ଭୁବନେଶ୍ୱର: ୨୦୧୯ରେ କେନ୍ଦ୍ରରେ କିଏ ଗଢ଼ିବେ ସରକାର ସେ ନେଇ ମିଡିଆ ହାଉସ୍ ଓପିନିଅନ୍ ପୋଲ୍ କରିବାରେ ବ୍ୟସ୍ତ। ରାଜସ୍ଥାନ,ମଧ୍ୟପ୍ରଦେଶ ଓ ଛତିଶଗଡ଼ରେ କଂଗ୍ରେସ ଜିତିବା ପରେ ଜନମତ ବିଜେପି ବିରୋଧରେ ଗଲା ପରି ଲାଗୁଛି। କିନ୍ତୁ ଦିଲ୍ଲୀ ରାଜନୀତିରେ ଦଖଲ ରଖିଥିବା ନେତାଏ କହୁଛନ୍ତି ମୋଦି ପୁଣି ପ୍ରଧାନମନ୍ତ୍ରୀ ହେବେ। ସେମାନଙ୍କ ଯୁକ୍ତି ମଧ୍ୟ ବିଚିତ୍ର। କେନ୍ଦ୍ରମନ୍ତ୍ରୀ ରାମବିଳାସ ପାଶଓ୍ୱାନ,ଏନଡିଏରେ ରହିବା ଅର୍ଥ, କେନ୍ଦ୍ରରେ ଆଦୌ ସରକାର ବଦଳିବ ନାହିଁ। ବିଜେପି-ଜେଡିୟୁ ସହ ମେଣ୍ଟ କରି ଆଗାମୀ ସାଧାରଣ ନିର୍ବାଚନରେ ପାଶଓ୍ୱାନଙ୍କ ଲୋକ ଜନଶକ୍ତି ପାର୍ଟି ବିହାରର ୬ଟି ଲୋକସଭା ଆସନରେ ଲଢ଼ିବାକୁ ଘୋଷଣା କରିଛି। ସେଥିପାଇଁ ସମସ୍ତେ କହିଲେଣି ନରେନ୍ଦ୍ର ମୋଦିଙ୍କୁ ଦ୍ୱିତୀୟ ଥର ପ୍ରଧାନମନ୍ତ୍ରୀ ହେବାରେ କେହି ଅଟକାଇ ପାରିବେ ନାହିଁ। କାରଣ ପାଶଓ୍ୱାନଙ୍କ ସମର୍ଥନ ଯାହ ସହ ରହିଛି ସେହି ଦଳ ହିଁ କେନ୍ଦ୍ରରେ ସରକାର କରିଛି।

ପାଶଓ୍ୱାନଙ୍କ ଏଣ୍ଟ୍ରିରେ ମୋରାରଜୀ ଦେଶାଇ ପିଏମ୍
୫ଟି ପ୍ରଧାନମନ୍ତ୍ରୀଙ୍କ କ୍ୟାବିନେଟରେ ସ୍ଥାନ ପାଇଥିବା ପାଶଓ୍ୱାନ,୧୯୭୭ରେ ପ୍ରଥମ ଥର ବିହାରର ହାଜିପୁର ଆସନରୁ ଲୋକସଭାକୁ ଆସିଥିଲେ। ଆରମ୍ଭରୁ ରାମବିଳାସ ପାଶଓ୍ୱାନ ସରକାରୀ ଦଳରେ ରହିଲେ ଏବଂ ପ୍ରଧାନମନ୍ତ୍ରୀ ହୋଇଥିଲେ ମୋରାରଜୀ ଭାଇ ଦେଶାଇ। ତେବେ କ୍ଷମତା କେଉଁ ଆଡ଼କୁ ଢ଼ଳୁଛି ମାପିବାରେ ପାରଙ୍ଗମ ପାଶଓ୍ୱାନ କ୍ୟାମ୍ପ ବଦଳାଇ ଚୌଧୁରୀ ଚରଣ ସିଂହଙ୍କୁ ସମର୍ଥନ କରିଥିଲେ। ପରେ ଜନତା ପାର୍ଟି ସରକାରରେ ଭାଙ୍ଗିଥିଲା ଏବଂ ମୋରାରଜୀ ଦେଶାଇ ଇସ୍ତଫା ଦେଇଥିଲେ। ଆଉ କଂଗ୍ରେସ ସମର୍ଥନରେ ଚୌଧୁରୀ ଚରଣ ସିଂହଙ୍କ ସରକାର ଗଠନ ହୋଇଥିଲା। ପରେ ବି.ପି.ସିଂହ ଓ ଦେବଗୌଡ଼ା ଏବଂ ଗୁଜରାଲ ସରକାରର କ୍ୟାବିନେଟରେ ରେଳ ମନ୍ତ୍ରାଳୟ ପରି ଗୁରୁତ୍ୱପୂର୍ଣ ବିଭାଗ ସମ୍ଭାଳି ଥିଲେ ରାମବିଳାସ। ଦଳିତ ବର୍ଗର ବଡ଼ ଚେହେରା ଭାବେ ପ୍ରୋଜେକ୍ଟ ହେଉଥିବା ପାଶଓ୍ୱାନ, ବିଜେପିର ବଡ଼ ସମାଲୋଚକ ଥିଲେ। ହେଲେ କ୍ଷମତା ପାଇଁ ନିଜ ରାଜନୈତିକ ଆଦର୍ଶ ସହ ସେ ସାଲିସ କରିଥିଲେ।
ରାମରଥର ବିରୋଧି ଆଡଭାନୀଙ୍କ ପ୍ରଶଂସକ ସାଜିଲେ
ବିହାରର ହାଜିପୁରୁର ୮ଥର ଲୋକସଭାକୁ ନିର୍ବାଚିତ ରାମବିଳାସ,୧୯୯୯ ନିର୍ବାଚନ ବେଳକୁ ଲାଲକୃଷ୍ଣ ଆଡଭାନୀଙ୍କ ଏନଡିଏ ରଥରେ ବସିଲେ। ଆଉ ୧୯୯୯ରେ ଅଟଳ ବିହାରୀ ବାଜପେୟୀଙ୍କ ନେତୃତ୍ୱରେ କେନ୍ଦ୍ରରେ ସରକାରରେ ପାଶଓ୍ୱାନ ଯୋଗ ଦେଇଥିଲେ। ତେବେ ଇଣ୍ଡିଆ ସାଇନିଂ କ୍ୟାମ୍ପେନିଂରେ ମାତି ୨୦୦୪ରେ ଆଗୁଆ ନିର୍ବାଚନ କରିବାକୁ ସ୍ଥିର କରିଥିଲା ବିଜେପି। ହେଲେ ରାଜନୈତିକ ପାଣିପାଗ ମାପିବାରେ ଧୁରନ୍ଧର ପାଶଓ୍ୱାନ ଜାଣି ସାରିଥିଲେ ଯେ ଏଥର ବାଜପେୟୀଙ୍କ ନାଁରେ ଭୋଟ ମିଳିବ ନାହିଁ। ସେଥିପାଇଁ ୨୦୦୪ ନିର୍ବାଚନ ଆଗରୁ ଏନଡିଏ ଛାଡ଼ି ଚାଲି ଯାଇଥିଲେ ପାଶଓ୍ୱାନ। କଂଗ୍ରେସ ନେତୃତାଧିନ ଉପା ସରକାର କେନ୍ଦ୍ରରେ ସରକାର ଗଢ଼ା ହୋଇଥିଲା। ମନମୋହନ ସିଂହଙ୍କ କ୍ୟାବିନେଟରେ ଯୋଗ ଦେଇଥିଲେ ପାଶଓ୍ୱାନ। ଯଦିଓ ୨୦୦୯ ନିର୍ବାଚନରେ ପାଶଓ୍ୱାନ ପରାଜିତ ହୋଇଥିଲେ ତେବେ ୟୁପିଏକୁ ସେ ବାଏ ବାଏ କରିନଥିଲେ। ଆଉ ମନମୋହନ ସିଂହ ଦ୍ୱିତୀୟ ଥର ପ୍ରଧାନମନ୍ତ୍ରୀ ଭାବେ ଶପଥ ନେଇଥିଲେ।

ମୋଦିଙ୍କ କ୍ରେଜ୍ ମାପି ଏନଡିଏକୁ ଫେରିଲେ
ଅପରପକ୍ଷରେ ୨୦୧୪ନିର୍ବାଚନ ଆଗରୁ ନରେନ୍ଦ୍ର ମୋଦିଙ୍କ ଯାଦୁ ଚାଲିବ ବୋଲି ପାଶଓ୍ୱାନ ହିଁ ଜାଣି ପାରିଥିଲେ। ସମୟ ନଷ୍ଟ କରି ବିଜେପି ସହ ମେଣ୍ଟ କରି ସଫଳତା ପାଇଥିଲେ। ଆଉ ମୋଦିଙ୍କ କ୍ୟାବିନେଟରେ ଖାଉଟି ବ୍ୟାପାର ବିଭାଗ ସମ୍ଭାଳିଲେ। ଏବେ ହିନ୍ଦୀ ହାଟଲ୍ୟାଣ୍ଡରେ କଂଗ୍ରେସର ବିଜୟ ପରେ ପାଶଓ୍ୱାନଙ୍କ ପୁଅ ଚିରାଗ ବିଜେପି ଉପରେ ଟିପ୍ପଣୀ ଦେଇଥିଲେ।ଅନୁମାନ କରାଯାଉଥିଲା ଏନଡିଏ ଛାଡ଼ିଦେବେ ପାଶଓ୍ୱାନ। କିନ୍ତୁ ଭୋଟରଙ୍କ ମୁଡ୍ ଜାଣିବାରେ ଓସ୍ତାଦ ପାଶଓ୍ୱାନଙ୍କ ଆକଳନ କହୁଛି ଯେ ଏବେ ବି ମୋଦିଙ୍କ କ୍ରେଜ୍ ରହିଛି।ସେଥିପାଇଁ ମେଣ୍ଟ ରାଜନୀତିର ଦ୍ୱାହି ଦେଇ ୨୦୧୪ରେ ଲଢ଼ିଥିବା ୭ଟି ଆସନ ଅପେକ୍ଷା ୬ଟିରେ ଲଢ଼ିବାକୁ ବିଜେପି ପ୍ରସ୍ତାବରେ ରାଜି ହୋଇଗଲେ।ସେଥିପାଇଁ ଦିଲ୍ଲୀରୁ ବିହାର ଯାଏଁ ଆଲୋଚନା ଯେ ବିଜେପି ସହ ପାଶଓ୍ୱାନ ରହିବା ଅର୍ଥ,ନରେନ୍ଦ୍ର ମୋଦି ଦ୍ୱିତୀୟ ଥର ପ୍ରଧାନମନ୍ତ୍ରୀ ହେବା ନିଶ୍ଚିତ।ତାହେଲେ ୨୦୧୯ ସ୍ୱାଧିନତା ଦିବସରେ ନରେନ୍ଦ୍ର ମୋଦିଙ୍କୁ ଲାଲକିଲ୍ଲାରୁ ଜାତୀୟ ପତାକା ଉଡ଼ାଇବାକୁ କଣ ଗ୍ରୀନ୍ ସିଗନାଲ୍ ଦେଲେ ପାଶଓ୍ୱାନ?
ଏଥିସହ ପଢନ୍ତୁ
ଛତିଶଗଡ଼ରେ BJP ହାରିଲା,କିନ୍ତୁ BJD ବିଧାୟକଙ୍କ ଚିନ୍ତା ବଢ଼ିଲା!
୨୦୧୮ର ବ୍ୟାଟିଂ ମହାରଥୀ: ଟପ୍ ଟେନରେ ବିରାଟ କୋହଲି ଓ ରୋହିତ ଶର୍ମା