ଫୋନିର ତାଣ୍ଡବରେ ୬୪ଜଣଙ୍କ ଜୀବନ ଗଲା।ଧ୍ୱସ୍ତ ହୋଇଗଲା ପୁରୀ,ଖୋର୍ଦ୍ଧା ଓ କଟକ ଜିଲ୍ଲା।ଫୋନି ଯିବାର ୨ସପ୍ତାହ ପରେ ମଧ୍ୟ ବିଦ୍ୟୁତ ଓ ପାଣି ଲାଗି ଡ଼ହଳ ବିକଳ ହେଉଛନ୍ତି ଭୁବନେଶ୍ୱରବାସୀ।ଅପରପକ୍ଷରେ୨୦୨୦ରେ ଜାପାନରେ ହେବାକୁ ଥିବା ଅଲମ୍ପିକ୍ ପାଇଁ ଯୋଗ୍ୟତା ହାସଲ ଲାଗି ହକି ସିରିଜର ଆୟୋଜନ କରୁଛନ୍ତି ଓଡ଼ିଶା ସରକାର।୮ଟି ଦେଶକୁ ନେଇ ଖେଳା ଯିବାକୁ ଥିବା ସେହି ହକି ସିରିଜ ପାଇଁ ଅନଲାଇନରେ ଟିକେଟ୍ ବିକ୍ରି କଲେ।ଜୁନ୍ ୬ରୁ ୧୫ତାରିଖ ପର୍ଯ୍ୟନ୍ତ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ସେହି ହକି ସିରିଜ ଅନୁଷ୍ଠିତ ହେବ।ତେବେ ଫୋନି ମାଡରେ ଭାଙ୍ଗିରୁଜି ଯାଇଥିବା କଳିଙ୍ଗ ଷ୍ଟାଡିୟମର ଭିତ୍ତିଭୂମି ବିକାଶ କରିବାକୁ କେନ୍ଦ୍ରୀୟ ଟିମ୍ ନିକଟରେ ୧୧କୋଟି ଟଙ୍କାର ଦାବି ଉପସ୍ଥାପନ କରିଛନ୍ତି କ୍ରୀଡ଼ା ବିଭାଗର ସଚିବ।
ପାଟକୁରା ନିର୍ବାଚନ ଘୁଞ୍ଚିଲା
ଓଡ଼ିଶା ସରକାର କହୁଛନ୍ତି ରିଲିଫ୍ ବଣ୍ଟନ ଏବଂ ଥଇଥାନ ହେଉଛି ସେମାନଙ୍କର ପ୍ରାଥମିକତା।ସେଥିପାଇଁ ଫୋନି ଦ୍ୱାରାର ସାମାନ୍ୟ ପ୍ରଭାବିତ ହୋଇଥିବା କେନ୍ଦ୍ରାପଡ଼ା ଜିଲ୍ଲାର ପାଟକୁରା ନିର୍ବାଚନକୁ ଘୁଞ୍ଚାଇ ଦେବାକୁ ପ୍ରସ୍ତାବ ଦେଲେ ମୁଖ୍ୟମନ୍ତ୍ରୀ।ଯଦି ଫୋନି ଆସିବା ଆଗରୁ ଗତ ଏପ୍ରିଲ ୩୦ରେ ନିର୍ବାଚନ କମିଶନଙ୍କୁ ମୁଖ୍ୟମନ୍ତ୍ରୀ ଭେଟି,ପାଟକୁରା ନିର୍ବାଚନ ଘୁଞ୍ଚାଇବାକୁ କହିପାରିଲେ।ସେହିଭଳି ଭାରତୀୟ ହକି ମହାସଂଘକୁ କଳିଙ୍ଗ ଷ୍ଟାଡିୟମରେ ହକି ସିରିଜ ନକରିବାକୁ କାହିଁକି ପ୍ରସ୍ତାବ ଦେଉନାହାଁନ୍ତି ନବୀନ ପଟ୍ଟନାୟକ?
୧୦୦ କୋଟିର ପ୍ରାୟୋଜକ
ବିଜେଡି ସରକାର ହକିକୁ ଏତେ ପ୍ରୋତ୍ସାହନ ଦେବା ପଛରେ ରହସ୍ୟ କଣ?ସାଧାରଣତଃ କୌଣସି ଖେଳର ପ୍ରାୟୋଜକ ରାଜ୍ୟ କିମ୍ବା କେନ୍ଦ୍ର ସରକାର ହୁଅନ୍ତି ନାହିଁ।କିନ୍ତୁ ଓଡ଼ିଶା ସରକାର ୧୦୦କୋଟି ଟଙ୍କା ନିବେଶ କରି ୫ବର୍ଷ ପାଇଁ ଜାତୀୟ ହକି ଦଳର ପ୍ରାୟୋଜକ ହେଲେ।ଗତ ନଭେମ୍ବର ୨୮ରୁ ଡିସେମ୍ବର ୧୬ଯାଏଁ ଚାଲିଥିବା ଥିବା ବିଶ୍ୱକପ ହକି ଟୁର୍ଣ୍ଣାମେଣ୍ଟ ବେଳେ ପାଣି ପରି ଟଙ୍କା ବୁହାଇଲେ।ଯଦି ପ୍ରକୃତରେ ବିଜେଡି ସରକାରଙ୍କ ହକି ଖେଳ ପ୍ରତି ଏତେ ମୋହ ତେବେ ଭାରତୀୟ ହକି ଦଳର ପୂର୍ବତନ ଅଧିନାୟକ ଦିଲ୍ଲୀପ ତିର୍କୀଙ୍କୁ ସୁନ୍ଦରଗଡ଼ ଲୋକସଭା ଆସନରୁ ଲଢ଼ାଇ ପାରିଥାନ୍ତେ। ନହେଲେ ଦିଲ୍ଲୀପଙ୍କୁ ପୁଣି ଥରେ ରାଜ୍ୟସଭାକୁ ପଠାଇ ପାରିଥାନ୍ତେ।
ଖର୍ଚ୍ଚର ହିସାବ ମିଳୁନି
ବିଶ୍ୱକପ ହକିର ଉଦଘାଟନୀ ଉତ୍ସବରେ ଶାହାରୁଖ,ସଲମାନ ଓ ମାଧୁରୀଙ୍କୁ କୋଟି କୋଟି ଟଙ୍କା ଦେଇ ରଙ୍ଗାରଙ୍ଗ କାର୍ଯ୍ୟକ୍ରମର ର୍ପ୍ରଦର୍ଶନ କରାଇଲେ।ନାଚଗୀତକୁ ଗାଁରେ ପହଞ୍ଚାଇବା ପାଇଁ ପଞ୍ଚାୟତ ଅଫିସରେ LED ଟିଭିର ବ୍ୟବସ୍ଥା କରାଇବାକୁ ବିଜୁ ଯୁବବାହିନୀ ୟୁନିଟକୁ ୨୪ହଜାର ଟଙ୍କା ଦିଆଗଲା।ଏବେ ଭଙ୍ଗା ବିଦ୍ୟୁତ ଖୁଣ୍ଟି ସ୍ଥାନରେ ନୂଆ ଖୁଣ୍ଟି ଦରକାର କରୁଥିଲା ବେଳେ କେତେକ ଅଣଓଡ଼ିଆ IAS ଅଫିସର ମାତିଛନ୍ତି ବିଶ୍ୱ ହକି ସିରିଜ ଆୟୋଜନରେ।ବିଶ୍ୱକପ ହକିର ଖର୍ଚ୍ଚର ହିସାବ ଦେଇ ପାରୁନଥିବା ଅଧିକାରୀ,ଏବେ ହକି ସିରିଜ ଜରିଆରେ ହାତ ଚିକ୍କଣ ଯୋଜନାରେ ଅଛନ୍ତି କି?
No Comments