କେନ୍ଦ୍ରୀୟ ତଦନ୍ତକାରୀ ସଂସ୍ଥା ସିବିଆଇରେ ଚାଲିଥିବା ବିବାଦରେ ଲାଭାନ୍ୱିତ ହୋଇଛନ୍ତି ଓଡ଼ିଶା କ୍ୟାଡର୍ ଆଇପିଏସ୍. ଏମ୍. ନାଗେଶ୍ୱର ରାଓ । ୧୯୮୬ ବ୍ୟାଚ୍ ଆଇପିଏସ୍ ଏମ୍. ନାଗେଶ୍ୱର ରାଓଙ୍କୁ ସିବିଆଇ ନିର୍ଦ୍ଦେଶକ ଦାୟିତ୍ୱ ଦେଇଛନ୍ତି କେନ୍ଦ୍ର ସରକାର । ଏହା ପୂର୍ବରୁ ସେ ସିବିଆଇ ଯୁଗ୍ମ ନିର୍ଦ୍ଦେଶକ ଦାୟିତ୍ୱ ତୁଲାଇଛନ୍ତି । ସିବିଆଇ ନିର୍ଦ୍ଦେଶକ ଆଲୋକ ବର୍ମା ଓ ସ୍ୱତନ୍ତ୍ର ନିର୍ଦ୍ଦେଶକ ରାକେଶ ଅସ୍ଥାନାଙ୍କ ମଧ୍ୟରେ ଚାଲିଥିବା ବିବାଦରୁ ଫାଇଦା ମିଳିଛି ଏମ୍. ନାଗେଶ୍ୱର ରାଓଙ୍କୁ । ଆଲୋକ ବର୍ମା ଓ ରାକେଶ ଅସ୍ଥାନାଙ୍କୁ ଛୁଟିରେ ଯିବାକୁ କୁହାଯାଇଛି । ପ୍ରଧାନମନ୍ତ୍ରୀଙ୍କ ନେତୃତ୍ୱାଧୀନ କେନ୍ଦ୍ର କ୍ୟାବିନେଟ୍ ଆପଏଣ୍ଟମେଣ୍ଟ କମିଟି ନାଗେଶ୍ୱର ରାଓଙ୍କୁ ମଧ୍ୟବର୍ତ୍ତିକାଳୀନ ନିର୍ଦ୍ଦେଶକ ଦାୟିତ୍ୱ ଦେଇଛି।

ଉଭୟ ଆଲୋକ ବର୍ମା ଓ ରାକେଶ ଅସ୍ଥାନା ପରସ୍ପର ବିରୋଧରେ ଆଣିଥିଲେ ଦୁର୍ନୀତି ଅଭିଯୋଗ । ଏପରିକି ସିବିଆଇର ଜଣେ ଡିଏସପକି ଦେବେନ୍ଦ୍ର କୁମାରଙ୍କୁ ହାତକଡ଼ି ପିନ୍ଧାଇଥିଲେ ଆଲୋକ ବର୍ମାଙ୍କ ଟିମ୍ । ଲାଞ୍ଚ ଅଭିଯୋଗରେ ରାକେଶ ଅସ୍ଥାନାଙ୍କ ନାଁରେ ମାମଲା ବି ରୁଜୁ ହୋଇଛି । ଗିରଫରୁ ବର୍ତ୍ତିବା ପାଇଁ ରାକେଶ ଅସ୍ଥାନା ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଗିରଫଦାରୀରୁ ସାମୟିକ ଭାବରେ ବର୍ତ୍ତିଗଲେ ଗୁଜୁରାଟ କ୍ୟାଡର ଆଇପିଏସ୍ ରାକେଶ ଅସ୍ଥାନା । କିନ୍ତୁ କେନ୍ଦ୍ର ସରକାରଙ୍କୁ କୋପରୁ ବର୍ତ୍ତି ପାରିଲେ ନାହିଁ । ବିବାଦ ବଢୁଥିବାରୁ କେନ୍ଦ୍ରର ଆସ୍ଥା ହରାଇଲେ ଅସ୍ଥାନା । ବିରୋଧୀ କଂଗ୍ରେସ ଓ ବାମପନ୍ଥୀଙ୍କର ସିଧାସଳଖ ଟାର୍ଗେଟରେ ଆସିଗଲା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଓ ସିବିଆଇ ଅଫିସ । ଫଳରେ ବାଧ୍ୟ ହୋଇ ସିବିଆଇ ନିର୍ଦ୍ଦେଶକ ଆଲୋକ ବର୍ମା ଓ ସ୍ୱତନ୍ତ୍ର ନିର୍ଦ୍ଦେଶକ ରାକେଶ ଅସ୍ଥାନଙ୍କୁ ଛୁଟିରେ ଯିବା ପାଇଁ ନିର୍ଦ୍ଦେଶ ଦେଲେ କେନ୍ଦ୍ର ସରକାର । ତାଙ୍କ ସ୍ଥାନରେ ଏମ୍. ନାଗେଶ୍ୱର ରାଓଙ୍କୁ ସିବିଆଇର ମଧ୍ୟବର୍ତ୍ତିକାଳୀନ ନିର୍ଦ୍ଦେଶକ ଭାବରେ ନିଯୁକ୍ତି ମିଳିଛି ।ପୂର୍ବରୁ ଉମାଶଙ୍କର ମିଶ୍ର ଥିଲେ
ଏମ୍. ନାଗେଶ୍ୱର ରାଓଙ୍କ ନିଯୁକ୍ତି ଓଡ଼ିଶା ପାଇଁ ଏକ ଖୁସିର ଖବର । ଓଡ଼ିଶା ଅଗ୍ନିଶମ ବିଭାଗର ପୂର୍ବତନ ମୁଖ୍ୟ ଏମ୍. ନାଗେଶ୍ୱର ରାଓଙ୍କୁ ଆଜିଠାରୁ ମିଳିଲା ଦେଶର ସର୍ବୋଚ୍ଚ ତଦନ୍ତକାରୀ ସଂସ୍ଥାର ଟପ୍ ପୋଜିସନର ଦାୟିତ୍ୱ । ତାଙ୍କ ପୂର୍ବରୁ ଓଡ଼ିଆ ଆଇପିଏସ୍ ଉମାଶଙ୍କର ମିଶ୍ର ସିବିଆଇ ନିର୍ଦ୍ଦେଶକ ଭାବରେ କାର୍ଯ୍ୟଭାର ତୁଲାଇଛନ୍ତି । ୧୯୬୮ ବ୍ୟାଚ୍ ଆଇପିଏସ୍ ଉମାଶଙ୍କର ମିଶ୍ର ୨୦୦୩ ମସିହା ଡିସେମ୍ୱର ୬ ତାରିଖରେ ସିବିଆଇ ନିର୍ଦ୍ଦେଶକ ଭାବରେ ନିଯୁକ୍ତି ହୋଇଥିଲେ । ଏହା ମଧ୍ୟରେ ସିବିଆଇର ନମ୍ବର ଓ୍ୱାନ ଅଫିସର ପଦବୀ ରେସରେ ବି ଆସିଥିଲା ପ୍ରକାଶ ମିଶ୍ରଙ୍କ ନାଁ । ତେବେ ଓଡ଼ିଶା ପୋଲିସ ଗୃହ ନିର୍ମାଣ ବିଭାଗ ଅନିୟମିତିତାରେ ଫସି ଯାଇଥିଲେ ପ୍ରକାଶ ମିଶ୍ର । ଯଦିଓ ଓଡ଼ିଶା ସରକାରଙ୍କର ମନ୍ଦ ଉଦ୍ଦେଶ୍ୟ ପଦାରେ ପଡ଼ିଥିଲା, କିନ୍ତୁ ପ୍ରକାଶ ମିଶ୍ରଙ୍କୁ ସିବିଆଇ ନିର୍ଦ୍ଦେଶକ କରାଇ ନଦେବାରେ ବିଜେଡି ସରକାର ସଫଳ ହୋଇଥିଲେ । ଏବେ କିନ୍ତୁ ଏମ୍. ନାଗେଶ୍ୱର ରାଓଙ୍କ କ୍ଷେତ୍ରରେ ସେମିତି କୌଣସି ପ୍ରତିବନ୍ଧକ ଲାଗି ନାହିଁ । ଏମ୍. ନାଗେଶ୍ୱର ରାଓଙ୍କ ବିରୋଧରେ ମଧ୍ୟ ଆସିଥିଲା ଦୁର୍ନୀତିର ଅଭିଯୋଗ ।
ଚିଟଫଣ୍ଡ ଦୁର୍ନୀତି ତଦନ୍ତ ଆଗେଇବ ?
ଦିବଂଗତ ଆଇପିଏସ୍ ତଥା ପୂର୍ବତନ ଅଗ୍ନିଶମ ଡିଜି ବିନୟ ଭୂଷଣ ବେହେରା ଏମ୍. ନାଗେଶ୍ୱର ରାଓଙ୍କ ବିରୋଧରେ ଆଣିଥିଲେ ଡ୍ରେସ୍ କିଣାରେ ଅନିୟମିତତା ଅଭିଯୋଗ । ୨୦୧୪ ମସିହାରେ ଅଗ୍ନିଶମ ବିଭାଗର ୟେଲୋ ୟୁନିଫର୍ମ କିଣିବାରେ ଅନିୟମିତତା ହୋଇଛି ଓ ସେଥିରେ ଏମ୍. ନାଗେଶ୍ୱର ରାଓଙ୍କ ସଂପୃକ୍ତି ଅଭିଯୋଗ ଆଣିଥିଲେ ବିନୟ ଭୂଷଣ ବେହେରା । କିନ୍ତୁ ଅଭିଯୋଗ ପ୍ରମାଣିତ ହୋଇପାରି ନଥିଲା । ନାଗଶ୍ୱର ରାଓଙ୍କୁ ମିଳିଥିଲା କ୍ଲିନ୍ ଚିଟ୍ । ପ୍ରଥମେ ସିବିଆଇର ଯୁଗ୍ମ ନିର୍ଦ୍ଦେଶକ ଓ ଆଜିଠୁ ନିର୍ଦ୍ଦେଶକ ଭାବରେ କାର୍ଯ୍ୟ ଭାର ସମ୍ଭାଳିଛନ୍ତି ଏମ୍. ନାଗେଶ୍ୱର ରାଓ । ଏବେ ଅପେକ୍ଷା ଓଡ଼ିଶା କ୍ୟାଡର୍ ଆଇପିଏସ୍ ଏମ୍. ନାଗେଶ୍ୱର ରାଓ ଚିଟଫଣ୍ଡ ଦୁର୍ନୀତିକୁ ପୁଣି ଗତିଶୀଳ କରାଇବେ କି ?
ଏଥିସହ ପଢ଼ନ୍ତୁ: ୧୯୮୩ ଓ୍ୱାର୍ଲଡ କପ୍ ଟିମ୍ ଅଲରାଉଣ୍ଡର କୀର୍ତ୍ତିଙ୍କୁ କାଉଣ୍ଟର୍ କରିବେ ଧୋନି-ଗମ୍ଭୀର !