ମହାରାଷ୍ଟ୍ରରେ BJPକୁ ରେଡ୍ ସିଗନାଲ୍ ଦେଖାଇ, ଉଦ୍ଧବ ଥାକେରଙ୍କ ନେତୃତ୍ୱରେ,ସରକାର ଗଢ଼ିବାରେ ସଫଳ ହେଲା କଂଗ୍ରେସ।କିନ୍ତୁ ମଧ୍ୟପ୍ରଦେଶ କ୍ଷମତାରୁ ଦୂର ହେବାକୁ ଯାଉଛି କଂଗ୍ରେସ।ଜ୍ୟୋତିରାଦିତ୍ୟ ସିନ୍ଧିଆ ଏବଂ ତାଙ୍କର ୨୦ ସମର୍ଥକ ବିଧାୟକ,କଂଗ୍ରେସରୁ ଇସ୍ତଫା ଦେଇଛନ୍ତି।ଫଳରେ କମଳନାଥଙ୍କ ସରକାର ଏବେ ସଂଖ୍ୟା ଗରିଷ୍ଠତା ହରାଇଛି। ୨୩୦ ଆସନ ଥିବା ମଧ୍ୟପ୍ରଦେଶର ବିଧାନସଭାରେ କଂଗ୍ରେସର ୧୧୪ ବିଧାୟକ ଥିଲେ।ସମାଜବାଦୀ ପାର୍ଟି, ବିଏସପି ଏବଂ ସ୍ୱାଧିନଙ୍କୁ ମିଶାଇ ୭ ଅଣକଂଗ୍ରେସ ବିଧାୟକଙ୍କ ସମର୍ଥନରେ ୧୭ ଡିସେମ୍ବର ୨୦୧୮ରୁ କମଳନାଥ ମୁଖ୍ୟମନ୍ତ୍ରୀ ପଦରେ ବସିଥିଲେ।
ଆରମ୍ଭରୁ ଅଡୁଆ
ପୂର୍ଣ୍ଣ ସଂଖ୍ୟା ଗରିଷ୍ଠତା ନଥିବା କମଳନାଥ ସରକାର,ଆରମ୍ଭରୁ ସଂକଟରେ ରହିଥିଲା।କାରଣ ୨୦୧୮ବିଧାନସଭା ନିର୍ବାଚନରେ ସିଟ୍ କମା ପାଇବା ସତ୍ତ୍ୱେ, କଂଗ୍ରେସ ଠାରୁ BJP ୪୭ ହଜାର ୮୨୭ ଭୋଟ୍ ଅଧିକ ପାଇଥିଲା।୧୧୪ଟି ଆସନରେ ଜିଣିଥିବା କଂଗ୍ରେସକୁ ୧କୋଟି ୫୫ଲକ୍ଷ ୯୫ହଜାର ୧୫୩ ଭୋଟ୍ ମିଳିଥିଲା।ଅପରପକ୍ଷରେ ୧୦୯ଟି ଆସନରେ ବିଜୟୀ ହୋଇଥିବା BJPକୁ ୧କୋଟି ୫୬ଲକ୍ଷ ୪୨ହଜାର ୯୮୦ ଭୋଟ୍ ମିଳିଥିଲା।ତେବେ ୨୦୧୯ ଲୋକସଭା ନିର୍ବାଚନରେ ଗୁନା ଆସନରୁ ଜ୍ୟୋତିରାଦିତ୍ୟ ସିନ୍ଧିଆଙ୍କ ପରାଜୟ,କଂଗ୍ରେସର ସଂକଟ ବଢ଼ାଇଲା।ପୂର୍ବରୁ ଅପଡ଼ ଥିବା କମଳନାଥଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇବା ଲାଗି ଜୁନିଅର ସିନ୍ଧିଆ ସୁଯୋଗ ଅପେକ୍ଷାରେ ରହିଲେ।
ମୌକା ଦେଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ମଧ୍ୟପ୍ରଦେଶ ପଲିଟିକ୍ସରେ ଏଣ୍ଟ୍ରି ମାରିଲେ।ନିଜର ମାର୍ଗଦର୍ଶକ ସୂର୍ଗତ ଅଟଳ ବିହାରୀ ବାଜପେୟୀଙ୍କ ବିରାଟ ପରାଜୟର ପ୍ରତିଶୋଧ ନେବାକୁ ବ୍ଲୁ-ପ୍ରିଣ୍ଟ ସ୍ଥିର କଲେ।ବାଜପେୟୀଙ୍କୁ ହରାଇବା ଲାଗି ଯେଉଁ ଗୋଓ୍ୱାଲିୟର ମହାରାଜାଙ୍କୁ ଲଢ଼ାଇ,ତତ୍କାଳୀନ ପ୍ରଧାନମନ୍ତ୍ରୀ ରାଜୀବ ଗାନ୍ଧି ୧୯୮୪ରେ ଗୋଟି ଚଳାଇଥିଲେ। ପ୍ରଧାନମନ୍ତ୍ରୀ ମୋଦି,ଏବେ ସେହି ଗୋଓ୍ୱାଲିୟର ମହାରାଜାଙ୍କୁ ଲଗାଇ ଗାନ୍ଧି-ଭଦ୍ରା ପରିବାରର ସମର୍ଥକ କମଳନାଥଙ୍କୁ ଗାଦିଚ୍ୟୁତ୍ କରିବାକୁ ଯାଉଛନ୍ତି।
ରାଜୀବଙ୍କ ଚକ୍ରାନ୍ତ
୧୯୮୪ରେ ଇନ୍ଦିରା ଗାନ୍ଧିଙ୍କ ହତ୍ୟା ପରେ,ଲୋକସଭା ନିର୍ବାଚନରେ ସାରା ଦେଶରେ କଂଗ୍ରେସ ସପକ୍ଷରେ ହାଓ୍ୱା ବୋହୁଥିଲା।ସେଥିପାଇଁ ରାଜମାତା ବିଜୟାରାଜେ ସିନ୍ଧିଆ,ସୁରକ୍ଷିତ ଆସନ ଗୋଓ୍ୱାଳିୟରରୁ ବାଜପେୟୀଙ୍କୁ ଲଢ଼ାଇ ଥିଲେ।କାରଣ ପୂର୍ବରୁ ରାଜମାତା ସିନ୍ଧିଆ ନିଜ ବିରାସତ୍ ଗୋଓ୍ୱାଲିୟର ୧୯୭୧ରେ ବାଜପେୟୀଙ୍କୁ ଲଢ଼ାଇ ଥିଲେ।ଆଉ ସେତେବେଳେ ଇନ୍ଦିରାଙ୍କ ଗରିବ ହଟାଓ ଅଭିଯାନକୁ ପାଣିଚିଆ କରି କଂଗ୍ରେସ ପ୍ରାର୍ଥୀ ଗୌତମ ଶର୍ମାକୁ ପରାସ୍ତ କରିଥିଲେ ବାଜପେୟୀ।
ମାଧବରାଓ-ରାଜୀବ
ସେଥିପାଇଁ ଇନ୍ଦିରାଙ୍କ ହତ୍ୟା ପରବର୍ତ୍ତି ସିମ୍ପାଥି ଫ୍ୟାକ୍ଟରରୁ ବର୍ତ୍ତିବା ପାଇଁ,୧୯୮୪ରେ ବାଜପେୟୀଙ୍କୁ ତାଙ୍କ ଜନ୍ମମାଟି ଗୋଓ୍ୱାଲିୟରରୁ ଲୋକସଭା ପଠାଇବାକୁ ଯୋଜନା କଲେ ରାଜମାତା ସିନ୍ଧିଆ।କିନ୍ତୁ ବିଜୟାରାଜେଙ୍କ ଯୋଜନାକୁ ପାଣିଚିଆ କରିଥିଲେ ତତ୍କାଳୀନ ପ୍ରଧାନମନ୍ତ୍ରୀ ରାଜୀବ ଗାନ୍ଧି।ବିଜୟାରାଜେଙ୍କ ପୁଅ ତଥା ଗୋଓ୍ୱାଲିୟର ମହାରାଜା ମାଧବରାଓ ସିନ୍ଧିଆ,ରାଜୀବଙ୍କ କଥାରେ କଂଗ୍ରେସରୁ ପ୍ରାର୍ଥୀ ହୋଇଥିଲେ।ଏପରିକି ଜନସଂଘରୁ ୧୯୭୧ରେ ସାଂସଦ ହୋଇଥିବା ମାଧବରାଓ,ନିଜ ପାରମ୍ପରିକ ଆସନ ଗୁନା ଛାଡି ଗୋଓ୍ୱାଲିୟର ସିଟରୁ ପ୍ରତିଦ୍ୱନ୍ଦିତା କରିଥିଲେ।ଆଉ ବାଜପେୟୀଙ୍କୁ ୧ଲକ୍ଷ ୭୫ ହଜାର ୫୯୪ ଭୋଟ ବ୍ୟବଧାନରେ ପରାସ୍ତ କରିଥିଲେ।ଯାହା ଥିଲା ଅଟଳଙ୍କ ଜୀବନର ସବୁଠୁ ବଡ଼ ନିର୍ବାଚନ ରାଜନୈତିକ ପରାଜୟ।
ଏବେ ମୋଦି,ନିଜ ରାଜନୈତିକ ମାର୍ଗଦର୍ଶକ ବାଜପେୟୀଙ୍କ ୩୬ବର୍ଷ ପୂର୍ବର, ସେହି ବିରାଟ ପରାଜୟର ପ୍ରତିଶୋଧ ନେଉଛନ୍ତି।ଗୋଟିଏ ପଟେ ସଞ୍ଜୟ ଗାନ୍ଧିଙ୍କ ସ୍କୁଲ ସାଙ୍ଗ ତଥା ସୋନିଆଙ୍କ ବିଶ୍ୱସ୍ଥ କମଳନାଥ ମୁଖ୍ୟମନ୍ତ୍ରୀ ପଦରୁ ହଟିବେ ! ଅନ୍ୟପଟେ ଗୋଓ୍ୱାଲିୟର ରାଜ ପରିବାର ପୁଣି ବିଜେପିକୁ ଫେରି ଆସୁଛନ୍ତି !
ଏହି ଷ୍ଟୋରୀକୁ ଲେଖିଛନ୍ତି-ବିଜୟ କେତନ ବରାଳ
