ବିଶ୍ୱକପରେ ଶ୍ରୀଲଙ୍କାକୁ ଓ୍ୱେଷ୍ଟଇଣ୍ଡିଜ-ଅଷ୍ଟ୍ରେଲିଆ ବୟକଟ୍ କରିଥିଲେ:ପାକିସ୍ତାନକୁ ଭାରତ…?

ପୁଲଓ୍ୱାମାରେ ଆତଙ୍କବାଦୀ ଆକ୍ରମଣକୁ ନେଇ ଦେଶରେ ଆକ୍ରୋଶ ବଢ଼ିବାରେ ଲାଗିଛି। ପାକିସ୍ତାନକୁ ସବୁ ସ୍ତରରେ ବୟକଟ୍ ପାଇଁ ଦାବି ହେଲାଣି। ଆଗାମୀ ବିଶ୍ୱକପ କ୍ରିକେଟରେ ପାକିସ୍ତାନ ସହ ମ୍ୟାଚ୍ ବୟକଟ ପାଇଁ ଦାବି ଉଠାଲାଣି। କ୍ରିକେଟର ବହୁ ଦିଗଜ ବି ସ୍ୱର ଉଠାଇଲେଣି। ପାକିସ୍ତାନକୁ ବିଶ୍ୱକପରେ ବୟକଟ ଦାବି ସୋସିଆଲ୍ ମିଡିଆରେ ତୀବ୍ର ହେଉଛି।ଇତିହାସ ପୃଷ୍ଠା ଓଲଟାଇଲେ ଜଣାପଡୁଛି, ପୂର୍ବରୁ ଅନେକ ଦେଶ ଅଲିମ୍ପିକ୍ସ ଠାରୁ ଆମ୍ଭ କରି ବିଶ୍ୱକପ୍ ପର୍ଯ୍ୟନ୍ତ ଇଭେଣ୍ଟକୁ ବହିଷ୍କାର କରିଛନ୍ତି।ପାକିସ୍ତାନ ସହ ଦ୍ୱିପାକ୍ଷିକ ସିରିଜକୁ ଦୀର୍ଘ ବର୍ଷ ହେବ ନା’ କରିଛି ଭାରତ। କେବଳ ଆଇସିସି ଟୁର୍ଣ୍ଣାମେଣ୍ଟରେ ଦୁଇ ଦେଶର ଟକ୍କର ଦେଖିବାକୁ ମିଳୁଛି।୨୦୧୩ ପରଠୁ ପାକିସ୍ତାନ ସହ କୌଣସି ଦ୍ୱିପାକ୍ଷିକ ସିରିଜ ଖେଳି ନାହିଁ ଟିମ୍ ଇଣ୍ଡିଆ। ଆଗାମୀ ମେ ୩୦ରୁ ଆରମ୍ଭ ହେବ କ୍ରିକେଟ ବିଶ୍ୱକପ୍। ଜୁନ୍ ୧୬ରେ ଭାରତ-ପାକିସ୍ତାନ ମ୍ୟାଚ୍ ରହିଛି। ଏବେ ଭାରତ ପାକିସ୍ତାନ ସହ ମ୍ୟାଚ୍ ଖେଳିବ କି ନାହିଁ ତାହା ବିରାଟ ପ୍ରଶ୍ନବାଚୀ। ଯଦିଓ ଏଯାଏଁ କୌଣସି ସଙ୍କେତ ଦେଇନାହିଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ ବା ବିସିସିଆଇ। ଦେଶର ସବୁଠୁ ପୁରୁଣା କ୍ରିକେଟ ସଂଗଠନ,କ୍ରିକେଟ କ୍ଲବ ଅଫ୍ ଇଣ୍ଡିଆ ପାକିସ୍ତାନକୁ ବିଶ୍ୱକପରେ ବହିଷ୍କାର କରାଯାଉ ବୋଲି ବିସିସିଆଇ ନିକଟରେ ଦାବି ରଖିଛି। କ୍ରିକେଟର ହରଭଜନ ସିଂହ କହିଛନ୍ତି, ଭାରତ ପାକିସ୍ତାନ ସହ ମ୍ୟାଚ୍ ନଖେଳିଲେ ବି ଚାମ୍ପିଅନ୍ ହୋଇପାରିବ। ପାକିସ୍ତାନ ବିପକ୍ଷ ମ୍ୟାଚ୍ ଟିମ୍ ଇଣ୍ଡିଆ ନଖେଳୁ। ସେହିପରି ବିସିସିଆଇର ପୂର୍ବତନ ସମ୍ପାଦକ ସଞ୍ଜୟ ପଟେଲ ବି ସମାନ ଦାବି ରଖିଛନ୍ତି। ତାଙ୍କ କହିବା କଥା, ଭାରତ ପାକିସ୍ତାନ ସହ ମ୍ୟାଚ ଖେଳିଲେ ଏକଥା ବୁଝାଯିବ ଯେ, ଦେଶଠାରୁ ବଡ଼ ଖେଳ।
ଭାରତ-ପାକ୍ ମୁକାବିଲା୨୦୧୩ ପରେ ଦୁଇ ପାରମ୍ପରିକ ପ୍ରତିଦ୍ୱନ୍ଦୀ କେବଳ ଏସିଆ କପରେ ପାଞ୍ଚ ଥର ମୁହାଁମୁହିଁ ହୋଇଛନ୍ତି। ଦୁଇ ଥର ଚାମ୍ପିଅନ୍ସ ଟ୍ରଫି,ଦୁଇ ଥର ଟି-ଟ୍ୱେଣ୍ଟି ବିଶ୍ୱକପ୍ ଓ ଥରେ ଦିନିକିଆ ବିଶ୍ୱକପରେ ପାକିସ୍ତାନକୁ ଭେଟିଛି ଟିମ୍ ଇଣ୍ଡିଆ। ଗତବର୍ଷ ସେପ୍ଟମ୍ୱର ମାସରେ ଶେଷ ଥର ୟୁଏଇରେ ଆୟୋଜିତ ଏସିଆ କପରେ ଦୁଇ ଥର ସାମନା ସାମନି ହୋଇଥିଲେ ଭାରତ-ପାକିସ୍ତାନ।
ଦକ୍ଷିଣ ଆଫ୍ରିକାକୁ ଓ୍ୱାକ ଓଭର ଦେଇଥିଲା ଭାରତ
ଭାରତ ଏଯାଏଁ ପାକିସ୍ତାନକୁ କୌଣସି ବଡ଼ ଇଭେଣ୍ଟରେ ବୟକଟ କରିନାହିଁ। କିନ୍ତୁ ନିଜ ନୀତି ଓ ନୈତିକତାରେ କେବେ ସାସିଲ କରେ ନାହିଁ ବୋଲି ପୂର୍ବରୁ ଏମିତି ବାର୍ତ୍ତା ଦେଇଛି ବିଶ୍ୱବାସୀଙ୍କୁ। ୧୯୭୪ରେ ଭାରତ ଡେଭିସ୍ କପ୍ ଟେନିସ୍ ଫାଇନାଲରେ ପ୍ରଥମ ଥର ପହଞ୍ଚିଥିଲା।ସେତେବେଳେ ବର୍ଣ୍ଣ ବିଦ୍ୱେଷ ନୀତିକୁ ବିରୋଧ କରି ଦକ୍ଷିଣ ଆଫ୍ରିକା ସହ ନଖେଳିବାକୁ ନିଷ୍ପତ୍ତି ନେଇଥିଲା ଭାରତ। ଟେନିସରେ ସବୁଠୁ ବଡ଼ ଟ୍ରଫି ଜିତିବାର ଗୌରବ ହାତଛଡ଼ା କରିଥିଲା। କାରଣ ନିଜ ନୀତିରେ ସାସିଲ କରିବାକୁ ଚାହିଁ ନଥିଲା। ଶ୍ରୀଲଙ୍କାରେ ଖେଳିବାକୁ ମନା କରିଥିଲେ ଅଷ୍ଟ୍ରେଲିଆ-ଓ୍ୱେଷ୍ଟଇଣ୍ଡିଜ
୧୯୯୬ କ୍ରିକେଟ ବିଶ୍ୱପକର ଆୟୋଜକ ଥିଲେ ଭାରତ-ଶ୍ରୀଲଙ୍କା-ପାକିସ୍ତାନ। ସେତେବେଳେ ଶ୍ରୀଲଙ୍କାରେ ଏଲଟିଟିଇ ଆତଙ୍କରାଜ ଚାଲିଥିଲା।ସୁରକ୍ଷା କାରଣରୁ ଶ୍ରୀଲଙ୍କାରେ ମ୍ୟାଚ୍ ଖେଳିବାକୁ ମନା କରିଦେଇଥିଲେ ଓ୍ୱେଷ୍ଟଇଣ୍ଡିଜ ଓ ଅଷ୍ଟ୍ରେଲିଆ। ଶ୍ରୀଲଙ୍କାର ବୟକଟ୍ ରୋକିବା ପାଇଁ ଭାରତ-ପାକିସ୍ତାନ ଜଏଣ୍ଟ ଟିମ୍ ଗଠନ କରିଥିଲେ।
୬୬ ଦେଶ ମସ୍କୋ ଅଲିମ୍ପିକ୍ସକୁ ବୟକଟ୍ କରିଥିଲେ
୧୯୮୦ରେ ତତ୍କାଳୀନ ସୋଭିଏତ୍ ସଂଘରେ(ରୁଷ) ହୋଇଥିବା ମସ୍କୋ ଅଲିମ୍ପିକ୍ସକୁ ଆମେରିକା ସମେତ ୬୬ଟି ଦେଶ ବହିଷ୍କାର କରିଥିଲେ। ସେତେବେଳେ ସୋଭିଏତ ସଂଘର ସେନା ଆଫଗାନିସ୍ତାନରେ ଥିଲେ। ଆମେରିକା ସମେତ ବିଭିନ୍ନ ଦେଶ ଅଭିଯୋଗ କରିଥିଲେ,ରୁଷ ସେନା ଆଫଗାନିସ୍ତାନ ସରକାରଙ୍କୁ ଅପଦସ୍ତ କରିବା ସହ ଦେଶଦ୍ରୋହୀଙ୍କୁ ସମର୍ଥନ କରୁଛନ୍ତି।ସେହିପରି ୧୯୮୪ରେ ସୋଭିଏତ ସଂଘ ସମେତ୧୮ଚି ଦେଶ ଲସ୍ ଆଞ୍ଜେଲ୍ସ ଅଲିମ୍ପିକ୍ସକୁ ବୟକଟ କରିଥିଲେ।