ବଲାଙ୍ଗିର ବିଧାନସଭା ଆସନ ଉପରେ ସମସ୍ତଙ୍କ ନଜର। ଆସନ୍ତା ୧୮ତାରିଖରେ ମତଦାନ ହେବାକୁ ଥିବା ବଲାଙ୍ଗିରରେ ଏବେ ପୁଣି ଲଢ଼େଇ ରାଜା ପରିବାର ବନାମ ମିଶ୍ର ଫ୍ୟାମିଲି।୪ଥରର ବିଧାୟକ ଅନୁଭବୀ ନରସିଂହ ମିଶ୍ର,କଂଗ୍ରେସ ଟିକେଟରେ ଲଢୁଛନ୍ତି।ତାଙ୍କୁ ଟକ୍କର ଦେଉଛନ୍ତି ନିର୍ବାଚନରେ ପ୍ରଥମ ଥର ପ୍ରତିଦ୍ୱନ୍ଦ୍ୱିତା କରୁଥିବା ବିଜେଡି ପ୍ରାର୍ଥୀ ଅର୍କେଶ ନାରାୟଣ ସିଂହଦେଓ। ନରସିଂହ ମିଶ୍ରଙ୍କ ମୁଖ୍ୟ ପ୍ରତିଶ୍ରୁତି, କଂଗ୍ରେସ ଜିତିଲେ ଧାନର ସହାୟକ ମୂଲ୍ୟ ୨୬ଶହ ୫୦ଟଙ୍କା ହେବ।ସେପେଟ ବିଧାୟକ ନହୋଇ ମଧ୍ୟ ଅର୍କେଶ,ରାଜେନ୍ଦ୍ର କଲେଜକୁ ବିଶ୍ୱବିଦ୍ୟାଳୟର ମାନ୍ୟତା ମିଳିବା ଏବଂ ଆଧୁନିକ ବସଷ୍ଟାଣ୍ଡ ନିର୍ମାଣ ପାଇଁ ଉଦ୍ୟମ କରିଛନ୍ତି ବୋଲି ପ୍ରଚାର କରୁଛନ୍ତି। ଅନ୍ୟପଟେ ଲୋୟର ସୁକତେଲ ପ୍ରକଳ୍ପକୁ କାର୍ଯ୍ୟକ୍ଷମ କରାଇବାର ଆଶା ଦେଖାଇ ବିଜେପି ଭରସା କରିଛି ନୂଆ ଚେହେରା ଅନନ୍ତ ଦାସଙ୍କ ଉପରେ।ଯଦିଓ ନରେନ୍ଦ୍ର ମୋଦିଙ୍କ ହାଓ୍ୱା ରହିଛି ତେବେ ଅନନ୍ତଙ୍କ ଦୁର୍ବଳ ସଂଗଠନ ସେ ସବୁର ଫାଇଦା ନନେଇ ପାରେ!
ନରସିଂହଙ୍କ ବିରୋଧରେ ଇତିହାସ
ଇତିହାସ ଡରାଉଛି ନରସିଂହ ମିଶ୍ରଙ୍କୁ।ରେକର୍ଡ କହୁଛି ଯିଏ ବିରୋଧି ଦଳ ନେତା ହୋଇଛନ୍ତି,ତାଙ୍କ ରାଜନୈତିକ କ୍ୟାରିଅରରେ କଳାବାଦଲ ଘୋଟିଛି।ଗତ୨୦ବର୍ଷରେ ବିରୋଧି ଦଳ ନେତା ପଦରେ ବସିଥିବା ବିଧାୟକ ବିଧାନସଭାକୁ ପ୍ରବେଶ କରି ପାରୁନାହାଁନ୍ତି। ସେମାନେ ହେଲେ..
୧-ସଚ୍ଚିଦାନନ୍ଦ ଦଲାଲ(ବିଜେଡି)୧୯୯୮-୨୦୦୦
୨-ରମାକାନ୍ତ ମିଶ୍ର(କଂଗ୍ରେସ)୨୦୦୦-୨୦୦୪
୩-ଜେବି ପଟ୍ଟନାୟକ(କଂଗ୍ରେସ)୨୦୦୪-୨୦୦୯
୪-ରାମଚନ୍ଦ୍ର ଉଲ୍ଲକା(କଂଗ୍ରେସ)୨୦୦୯
୫-ଭୂପିନ୍ଦର ସିଂ(କଂଗ୍ରେସ)୨୦୦୯-୨୦୧୪
୬-ସୁରେନ୍ଦ୍ର ସିଂ ଭୋଇ(କଂଗ୍ରେସ) ୨୦୧୪
୭-ନରସିଂହ ମିଶ୍ର(କଂଗ୍ରେସ)୨୦୧୪
ରାଜ ପରିବାରର କଣ୍ଟ୍ରୋଲ
ଅନ୍ୟପଟେ ବଲାଙ୍ଗିର ହେଉଛି ରାଜ ପରିବାରର କର୍ମକ୍ଷେତ୍ର। ଅର୍କେଶଙ୍କ ଜେଜେ ବାପା ଆର.ଏନ୍.ସିଂହଦେଓ ବଲାଙ୍ଗିରରୁ ଲଗାତର ୩ଥର ଜିତି ୧୯୬୭ରେ ଓଡ଼ିଶାର ମୁଖ୍ୟମନ୍ତ୍ରୀ ହୋଇଥିଲେ।ପରେ ଅର୍କେଶଙ୍କ ବାପା ଅନଙ୍ଗ ଉଦୟ ସିଂହଦେଓ ବାଲାଙ୍ଗିରରୁ ଲଗାତର ୫ଥର ଜିତିଛନ୍ତି। କିନ୍ତୁ ଗତ ନିର୍ବାଚନରେ ଅନଙ୍ଗଙ୍କ ଜିତିବା ସ୍ପିଡରେ ବ୍ରେକ ଲଗାଇ ଥିଲେ ନରସିଂହ।୨୦୧୪ରେ ନରସିଂହ ୧୨ ହଜାର ୨୫୪ ଭୋଟ ବ୍ୟବଧାନରେ ଅନଙ୍ଗଙ୍କୁ ପରାସ୍ତ କରିଥିଲେ। ତେବେ ଗତ ନିର୍ବାଚନରେ ନରସିଂହଙ୍କୁ ଜିତାଇ ଥିବା ଲକ୍ଷ୍ମଣ ମେହେରଙ୍କ ପରି ନେତା ଏବେ ବିଜେଡି ଶିବିରରେ। ସେପଟେ ବଲାଙ୍ଗିର ଲୋକସଭା ଆସନରେ ପୁଅ ସମରେନ୍ଦ୍ର ମିଶ୍ର ପ୍ରାର୍ଥୀ ହେବା ପରେ ବାପା ନରସିଂହଙ୍କୁ ଆଡ ନଜରରେ ଦେଖୁଛନ୍ତି କଂଗ୍ରେସ କର୍ମୀ।ପୁଣି ଦେଓଗାଁ ବ୍ଲକରେ ଲକ୍ଷ୍ମଣ ମେହେରଙ୍କ ପକେଟ ଭୋଟ୍ ଅର୍କେଶଙ୍କ ପାଇଁ ଫାଇଦା ଆଣିପାରେ। ଏହାସହ ଅର୍କେଶଙ୍କ ସ୍ତ୍ରୀ ଓ ବାପା-ମା’ଙ୍କ ପ୍ରଚାର ବିଜେଡିକୁ ସୁବିଧା ଜନକ ସ୍ଥିତିରେ ପହଞ୍ଚାଇଛି।
କଳିକେଶଙ୍କ ଠାରୁ ହାରିଥିଲେ
ସେଥିପାଇଁ ବଲାଙ୍ଗିରରେ ଏବେ ଆଲୋଚନା ବାପା ଅନଙ୍ଗ ଉଦୟଙ୍କୁ ସିନା ନରସିଂହ ମିଶ୍ର ପରାସ୍ତ କରିଛନ୍ତି।କିନ୍ତୁ ୨୦୦୯ ଲୋକସଭା ନିର୍ବାଚନରେ ଯେମିତି ଅନଙ୍ଗଙ୍କ ପୁଅ କଳିକେଶଙ୍କ ଠାରୁ ନରସିଂହ ପରାଜିତ ହୋଇଥିଲେ,ଏଥର ମଧ୍ୟ ନିର୍ବାଚନ ଦୌଡରେ ସାନ ପୁଅ ଅର୍କେଶଙ୍କ ଠାରୁ ପଛରେ ପଡିବେ!
ପଢ଼ନ୍ତୁ-ଲାରାଙ୍କ ରେକର୍ଡକୁ ହେଡନ୍ ଭାଙ୍ଗିଲେ:କିନ୍ତୁ ମାତ୍ର ୬ମାସରେ ପୁଣି ବିଶ୍ୱ ବିଜେତା ହେଲେ ଲାରା
No Comments