ବରଗଡ଼ ଜିଲ୍ଲା ଉପରେ ସାରା ଓଡ଼ିଶାର ଫୋକସ୍,କାରଣ ବିଜେପୁରରୁ ପ୍ରାର୍ଥୀ ହେଉଛନ୍ତି ନବୀନ ପଟ୍ଟନାୟକ। ଏମିତି ବି ବିଜୁ ଜନତା ଦଳ ଗଠନ ପରେ ଦଳ ଶଙ୍ଖ ଚିହ୍ନରେ ପ୍ରଥମ ବିଧାୟକ ବରଗଡ଼ରୁ ହିଁ ଜିତିଥିଲେ।୧୯୯୮ ଉପନିର୍ବାଚନରେ ଆନନ୍ଦ ଆଚାର୍ଯ୍ୟ,ବିଜେଡି ଟିକେଟରେ ଜିତି ପ୍ରଥମ ଥର ବିଧାୟକ ହୋଇଥିଲେ। ତେବେ ବିଶ୍ୱରେ ଧନୁଯାତ୍ରା ଏବଂ ସମ୍ବଲପୁରୀ ବସ୍ତ୍ର ହେଉଛି ବରଗଡ଼ର ପରିଚୟ। ରାଜନୈତିକ ଦୃଷ୍ଟିରୁ ମଧ୍ୟ ଓଡ଼ିଶା ପଲିଟିକ୍ସରେ ବରଗଡ଼ର ଦବଦବା ରହିଛି। କିନ୍ତୁ ବରଗଡ଼ ରାଜନୀତିକୁ କଣ୍ଟ୍ରୋଲ କରନ୍ତି କୁଲୁତା ବା ଚଷା ଏବଂ ବ୍ରାହ୍ମଣ। ୧୯୫୭ରୁ ସ୍ୱତନ୍ତ୍ର ନିର୍ବାଚନ ମଣ୍ଡଳୀ ଭାବେ ବରଗଡ଼ ଗଠନ ହେବା ଠାରୁ ଆଜି ଯାଏଁ ଏଠାରୁ କେବଳ କୁଲୁତା ଓ ବ୍ରାହ୍ମଣ ହିଁ ପ୍ରତିନିଧିତ୍ୱ କରିଛନ୍ତି।
କୁଲୁତା ରାଜ ଶେଷ
୧୯୯୦ରୁ ୨୦୧୪ ଭିତରେ ବରଗଡ଼ ଭୋଟର ଦେଖିଲେଣି ୬ଟି ନିର୍ବାଚନ ଏବଂ ଗୋଟିଏ ଉପନିର୍ବାଚନ। କୁଲୁତାଙ୍କ ଭାଉ କମିବାରୁ ୧୯୯୦ରୁ ବରଗଡ଼ ରାଜନୀତିକୁ କଣ୍ଟ୍ରୋଲ କରୁଛନ୍ତି ଆଚାର୍ଯ୍ୟ ପରିବାର।ପ୍ରଥମେ ପ୍ରସନ୍ନ ଆଚାର୍ଯ୍ୟ,ପରେ ତାଙ୍କ ବଡ଼ ଭାଇ ଆନନ୍ଦ ଆଚାର୍ଯ୍ୟ।ଏବେ ତାଙ୍କ ପୁତୁରା ଦେବେଶ ଆଚାର୍ଯ୍ୟ ବରଗଡ଼ ବିଧାନସଭାକୁ ପ୍ରତିନିଧିତ୍ୱ କରୁଛନ୍ତି। ସଂଯୋଗ ବଶତଃ ବିଜେପି ପ୍ରାର୍ଥୀ ଅଶ୍ୱନୀ ଷଡ଼ଙ୍ଗୀ ଏବଂ କଂଗ୍ରେସ ପ୍ରାର୍ଥୀ ନିପଣ ଦାଶ ମଧ୍ୟ ବ୍ରାହ୍ମଣ।

ସମାନ ସ୍ଥିତି ବରଗଡ଼ ଲୋକସଭା ଆସନରେ।ପ୍ରସନ୍ନ ଆଚାର୍ଯ୍ୟଙ୍କୁ ବିଜେଡି ପ୍ରାର୍ଥୀ କରିଥିବା ବେଳେ ବିଜେପି ଫେସ୍ ସୁରେଶ ପୂଜାରୀ ମଧ୍ୟ ବ୍ରାହ୍ମଣ। ଆଉ କଂଗ୍ରେସ ମଧ୍ୟ ଆସ୍ଥା ପ୍ରକଟ କରିଛି ବ୍ରାହ୍ମଣ ଯୁବକ ପ୍ରଦୀପ ଦେବେତାଙ୍କ ଉପରେ। ତେବେ ମୁଖ୍ୟମନ୍ତ୍ରୀ ବିଜେପୁରରୁ ପ୍ରାର୍ଥୀ ହେବା ଫଳରେ ବିଜେଡି ସ୍ଥିତି ଟିକେ ମଜଭୁତ ହେଲା ପରି ଲାଗୁଛି। ଏପରିକି ବରଗଡ଼ ଲୋକସଭା ଆସନ ଅଧିନରେ ଆସୁଥିବା ଅନ୍ୟ ୬ଟି ବିଧାନସଭା ଆସନରେ ବିଜେଡିର ଭଲ ପ୍ରାର୍ଥୀ ରହିଛନ୍ତି। ସେଥିପାଇଁ ରାଜନତୀତିର ପୋଖତ ଖେଳାଳି ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟ ପାଗ ଅନୁକୂଳ ଦେଖି ଭଲ ସ୍କୋର କରିବେ ବୋଲି ଚର୍ଚ୍ଚା ହେଉଛି।
ଅନ୍ୟପଟେ ବରଗଡ଼ ରାଜନୀତିକୁ ଚାଷୀ ଏବଂ ବୁଣାକାର ଯଥେଷ୍ଟ ପ୍ରଭାବିତ କରୁଛନ୍ତି। ଚାଷୀ ଆତ୍ମହତ୍ୟା ଓ ବୁଣାକାରଙ୍କ ସମସ୍ୟା ଶାସକ ଦଳକୁ କିଛି ମାତ୍ରାରେ ଅଡୁଆ ହୋଇପାରେ।ଗତ ପଞ୍ଚାୟତ ନିର୍ବାଚନରେ ବିଜେପି ବରଗଡ଼ରେ ଜିଲ୍ଲା ପରିଷଦ ଗଠନ କରିଛି। ସାରା ଦେଶରେ ବୋହୁଛି ପ୍ରଧାନମନ୍ତ୍ରୀ ମୋଦିଙ୍କ ହାଓ୍ୱା। ନମୋ ହାଓ୍ୱାରେ ସୁରେଶ ପୂଜାରୀ ବିଜୟୀ ହେବା କିଛି ଅସମ୍ଭବ ନୁହେଁ।
ତେବେ କୁଲୁତା ନେତା କୃପାସିନ୍ଧୁ ଭୋଇ ଏବଂ ତାଙ୍କ ପୁଅ ସଞ୍ଜୟ କଂଗ୍ରେସ ପ୍ରାର୍ଥୀ ହୋଇ ଏଠାରୁ ୫ଥର ସାଂସଦ ହୋଇଛନ୍ତି। କିନ୍ତୁ ଏବେ ବରଗଡ଼ ଅଣକଂଗ୍ରେସର ଗଡ଼ ହୋଇଗଲାଣି।ଏବେକାର କଂଗ୍ରେସ ପାର୍ଥୀ ପ୍ରଦୀପ ଦେବେତା ଯଦିଓ ବରଗଡ଼ ସହରର ବିଭିନ୍ନ ସାମାଜିକ ସଂଗଠନ ସହ ଜଡିତ ତେବେ ଅନ୍ୟ ଆସନରେ କଂଗ୍ରେସର ଭଲ ପ୍ରାର୍ଥୀ ନାହାଁନ୍ତି। ତେବେ କଣ ରାହୁଲ ଗାନ୍ଧିଙ୍କ ବରଗଡ଼ରେ ଜନସଭା ପ୍ରଦୀପ ଦେବେତାଙ୍କୁ ଲୋକସଭାକୁ ଏଣ୍ଟ୍ରି ଦେଇ ପାରିବ ତ? କିନ୍ତୁ ସେ ଯାହା ବି ହେଉ ତିନି ପ୍ରମୁଖ ରାଜନୈତିକ ଦଳ ମଧ୍ୟରୁ ଯେ କେହି ଜିତିଲେ ମଧ୍ୟ ବ୍ରାହ୍ମଣ ନେତାଙ୍କ ନିୟନ୍ତ୍ରଣରେ ବରଗଡ଼ ବିଧାନସଭା ଏବଂ ଲୋକସଭା ରହିବ।