ବିଭିନ୍ନ ସର୍ଭେ ସଂସ୍ଥାର ରିପୋର୍ଟ କହୁଛି ଦେଶରେ ପୁଣି ଏନଡିଏ ସରକାର ଗଠନ ହେବ।ଓଡ଼ିଶାରେ ମଧ୍ୟ ବିଜେପିର ପ୍ରଦର୍ଶନ ଭଲ ରହିବ ବୋଲି ଅନେକ ମିଡିଆ ହାଉସର ଓପିନିଅନ୍ ପୋଲ କହୁଛି।ବିଶେଷ କରି ଉପକୂଳ ଓଡ଼ିଶାରେ ବିଜେଡିକୁ ବଡ଼ ଝଟକା ଲାଗିପାରେ ବୋଲି ପୂର୍ବାନୁମାନ ହେଉଛି।ତେବେ ବୈଜୟନ୍ତ ପଣ୍ଡାଙ୍କ ଯୋଗୁ କେନ୍ଦ୍ରାପଡ଼ା ଫୋକସରେ ରହୁଥିବା ବେଳେ,ଗଣମାଧ୍ୟମର ଫୋକସରେ ରହିଛି ପୁରୀ।ପ୍ରଥମେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୁରୀରୁ ପ୍ରାର୍ଥୀ ହେଉଛନ୍ତି ବୋଲି ଚର୍ଚ୍ଚା ହେଲା।କିନ୍ତୁ ଜାତୀୟ ଗଣମାଧ୍ୟମରେ ବିଜେପିର ମୁହଁ ସମ୍ୱିତ ପାତ୍ର ହେଲେ ପ୍ରାର୍ଥୀ।ସମ୍ବିତ ପାତ୍ର କହିଲେ ଜଗନ୍ନାଥ ମୋତେ ଡାକିଛନ୍ତି,ମୋଦି ମୋତେ ପଠାଇଛନ୍ତି। ଏବେ ବିଜେପି ସଭାପତି ଅମିତ ଶାହ,ସମ୍ବିତଙ୍କ ପାଇଁ ବଡ଼ଦାଣ୍ଡରେ ରୋଡ ସୋ କରିଛନ୍ତି।
ଏମିତି ବି ଦିଲ୍ଲୀ ଦରବାରରେ ପୁରୀ ସାଂସଦଙ୍କ ସର୍ବଦା ଗୁରୁତ୍ୱ ରହିଛି।ପୁରୀର ପ୍ରଥମ ସାଂସଦ ଲୋକନାଥ ମିଶ୍ର ନିଜ ସଂସଦୀୟ କ୍ଷେତ୍ରର ଗୁରୁତ୍ୱ ବଢ଼ାଇବାର ମୂଳଦୁଆ ପକାଇ ଥିଲେ।ପରବର୍ତ୍ତି ସମୟରେ ଲୋକନାଥ ମିଶ୍ରଙ୍କୁ କେନ୍ଦ୍ର ସରକାର ରାଜ୍ୟପାଳ ଭାବେ ନିଯୁକ୍ତ କରିଥିଲେ। ଆସାମଏବଂ ନାଗାଲାଣ୍ଡର ରାଜ୍ୟପାଳ ହୋଇଥିବା ଲୋକନାଥ ମିଶ୍ରଙ୍କ ପୁଅ ପିନାକୀ ମଧ୍ୟ ପୁରୀରୁ ୩ଥର ସାଂସଦ ହେଲେ।ପୂର୍ବତନ ପ୍ରଧାନମନ୍ତ୍ରୀ ପି.ଭି.ନରସିଂହ ରାଓଙ୍କ ଅତି ଘନିଷ୍ଠ ପିନାକୀ ମିଶ୍ରଙ୍କ ଦିଲ୍ଲୀ ପଲିଟିକ୍ସରେ ଭାରି ଖାତିର ରହିଛି।ସେହିଭଳି ପୁରୀର ଦ୍ୱିତୀୟ ସାଂସଦ ଚିନ୍ତାମଣି ପାଣିଗ୍ରାହୀ ମଣିପୁରରେ ରାଜ୍ୟପାଳ ହୋଇଥିଲେ।ଆଉ ଏକମାତ୍ର ଓଡ଼ିଆ ଭାବେ ଲୋକସଭାର ବାଚସ୍ପତି ହୋଇଥିବା ରବି ରାୟ,୧୯୬୭ରେ ପ୍ରଥମେ ପୁରୀ ଆସନରୁ ବିଜୟୀ ହୋଇଥିଲେ।
ସେପେଟେ ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ନୀଳମଣି ରାଉତରାୟ୧୯୮୯ରେ ପୁରୀରୁ ଜିତି ଭି.ପି.ସିଂହଙ୍କ କ୍ୟାବିନେଟରେ ମନ୍ତ୍ରୀ ହୋଇଥିଲେ।ଏହି ଧାରା ୨୦୦୯ପର୍ଯ୍ୟନ୍ତ ବଳବତ୍ତ ରହିଲା।ପୁରୀକୁ ୪ଥର ପ୍ରତିନିଧିତ୍ୱ କରିଥିବା ବ୍ରଜକିଶୋର ତ୍ରିପାଠୀ,ଅଟଳ ବିହାରୀ ବାଜପେୟୀଙ୍କ ମନ୍ତ୍ରୀ ପରିଷଦରେ ସ୍ଥାନ ପାଇଥିଲେ।ତେଣୁ କେନ୍ଦ୍ରରେ ଯଦି ପୁଣି ବିଜେପି ସରକାର ଆସେ ଏବଂ ମୋଦିଙ୍କ ବିଶ୍ୱସ୍ଥ ସମ୍ବିତ ବିଜୟୀ ହେଉଛନ୍ତି ତେବେ ସେ ମନ୍ତ୍ରୀ ହୋଇପାରନ୍ତି।
ସେପେଟେ ନିଜର ରାଜନୈତିକ ଭବିଷ୍ୟତ ସନ୍ଧାନରେ ପୁରୀ ଆସିଥିବା ସମ୍ବିତ,ଆରମ୍ଭରୁ ମୋଦିଙ୍କ ଫର୍ମୁଲା ଆପଣାଇଛନ୍ତି।ଗତ ୨୪ତାରିଖ ସନ୍ଧ୍ୟାରେ ଦିଲ୍ଲୀରୁ ଆସି ଗଜପତିଙ୍କ ଭୁବନେଶ୍ୱର ସହିଦ ନଗର ବାସଭବନକୁ ଯାଇଥିଲେ ସମ୍ବିତ।କାରଣ ବିଜେପି ପ୍ରଚାର କମିଟି ଅଧ୍ୟକ୍ଷ ହେବା ପରେ ୧୬ଜୁଲାଇ ୨୦୧୩ରେ ମୋଦି ପୁରୀ ଆସି ଜଗନ୍ନାଥଙ୍କ ପ୍ରଥମ ସେବକ ଗଜପତି ମହାରାଜାଙ୍କୁ ଭେଟି ସମର୍ଥନ ଲୋଡ଼ିଥିଲେ।ତାହେଲେ ମୋଦିଙ୍କ ଭଳି ସମ୍ବିତ ପାତ୍ର ସଫଳ ହୋଇ ଦିଲ୍ଲୀ ଦରବାରରେ ପୁରୀର ଖାତିର ବଢ଼ାଇବେ!
ପଢ଼ନ୍ତୁ-123ରୁ 47ରେ ପହଞ୍ଚିଥିବା ଜନତା ଦଳର ଭୁଲ ନିଷ୍ପତ୍ତିକୁ ଦୋହରାଉଛି କି BJD?
