ରାଜ୍ୟ କ୍ୟାବିନେଟରେ ୩୨ ପ୍ରସ୍ତାବକୁ ମଞ୍ଜୁରୀ ମିଳିଛି। ପ୍ରତି ପଞ୍ଚାୟତ ଏବଂ ସହରାଞ୍ଚଳର ପ୍ରତ୍ୟେକ ୱାର୍ଡରେ ମିଶନ ଶକ୍ତି ଭବନ ନିର୍ମାଣ କରିବା ସହ ମହିଳା ସ୍ୱୟଂ ସହାୟକ ଗୋଷ୍ଠୀର ବିଭିନ୍ନ ସାମଗ୍ରୀ ବିକିବାକୁ ୫ ଶହ ଟି ମିଶନ ଶକ୍ତି ବଜାର ସ୍ଥାପନ ହେବା ନେଇ ପ୍ରସ୍ତାବ ଆଗତ ହୋଇଛି। ଏଥିସହିତ ରାଜ୍ୟର ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ମୋହର ଲାଗିଛି ।ବିଶେଷତଃ ମହିଲା ସଶକ୍ତିକରଣ କ୍ଷେତ୍ରରେ ଏହା ସୁହାଇବ ବୋଲି ଚର୍ଚ୍ଚା ହେଉଛି।

• ଆସନ୍ତା ୫ ବର୍ଷ ପାଇଁ ମିଶନ ଶକ୍ତି ଯୋଜନାରେ ୪.୯୭୩ କୋଟି ଟଙ୍କା ଖର୍ଚ୍ଚ ହେବ। ୨୦୨୨-୨୩ରୁ ୨୦୨୬-୨୭ ମଧ୍ୟରେ ସ୍ୱୟଂ ସହାୟକ ଗୋଷ୍ଠୀକୁ ୫୦ ହଜାର କୋଟି ଟଙ୍କାର ବ୍ୟାଙ୍କ ଋଣ ପ୍ରଦାନ କରିବାର ବ୍ୟବସ୍ଥା କରାଯିବ। ଏସଏଚଜିଙ୍କୁ ୧୨୦୦ କୋଟି ଟଙ୍କାର ସୁଧ ରିହାତି ବ୍ୟବସ୍ଥା ମଧ୍ୟ ରହିବ।
• ଏସଏଚଜି ମହିଳାଙ୍କୁ ଦକ୍ଷତା ବୃଦ୍ଧି ଓ ଜୀବୀକା ନିର୍ବାହ ଉପରେ ତାଲିମ ଦିଆଯିବ।ଏଥିସହ ଲ୍ୟାଣ୍ଡ ବ୍ୟାଙ୍କ୍ ସ୍କିମ୍ ନାଁରେ ନୂତନ ଯୋଜନାକୁ ସରକାର ମଞ୍ଜୁରୀ ପ୍ରଦାନ କରିଛନ୍ତି। ଏହା ଦ୍ୱାରା ଏକ ଲକ୍ଷ ବିଶିଷ୍ଟ ଲ୍ୟାଣ୍ଡ ବ୍ୟାଙ୍କ ସୃଷ୍ଟି କରାଯିବାକୁ ଲକ୍ଷ୍ୟ ରଖାଯାଇଛି।
• ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଁ ଉଚ୍ଛେଦ ହୋଇଥିବା ୧୩ ମଠ ପାଇଁ ୧.୩ ଏକର ଜମି ଦେବେ ସରକାର।
• ବାରଙ୍ଗରେ ଟାଟା ପାୱାର କମ୍ପାନୀ ଲିମିଟେଡକୁ ଲିଜରେ ଦିଆଯାଇଥିବା ଜମିକୁ ଲ୍ୟାଣ୍ଡ ବ୍ୟାଙ୍କୁକୁ ଆଣିବା ପାଇଁ ଇଡକୋର ପ୍ରସ୍ତାବକୁ ଅନୁମୋଦନ ମିଳିଛି। ଏହି ଜମିକୁ ନୂଆ ଶିଳ୍ପ ଓ ଭିତିଭୂମି ପ୍ରକଳ୍ପକୁ ଆକର୍ଷିତ କରିବା ନିମନ୍ତେ ବ୍ୟବହାର କରାଯାଇପାରିବ। ଏଥିପାଇଁ ଇଡୋକକୁ ୬୨କୋଟି ୮୩ଲକ୍ଷ ଆର୍ଥିକ ସହାୟତା ଦେବେ ରାଜ୍ୟ ସରକାର।
• ରାଜ୍ୟରେ ଥିବା ୨୪ଟି ଘରୋଇ ଉଚ୍ଚ ପ୍ରାଥମିକ ସ୍କୁଲକୁ ସରକାରୀ ଅନୁଦାନ ମିଳିବ। ଉଚ୍ଚତର ବୃତିଗତ ବୈଷୟିକ ଶିକ୍ଷାଦାନ ନିମନ୍ତେ ଡ୍ରିମସକୁ ଏକକ ବିଶ୍ୱବିଦ୍ୟାଳୟରେ ପରିଣତ କରିବା ପ୍ରସ୍ତାବକୁ କ୍ୟାବିନେଟ ମଞ୍ଜୁରୀ ମିଳିଛି।
• ଜଳସମ୍ପଦର ବିଭିନ୍ନ ବିଭାଗର ବିଭିନ୍ନ ପ୍ରସ୍ତାବ ଉପରେ ବି କ୍ୟାବିନେଟ ମୋହର ବାଜିଛି। ଆଗାମୀ ପାଂଚ ବର୍ଷ ମଧ୍ୟରେ ଏକ ଲକ୍ଷ ଡିପ ବୋରୱେଲ ସ୍ଥାପନ କରିବାକୁ ସରକାର ସ୍ଥିର କରିଛନ୍ତି।
• ପାଣ୍ଡରାରେ ଆନିକଟ ନିର୍ମାଣ ହେବ। ଏହା ଦ୍ୱାରା ଭୁବନେଶ୍ୱର ମହାନଗର ନିଗମକୁ ପର୍ଯ୍ୟାପ୍ତ ଜଳ ଉପଲବ୍ଧ ହୋଇପାରିବ ।
• ଗଙ୍ଗାଧର ମେହେର ଉଠା ଜଳସେଚନ ପ୍ରକଳ୍ପକୁ ଜଳଯୋଗାଣ ପାଇ ଆହ୍ୱାନ କରାଯାଇଥିବା ଟେଣ୍ଡରକୁ କ୍ୟାବିନେଟ ଅନୁମୋଦନ ଦେଇଛି ।
• ଅନୁଗୁଳରେ ମେଗା ଆଲୁମିନିୟମ ପାର୍କ ପାଇଁ ଇଡକୋକୁ ୪୨୮ କୋଟି ଦେବା ପ୍ରସ୍ତାବକୁ କ୍ୟାବିନେଟ ମଞ୍ଜୁରୀ ଦେଇଛି ।
  ଏହି ସବୁ ଯୋଜନା କାର୍ଯ୍ୟକ୍ରମର ସଫଳ ରୁପାୟନ ରାଜ୍ୟକୁ ସମୃଦ୍ଧ କରିବ ବୋଲି ଅନୁମାନ କରାଯାଉଛି।