ଭୁବନେଶ୍ୱର: ନିର୍ବାଚନ ପାଇଁ ଓଡ଼ିଶାରେ ବିଜେପି ଓ କଂଗ୍ରେସ ଛୋଟ ଛୋଟ ଦଳକୁ ସାଙ୍ଗରେ ନେବାକୁ ଉଦ୍ୟମ କରୁଛନ୍ତି। ବିଭିନ୍ନ ଛୋଟ ଦଳ ଗୁଡିକ ସହ ବୁଝାମଣା ହେବ ବୋଲି ବିଜେପି ନେତା ଧର୍ମେନ୍ଦ୍ର ପ୍ରଧାନ କହୁଛନ୍ତି। ସେପଟେ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକ ବାମପନ୍ଥୀଙ୍କୁ ସାଙ୍ଗରେ ଧରି ସଭାସମିତି କଲେଣି। ନିଜ ଦଳର ବିଧାୟକ କୃଷ୍ଣଚନ୍ଦ୍ର ସଗରିଆଙ୍କ ମନ ସିନା ଜିଣି ପାରୁନାହାଁନ୍ତି, ହେଲେ ସମତାକ୍ରାନ୍ତି ଦଳର ଏକମାତ୍ର ବିଧାୟକ ଜର୍ଜ ତିର୍କୀଙ୍କୁ ଦଳରେ ମିଶାଇ ସୁନ୍ଦରଗଡ଼ରେ ସଂଗଠନ ମଜଭୁତ କରିବାକୁ ଉଦ୍ୟମ କଲେ ନିରଞ୍ଜନ। ଝାଡ଼ଖଣ୍ଡ ମୁକ୍ତିମୋର୍ଚ୍ଚା ସହ ମେଣ୍ଟ କରି ମୟୂରଭଞ୍ଜ ଜିଲ୍ଲାରେ ବିଜେଡି-ବିଜେପିକୁ ଟକ୍କର ଦେବାକୁ ପ୍ଲାନ କରୁଛନ୍ତି ନିରଞ୍ଜନ ପଟ୍ଟନାୟକ। ଆଉ ବିଜେଡିର ବହିଷ୍କୃତ ବିଧାୟକ ଦାମଦୋର ରାଉତଙ୍କୁ, ନବୀନ ପଟ୍ଟନାୟକ ବିରୋଧି ମଞ୍ଚର ବ୍ରାଣ୍ଡ ଆମ୍ବସଡର କରିଛନ୍ତି ନିରଞ୍ଜନ।ଜେବିଙ୍କ ଫର୍ମୁଲା ରିପିଟ୍
ତେବେ ୧୯୯୫ରେ ବିଜୁ ପଟ୍ଟନାୟକ କ୍ଷମତାକୁ  ନଫେରିବା ପଛରେ, ବାମପନ୍ଥୀଙ୍କ ସହ ମେଣ୍ଟ ଭାଙ୍ଗିବା ବଡ଼ କାରଣ ଥିଲା। ଜନତା ଦଳର ତତ୍କାଳୀନ ପାଓ୍ୱାର ସେଣ୍ଟର ବିଜୟ ମହାପାତ୍ରଙ୍କ ଜିଦ୍ ଯୋଗୁ ବାମପନ୍ଥୀଙ୍କ ସହ ଜନତା ଦଳର ମେଣ୍ଟ ହୋଇ ପାରିନଥିଲା। କୁହାଯାଏ ଜନତା ଦଳ ସହ ବାମଦଳର ମତଭେଦ ପଛରେ ଜେ.ବି. ପଟ୍ଟନାୟକଙ୍କ ଭମିକା ମଧ୍ୟ ରହିଥିଲା। ଫଳରେ ୧୯୯୫ରେ ଜାନକୀ ବଲ୍ଲବ ପଟ୍ଟନାୟକଙ୍କ ନେତୃତାଧିନ  କଂଗ୍ରେସ ଶାସନକୁ ଫେରିଥିଲା। ଏବେ ଓଡ଼ିଶାରେ ପ୍ରାୟ ସେହି ଅବସ୍ଥା। ସମ୍ବିଧାନ ବଞ୍ଚାଅ ସଭାରେ ଯୋଗ ଦେବାକୁ  ବାମପନ୍ଥୀ ନେତାଏ କଂଗ୍ରେସ ଭବନକୁ ଯାଉଛନ୍ତି। ସିପିଏମର ବରିଷ୍ଠ ନେତା ଜନାର୍ଦ୍ଦନ ପତିଙ୍କୁ ସାଥିରେ ନେଇ ଖୋର୍ଦ୍ଧା ଜନଜାଗରଣ ସମାବେଶରେ ସାମିଲ ହେଉଛନ୍ତି କଂଗ୍ରେସ ସଭାପତି। କିନ୍ତୁ ଜେ.ବି.ପଟ୍ଟନାୟକଙ୍କ ଫର୍ମୁଲାକୁ ରିପିଟ୍ କଲେ ନିରଞ୍ଜନ ପଟ୍ଟନାୟକ ବିଫଳ ହେବା ସୁନିଶ୍ଚିତ। କାରଣ ୧୯୯୫ର ବାମପନ୍ଥୀର ସ୍ଥିତି ଆଜି ଓଡ଼ିଶାରେ ନାହିଁ। କାରଣ ଜେ.ବିଙ୍କ ସମୟରେ ଦ୍ୱିତୀକୃଷ୍ଣ ପଣ୍ଡା, ଲୋକନାଥ ଚୌଧୁରୀ, ଶିବାଜୀ ପଟ୍ଟନାୟକ, ନିତ୍ୟାନନ୍ଦ ପ୍ରଧାନ ଓ ପ୍ରସନ୍ନ ପଣ୍ଡାଙ୍କ ପରି ବାମପନ୍ଥୀ ନେତା ବାରମ୍ବାର ନିର୍ବାଚିତ ହେଉଥିଲେ। ବିଜୁ ପଟ୍ଟନାୟକ ଓ ଜେ.ବି.ପଟ୍ଟନାୟକଙ୍କ ପରି ନେତା ସେହି ବାମପନ୍ଥୀ ନେତାଙ୍କୁ ଟକ୍କର ଦେଉ ପାରୁନଥିଲେ। ଫଳରେ ୧୯୯୫ରେ ବିଜୁ ପଟ୍ଟନାୟକଙ୍କ ଏକାକୀ ଲଢ଼ି ସରକାର ଗଢ଼ିବା ଦମ୍ଭକୁ ପାଣିଚିଆ କରି ଦେଇଥିଲା ବାମ ଦଳ।ମିଡିଆରେ ବଞ୍ଚିଛି ବାମ ଦଳ
ଅପରପକ୍ଷରେ ଏବେକାର ସିପିଆଇ ନେତା ରାମକୃଷ୍ଣ ପଣ୍ଡା ହୁଅନ୍ତୁ କି ସିପିଏମର ଜନାର୍ଦ୍ଦନ ପତି ଏମାନେ ସମସ୍ତେ ମିଡିଆରେ ନେତା। ବଣାଇର ସିପିଏମ୍ ବିଧାୟକ ଲକ୍ଷ୍ମଣ ମୁଣ୍ଡା ବିଧାନସଭାରେ ବାମଦଳର ଏକମାତ୍ର ପ୍ରତିନିଧି। ସୀମା ପୁନଃ ନିର୍ଦ୍ଧାରଣ ପରେ ନାରାୟଣ ରେଡୀଙ୍କ ପରି ଫାୟାରବ୍ରାଣ୍ଡ ନେତା,ବିଧାନସଭା ଆସି ପାରୁନାହାଁନ୍ତି। ନିତ୍ୟାନନ୍ଦ ପ୍ରଧାନଙ୍କୁ ଦଳରେ ମିଶାଇ ଗ଼ଞ୍ଜାମ ଜିଲ୍ଲାରେ କମ୍ୟୁନିଷ୍ଟ ଦଳର ଜଡ଼ ଦୋହଲାଇ ଦେଇଛନ୍ତି ନବୀନ ପଟ୍ଟନାୟକ। ପ୍ରସନ୍ନ ପଣ୍ଡାଙ୍କ ପରି ଛଅ ଛଅ ଥରର ବିଧାୟକ ଏବଂ ଲୋକନାଥ ଚୌଧୁରୀଙ୍କ ପରି ପୂର୍ବତନ ସାଂସଦଙ୍କ ଦେହାନ୍ତ ହୋଇଛି। ଆଉ ବୟସାଧିକ ଯୋଗୁ ଶିବାଜୀ ପଟ୍ଟନାୟକ ଏବଂ ଦ୍ୱିତୀକୃଷ୍ଣ ପଣ୍ଡାଙ୍କ ପରି ବାମପନ୍ଥୀ ନେତା ରାଜନୈତିକ କାର୍ଯ୍ୟକ୍ରମରୁ ଦୂରେଇ ରହୁଛନ୍ତି।ଦୁର୍ବଳ ଶ୍ରମିକ ସଂଗଠନ
ସେହିଭଳି ୧୯୯୫ ପରି ଆଜି ଓଡ଼ିଶାରେ ବାମପନ୍ଥୀ ଶ୍ରମିକ ସଂଗଠନ ମଧ୍ୟ ଦୁର୍ବଳ ହୋଇଗଲାଣି। ବାମପନ୍ଥୀଙ୍କ ଗଡ଼ ଗଞ୍ଜାମ, ଜଗତସିଂହପୁର, ଝାରସୁଗୁଡ଼ା ଓ ସୁନ୍ଦରଗଡ଼ ଜିଲ୍ଲାରେ ବିଜେଡି ସ୍ଥିତି ଯଥେଷ୍ଟ ମଜଭୁତ। ଆଉ ଏବେକାର କମ୍ୟୁନିଷ୍ଟ ଲିଡରଙ୍କ ଆଭିମୁଖ୍ୟ ମଧ୍ୟ ସ୍ପଷ୍ଟ ନାହିଁ। ମହାନଦୀ ଜଳ ବିବାଦ ସମୟରେ ନବୀନ ପଟ୍ଟନାୟକଙ୍କ ସହ କମ୍ୟୁନିଷ୍ଟ ଲିଡର ଠିଆ ହେଉଛନ୍ତି। ତେଣୁ ସଂଗଠନ ଦୁର୍ବଳ ଥିବା ବାମପନ୍ଥୀ ଦଳ ୨୦୧୯ ନିର୍ବାଚନରେ କଂଗ୍ରେସକୁ ସହାୟକ ହେବ କେମିତି ?

ଏଥିସହ ପଢ଼ନ୍ତୁ-ଟାଇମ୍ ମାଗାଜିନରେ ସ୍ଥାନ ପାଇଥିବା ପ୍ରଥମ ବଲିଉଡ ଅଭିନେତ୍ରୀଙ୍କ ମୃତ୍ୟୁ, ଆଜି ବି ରହସ୍ୟ ଘେରରେ