୨୦ ବର୍ଷ ପୂର୍ବର ଏକ ଛାତିଥରା ଘଟଣା, ସମଗ୍ର ଭାରତବାସୀଙ୍କୁ ଚକିତ କରିଥିଲା।ସେହି ଲୋମହର୍ଷଣକାରୀ ଘଟଣାକୁ ଭୁଲିବା କେବେବି ସମ୍ଭବପର ନୁହେଁ। ସଂସଦ ଭବନ ଉପରେ ଆତଙ୍କବାଦୀଙ୍କ ଆକ୍ରମଣ ନୃଶଂସତାର ସୀମା ଟପିଥିଲା।୨୦୦୧ ଡିସେମ୍ବର ୧୩’ରେ ପାକିସ୍ତାନର ୫ ଆତଙ୍କବାଦୀ ଦିଲ୍ଲୀରେ ଗଣତନ୍ତ୍ରର ପବିତ୍ର ସ୍ଥାନ ‘ସଂସଦ ଭବନ’ ଉପରେ ଲଗାତର ଗୁଳି କରିଥିଲେ।
ଆତଙ୍କବାଦୀଙ୍କୁ ଜବାବ
ସଂସଦ ଭବନରେ ରକ୍ତକାଣ୍ଡ
୨୦୦୧ର ଶୀତକାଳୀନ ଅଧିବେଶନ ଚାଲିଥିଲା।ହଠାତ୍ ଏକ ଧଳା କାରରେ ସଶସ୍ତ୍ର ଆତଙ୍କବାଦୀମାନେ ସଂସଦ ଭବନକୁ ପ୍ରବେଶ କରିବାକୁ ଉଦ୍ୟମ କରିଥିଲେ। କିନ୍ତୁ ମୁତୟନ ସୁରକ୍ଷା କର୍ମୀଙ୍କ ପାଇଁ ସଫଳ ହୋଇ ପାରିନଥିଲେ।ସେହି ସମୟରେ ସଂସଦ ଭବନ ଭିତର ଗେଟ ସଂପର୍କରେ ଜାଣି ନପାରିବାରୁ ଆତଙ୍କବାଦୀମାନେ ଉପରାଷ୍ଟ୍ରପତିଙ୍କ ଗାଡ଼ିକୁ ଧକ୍କା ଦେଇଥିଲେ।ଫଳରେ ସୁରକ୍ଷାକର୍ମୀଙ୍କୁ ସନ୍ଦେହ ହୋଇଥିଲା।ସୁରକ୍ଷା କର୍ମୀମାନେ ବୁଝିବା ପୂର୍ବରୁ କାର ଭିତରୁ ବାହାରି ଆତଙ୍କବାଦୀମାନେ ଗୁଳି ଚଳାଇ ଥିଲେ।ଏହା ପରେ ସଂସଦ ଭବନର ସୁରକ୍ଷା ଦାଯିତ୍ୱରେ ଥିବା ସିଆରପିଏଫ୍ ଯବାନମାନେ ମଧ୍ୟ ଗୁଳି କରିଥିଲେ।ସେହି ସମୟରେ ଅନେକ ସାଂସଦ ଓ ମନ୍ତ୍ରୀ ଉପସ୍ଥିତ ଥିଲେ।ତତ୍କାଳୀନ ଗୃହମନ୍ତ୍ରୀ ଲାଲକୃଷ୍ଣ ଆଡଭାନୀ ମଧ୍ୟ ସଂସଦ ପରିସରରେ ଥିଲେ। ତାଙ୍କୁ ସୁରକ୍ଷା ଅଧିକାରୀମାନେ ସୁରକ୍ଷିତ ସ୍ଥାନକୁ ନେଇ ଯାଇଥିଲେ।
ମାଷ୍ଟର ମାଇଣ୍ଡ ଅଫଜଲ୍
ଫାଶି ଖୁଣ୍ଟରେ ଝୁଲିଲା ମାଷ୍ଟର ମାଇଣ୍ଡ
ଆକ୍ରମଣର ମାଷ୍ଟର ମାଇଣ୍ଡ ଆଫଜଲ ଗୁରୁକୁ ୨୦୧୩ ଫେବୃଆରୀ ୯’ରେ ଦିଲ୍ଲୀର ତିହାର ଜେଲରେ ଫାଶୀ ଦିଆ ଯାଇଥିଲା। ପାକିସ୍ତାନ ଅଧିକୃତ କଶ୍ମୀରର ମୁଜଫରାବାଦରେ ଆଇଏସଆଇର ଶିବିରରେ ସେ ତାଲିମ ନେଇଥିଲା।ସେହି ଆକ୍ରମଣରେ ୯ ଯବାନ ସହିଦ ହୋଇଥିଲେ।ସହିଦ ଯବାନମାନେ ହେଲେ ପି ଯାଦବ, ମତବର ସିଂହ, କମଲେଶ କୁମାରୀ, ନାନକ ଚନ୍ଦ, ରାମପାଲ, ଓମପ୍ରକାଶ ଘନଶ୍ୟାମ, ବିଜେନ୍ଦର ସିଂହ, ଦେଶରାଜ ପ୍ରମୁଖ। ସଂସଦର ସୁରକ୍ଷା ପାଇଁ ତାଙ୍କର ବଳୀଦାନ ସର୍ବଦା ସ୍ମରଣୀୟ।
