେ ଦିନିକିଆ ଦଳରେ ସୁଯୋଗ ମିଳିଛି । ଦୀନେଶ କାର୍ତ୍ତିକଙ୍କ ଜାଗା ନେଇଛନ୍ତି । ଧୋନିଙ୍କ ସହ ଦ୍ୱିତୀୟ ଓ୍ୱିକେଟର କିପର ଭାବରେ ରୁଷଭଙ୍କୁ ଦଳରେ ସୁଯୋଗ ମିଳିଛି । ଭବିଷ୍ୟତକୁ ଦୃଷ୍ଟିରେ ରଖି ଚୂଡ଼ାନ୍ତ ଦଳରେ ସାମିଲ କରାଯାଇଥିବା ଚୟନ କମିଟି ମୁଖ୍ୟ ଏମ୍. ଏସ୍. କେ. ପ୍ରସାଦ କହିଛନ୍ତି ।ବ୍ୟାଟ୍ସମ୍ୟାନ ଭାବରେ ଖେଳିବେ ରୁଷଭ୍
ଓ୍ୱେଷ୍ଟଇଣ୍ଡିଜ ବିପକ୍ଷ ମ୍ୟାଚରେ ଓ୍ୱିକେଟ କିପିଂ କରିବେ ଧୋନି । ରୁଷଭ ପନ୍ଥ କେବଳ ବ୍ୟାଟ୍ସମ୍ୟାନ ଭାବରେ ଖେଳିବେ । ଆବଶ୍ୟକ ପଡ଼ିଲେ ସେ ବ୍ରେକ୍ ଅଫ୍ ଓ୍ୱିକେଟ କିପର୍ ହୋଇ ପାରନ୍ତି ବୋଲି ଏମ୍.ଏସ୍.କେ. ପ୍ରସାଦ କହିଛନ୍ତି । ବିଶ୍ୱକପ୍ ପର୍ଯ୍ୟନ୍ତ ଧୋନି ଓ୍ୱିକେଟ କିପର ଦାୟିତ୍ୱ ତୁଲାଇବେ । ଅର୍ଥାତ୍ ରୁଷଭ ପନ୍ଥଙ୍କୁ ନେଇ ଭବିଷ୍ୟତର ଯୋଜନା କରୁଛି ବିସିସିଆଇ ।ରୁଷଭ ପନ୍ଥ ନା ଦୀନେଶ କାର୍ତ୍ତିକ ?
କୁହାଯାଉଛି ୨୦୧୯ ବିଶ୍ୱକପ ପରେ କ୍ରିକେଟକୁ ଅଲବିଦା କହି ପାରନ୍ତି ମହେନ୍ଦ୍ର ସିଂହ ଧୋନି । ତାଙ୍କ ପରେ କିଏ, ସେଇ ସନ୍ଧାନରେ ଅଛି ଚୟନ କମିଟି । ଏବେଠାରୁ କସରତ । ଦୀନେଶ କାର୍ତ୍ତିକ ଓ ରୁଷଭ ପନ୍ଥଙ୍କ ନାଁ ଉଠୁଛି । କାର୍ତ୍ତିକଙ୍କୁ ମିଳିଛି ଅନେକ ସୁଯୋଗ ।ଏବେ ରୁଷଭ ପନ୍ଥଙ୍କୁ ଟ୍ରାଏଲ୍ କରାଯାଉଛି । ଏମ୍.ଏସ୍.କେ. ପ୍ରସାଦ କହିଛନ୍ତି, ଉଚିତ୍ ସମୟ ଆସିଲେ ନିର୍ଣ୍ଣୟ କରାଯିବ କିଏ ବେଷ୍ଟ । କେବଳ ଓ୍ୱିକେଟ କିପର ନୁହନ୍ତି, ମଧ୍ୟକ୍ରମ ପାଇଁ ମଧ୍ୟ ନିର୍ଭରଯୋଗ୍ୟ ଖେଳାଳି ଖୋଜା ଚାଲିଛି । ରୁଷଭ ପନ୍ଥ କ୍ଲିକ୍ କଲେ ସମସ୍ୟା ଦୂର ହୋଇପାରେ । ରୁଷଭ ପନ୍ଥ ବର୍ତ୍ତମାନ ସୁଦ୍ଧା ୫ଟି ଟେଷ୍ଟ ଓ ୪ଟି ଟି-ଟ୍ୱେଣ୍ଟି ଖେଳିଛନ୍ତି । ଇଂଲଣ୍ଡ ବିପକ୍ଷ ଟେଷ୍ଟରେ ଶତକ ହାସଲ କରିଥିଲେ ।ବିଶ୍ୱକପ ପୂର୍ବରୁ ୧୮ ଦିନିକିଆ
୨୦୧୯ ବିଶ୍ୱକପ ପୂର୍ବରୁ ଭାରତ ଆଉ ମାତ୍ର 18ଟି ଦିନିକିଆ ଖେଳିବ । ଏହି ସମୟ ଭିତରେ ଚୂଡ଼ାନ୍ତ ଏକାଦଶକୁ ଫୋକସ କରାଯାଉଛି । ବର୍ତ୍ତମାନ ରୋହିତ ଶର୍ମା, ଶିଖର ଧଓ୍ୱନ, ବିରୋଟ କୋହଲି, ଅମ୍ବାତି ରାୟଡୁ ଓ ଧୋନିଙ୍କୁ ନେଇ ଟପ୍ ଅର୍ଡର ଠିକଠାକ୍ ଅଛି । ସମସ୍ୟା ରହିଛି ମଧ୍ୟକ୍ରମରେ । ସେହିପରି ଅଲରାଉଣ୍ଡ ଭାବରେ ହାର୍ଦ୍ଦିକ ପାଣ୍ଡ୍ୟା, କେଦାର ଯାଦବ ଓ ରବୀନ୍ଦ୍ର ଜାଡ଼େଜା ଅଛନ୍ତି । ପେସ୍ ବାହିନୀକୁ ଲିଡ କରିବେ ଭୁବନେଶ୍ୱର କୁମାର, ଯଶପ୍ରୀତ ବୁମରାହ, ଉମେଶ ଯାଦବ, ମହମ୍ମଦ ସାମି । ସ୍ପିନର କୁଳଦୀପ ଯାଦବ, ଯୁଜବେନ୍ଦର ଚହଲ ବି ଅଛନ୍ତି । ପାଣ୍ଡ୍ୟା ନଭେମ୍ୱର ସୁଦ୍ଧା ଆହତ ସମସ୍ୟାରୁ ବାହାରି ପାରନ୍ତି । ଆଗକୁ ବାକି ଥିବା ସମସ୍ତ ଦିନିକିଆରେ ଖେଳାଳିଙ୍କ ପ୍ରଦର୍ଶନ କହିବ କାହାକୁ ମିଳିବ ୧୯ ବିଶ୍ୱକପ୍ ଟିକେଟ୍ ?