କଂଗ୍ରେସର ଜାତୀୟ ମୁଖପାତ୍ର ତଥା ମିଡିଆ ସେଲର ଆବାହକ ପ୍ରିୟଙ୍କା ଚତୁର୍ବେଦୀ ଦଳରୁ ଇସ୍ତଫା ଦେଇଛନ୍ତି।ସେ ନିଜର ଇସ୍ତଫାପତ୍ର କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧିଙ୍କ ନିକଟକୁ ପଠାଇ ଦେଇଛନ୍ତି।ତେବେ ଇସ୍ତଫାର ଦୁଇ ଘଣ୍ଟା ମଧ୍ୟରେ ଶିବସେନାରେ ସାମିଲ ହୋଇଛନ୍ତି ପ୍ରିୟଙ୍କା।ଉଦ୍ଧବ ଠାକେରଙ୍କ ଉପସ୍ଥିତିରେ ପ୍ରିୟଙ୍କା,ଶିବସେନାରେ ସାମିଲ ହୋଇଛନ୍ତି। ନିର୍ବାଚନ ସମୟରେ କଂଗ୍ରେସର ଟେଲିଭିଜନ ଫେସ୍ ଭାବେ ଜଣାଶୁଣା ପ୍ରିୟଙ୍କା ଦଳ ଛାଡିବା କଂଗ୍ରେସ ପାଇଁ ନିଶ୍ଚିତ ଚିନ୍ତାଜନକ।ତେବେ ଉତ୍ତରପ୍ରଦେଶର କିଛି ଦଳୀୟ କର୍ମୀଙ୍କ ଉପରୁ ନିଲମ୍ବନ ଆଦେଶ ହଟାଇବାକୁ ବିରୋଧ କରି କଂଗ୍ରେସ ଛାଡିଛନ୍ତି ପ୍ରିୟଙ୍କା।ଶୁଣାଯାଉଛି ୟୁପିର ମଥୁରା ଲୋକସଭା ଆସନରେ ପ୍ରାର୍ଥୀ ହେବାକୁ ଚାହୁଁଥିଲେ ପ୍ରିୟଙ୍କା। ଦଳ ତାଙ୍କୁ ପ୍ରାର୍ଥୀ ନକରିବାରୁ ପ୍ରିୟଙ୍କା କଂଗ୍ରେସ ଛାଡିଲେ ବୋଲି ଚର୍ଚ୍ଚା ହେଉଛି।ତେବେ ୟୁପିର ମୂଳନିବାସୀ ପ୍ରିୟଙ୍କା,ଏବେ ମୁମ୍ବାଇରେ ରହୁଥିବାରୁ ଶିବସେନାକୁ ନିଜ ପାଇଁ ବାଛି ଥାଇପାରନ୍ତି।

ଗତ କିଛି ଦିନ ପୂର୍ବରୁ ମଥୁରାରେ ଏକ ସାମ୍ବାଦିକ ସମ୍ମିଳନୀ କରୁଥିବା ବେଳେ କିଛି କଂଗ୍ରେସ କର୍ମୀ,ପ୍ରିୟଙ୍କାଙ୍କ ପ୍ରତି ଅଶାଳୀନ ମନ୍ତବ୍ୟ ଦେଇଥିଲେ।ଫଳରେ ସେହି କର୍ମୀଙ୍କୁ କଂଗ୍ରେସ ଦଳରୁ ନିଲମ୍ବନ କରା ଯାଇଥିଲା।କିନ୍ତୁ ପରେ ସେମାନଙ୍କୁ ପୁଣି ଦଳକୁ ଫେରାଇ ଆଣିବାରୁ ପ୍ରିୟଙ୍କା ଅସନ୍ତୁଷ୍ଟ ହୋଇଥିଲେ।ଅସନ୍ତୋଷକୁ ଅପ୍ରେଲ ୧୭ରେ ନିଜ ଟୁଇଟର ହ୍ୟାଣ୍ଡଲରେ ପ୍ରିୟଙ୍କା ଲେଖଥିଲେ ଯେ“ସେ ଦଳ ପାଇଁ କଠିନ ପରିଶ୍ରମ କରୁଛନ୍ତି।କିନ୍ତୁ କଂଗ୍ରେସରେ ଗୁଣ୍ଡାଙ୍କୁ ପ୍ରାଧାନ୍ୟ ମିଳୁଛି।ଦଳ ପାଇଁ ମୁଁ ପଥର ମାଡ଼ ଏବଂ ଗାଳି ସହିଛି।କିନ୍ତୁ ଦଳୀୟ ନେତା ମୋତେ ଧମକ ଦେଉଛନ୍ତି। ଅପରପକ୍ଷରେ ଧମକ ଦେଉଥିବା ବ୍ୟକ୍ତିଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ନିଆ ଯାଉନାହିଁ”।
ତେବେ ଓଡ଼ିଶାରେ କଂଗ୍ରେସ ପ୍ରାର୍ଥୀଙ୍କ ପାଇଁ ପ୍ରଚାର କରିଥାନ୍ତେ ପ୍ରିୟଙ୍କା ଚତୁର୍ବେଦୀ।ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ନିର୍ବାଚନ ମଣ୍ଡଳୀରେ ମଧ୍ୟ ସେ ପ୍ରଚାର କରିଥାନ୍ତେ।