ଅମାନିଆ IPS:ଗୃହ ବିଭାଗ OSD

0 Comments read Uncategorized

ଅମାନିଆ IPS ଅଫିସରଙ୍କର ଶନି ଦଶା ପଡିଛି । 2024 ନିର୍ବାଚନ ସମୟରେ Election Commissionerଙ୍କ ଛାଟରେ ସାବାଡ୍ ହୋଇଥିଲେ, ଡି.ଏସ୍ କୁଟ୍ଟେ ଏବଂ ଆଶିଷ ସିଂ ।ଆଉ ଏବେ ବେକାବୁ IPS ଅଫିସରଙ୍କୁ ସାବାଡ୍ କରିବା ମୁଡରେ ଅଛନ୍ତି ବିଜେପି ସରକାର। ଇଚ୍ଛା ଥାଉ କି ନଥାଉ, ଅମାନିଆ IPS ଅଧିକାରୀଙ୍କୁ ବିରୁଦ୍ଧରେ ଆକ୍ସନ ନେଉଛନ୍ତି ମୋହନ ମାଝୀଙ୍କ ସରକାର। ଏବେ ଓଡ଼ିଶା ସରକାରଙ୍କ ପନିସିମେଣ୍ଟର ଛାଟ ପଡିଛି DG ପାହ୍ୟାର IPS ସୁଶାନ୍ତ ନାଥଙ୍କ ଉପରେ । ଜେଲ୍ ଡିଜିରୁ ଗୃହ ବିଭାଗର ଅଫିସର ଅନ୍ ସ୍ପେଷାଲ ଡ୍ୟୁଟି ବା ଓଏସଡି ଭାବେ ସୁଶାନ୍ତ ନାଥଙ୍କର ବଦଳି ହୋଇଛି। ଚୌଦାର ଜେଲର ପୂର୍ବତନ ଜେଲର ସନ୍ତୋଷିନୀ ଦାଶଙ୍କୁ ହୋଟେଲକୁ ଡାକି ଅଡୁଆରେ ଫସିଛନ୍ତି ସୁଶାନ୍ତ ନାଥ। ସନ୍ତୋଷିନୀ ଦାସଙ୍କୁ ଯୌନ ନିର୍ଯାତନା ଦେଉଥିବା ମାମଲାରେ ଛନ୍ଦି ହୋଇଛନ୍ତି ନାଥ ବାବୁ। 1993 ବ୍ୟାଚର IPS ସୁଶାନ୍ତ ନାଥ ଗିରଫ ହେବା ଭୟରେ ହାଇକୋର୍ଟରେ ଆଗୁଆ ଜାମିନ ଆବେଦନ କରିଛନ୍ତି । ତେବେ ଓଡ଼ିଶା ସରକାର ସୁଶାନ୍ତ ନାଥଙ୍କୁ ବାନ୍ଧିବେ କି ନାହିଁ, ତାହ ତ ସ୍ପଷ୍ଟ ହୋଇନି, କିନ୍ତୁ ଗୃହ ବିଭାଗକୁ ବଦଳି କରି ମୋହନ ସରକାର ଜଣାଇଦେଲେ ଯେ ନାଥ ବାବୁଙ୍କ ଅପରାଧ କ୍ଷମା ପାଇଁ ଯୋଗ୍ୟ ନୁହେଁ । ଯାହା ସୁଶାନ୍ତ ନାଥଙ୍କ କ୍ୟାରିୟର ଉପରେ ପ୍ରଭାବ ପକାଇପାରେ ।

ଗୃହ ବିଭାଗର OSD ହେବାର ଅର୍ଥ ହେଉଛି, ସେହି IPSଙ୍କ ଭାଗ୍ୟ ଆକାଶରେ ନିଶ୍ଚିତ କଳାବାଦଲ ଘୋଟି ଆସିଛି । ଗତ ସାଢ଼େ 4 ମାସ ପୂର୍ବରୁ IPS ଦୟାଲ ଗଙ୍ଗାଓ୍ୱାର ନିଲମ୍ବିତ ହୋଇଛନ୍ତି । ଜୁନ୍ 18 ତାରିଖରେ ଗୃହ ବିଭାଗର OSD ଥିବା ଦୟାଲ ଗଙ୍ଗାଓ୍ୱାରଙ୍କୁ ମୋହନ ସରକାର ସସପେଣ୍ଡ କରିଥିଲେ । GRP କନେଷ୍ଟବଲ୍ ସୌମ୍ୟରଞ୍ଜନ ଦାସଙ୍କ ହତ୍ୟା ପରେ ଦୟାଲ ଗଙ୍ଗାଓ୍ୱାରଙ୍କୁ ଗୃହ ବିଭାଗକୁ OSD ଭାବେ ବଦଳି କରାଯାଇଥିଲା । ରେଲଓ୍ୱେ ADG ଥିବା ଦୟାଲ ଗଙ୍ଗଓ୍ୱାର, ବେଆଇନ ଭାବେ ସୌମ୍ୟଙ୍କ ପରି 7ଜଣ କନଷ୍ଟେବଲଙ୍କୁ ନିଜର ବ୍ୟକ୍ତିଗତ କାମରେ ଲଗାଉଥିଲେ । କନଷ୍ଟେବଲ ସୌମ୍ୟଙ୍କ ହତ୍ୟା ପରେ ଚାପରେ ଥିବା ମୋହନ ମାଝୀଙ୍କ ସରକାର ଦୟାଲ ଗଙ୍ଗୱାରଙ୍କୁ ପ୍ରଥମେ ଗୃହ ବିଭାଗର OSD ଭାବେ ବଦଳି କଲେ। ପରେ ତାଙ୍କୁ ଚାକିରିରୁ ନିଲମ୍ବିତ କରିଥିଲା । କେବଳ ଏତିକି ନୁହେଁ, ନବୀନ ପଟ୍ଟନାୟକଙ୍କ ସରକାର ସମୟରେ 2019 ନଭେମ୍ବର 20 ତାରିଖରେ କ୍ରାଇମ୍‌ବ୍ରାଞ୍ଚ ଡିଜି ବିଜୟ କୁମାର ଶର୍ମାଙ୍କୁ ହୋମ୍ ଡିପାର୍ଡମେଣ୍ଟ ଓଏସ୍‌ଡି ଭାବେ ବଦଳି କରାଯାଇଥିଲା। ଓଡ଼ିଶାର ପୋଲିସ ମହାନିର୍ଦ୍ଦେଶକ ହେବାର ସ୍ୱପ୍ନ ଦେଖୁଥିବା ବିଜୟ ଶର୍ମାଙ୍କ ଆଶା ଅଧୁରା ହୋଇ ରହିଗଲା।ଆଉ ଏବେ ମୋହନ ସରକାର ସୁଶାନ୍ତ ନାଥଙ୍କୁ କେବଳ ହୋମ୍ ଡିପାର୍ଟମେଣ୍ଟର ଓଏସଡି କରି ବଦଳି କରିନାହାନ୍ତି ।ଇନଡାଇରେକ୍ଟଲି ତାଙ୍କୁ ଡିଜିପି ରେସରୁ ହଟେଇ ଦେଇଛନ୍ତି।
ଏ ଷ୍ଟୋରୀ ଲେଖିଛନ୍ତି-ବିଜୟ କେତନ ବରାଳ

IPS ଅଫିସରଙ୍କ କ୍ୟାରୀୟର ବର୍ବାଦ କରିଦେବ ଜେଲରଙ୍କ FIR !

0 Comments read News, Politics

ସିନୟର IPS ଅଫିସର ସୁଶାନ୍ତ ନାଥଙ୍କ ନାଁରେ ଆସିଛି ଯୌନ ଉତ୍ପୀଡନ ଦେଉଥିବାର ସଂଗୀନ ଅଭିଯୋଗ ହୋଇଛି । ନଭେମ୍ୱର 3 ତାରିଖରେ ସଂସଦର ଷ୍ଟାଣ୍ଡିଂ କମିଟି ଆଗରେ ହାଜରେ ହେବେ ସୁଶାନ୍ତ ନାଥ। ଏଭଳି ଅଭିଯୋଗ ଆସିବା ପରେ ଓଡ଼ିଶା ସରକାର ସୁଶାନ୍ତ ନାଥଙ୍କୁ ଜେଲ ଡିଜିରୁ ଗୃହ ବିଭାଗର ଓଏସଡି ଭାବେ ବଦଳି କରିଛନ୍ତି । ତେବେ ନାଥ ବାବୁଙ୍କ ନାଁରେ ଯୌନ ନିର୍ଯ୍ୟାତନାର ଅଭିଯୋଗ ଆଣିଛନ୍ତି, ତାଙ୍କର ପୂର୍ବତନ ସହକର୍ମୀ। ଚୌଦ୍ୱାର ସର୍କଲ ଜେଲର ପୂର୍ବତନ ଜେଲର ସନ୍ତୋଷିନୀ ଦାଶଙ୍କ ଲିଖିତ ଅଭିଯୋଗ ପରେ ନାଥ ବାବୁଙ୍କ ବିରୁଦ୍ଧରେ ଆକ୍ସନ ନେଇଛନ୍ତି ରାଜ୍ୟ ସରକାର । ନାଥ ବାବୁଙ୍କ ବିରୁଦ୍ଧରେ ଆସିଛି ଯୌନ ନିର୍ଯାତନା, ପଦର ଅପବ୍ୟବହାର, ଅପରାଧିକ ଧମକ ସହ ଜୀବନ ପ୍ରତି ବିପଦ ସୃଷ୍ଟି କରିବା ଭଳି ସଂଗୀନ ଅଭିଯୋଗ । ୨୦୨୫ ମସିହା ଜୁଲାଇ୧୮ତାରିଖରେ ସୁଶାନ୍ତ ନାଥ, ନିଜ ବନ୍ଧୁ କୁଲଦୀପ ରଥଙ୍କ ଜରିଆରେ ସନ୍ତୋଷିନୀ ଦାଶଙ୍କୁ ହୋଟେଲକୁ ଡାକିଥିଲେ ।ସେହି ପ୍ରସ୍ତାବରେ ରାଜି ନହେବାରୁ ତାଙ୍କର ବାରମ୍ବାର ବଦଳି ସହ ସସପେଣ୍ଡ ଏବଂ ଦରମା ବନ୍ଦ ହେବାର ଅଭିଯୋଗ ଆଣିଛନ୍ତି ସନ୍ତୋଷିନୀ ଦାଶ।

ଏହି ଅଭିଯୋଗ ଆଧାରରେ ଚୌଦ୍ୱାର ଥାନାରେ କେସ୍ ନମ୍ବର ୭୧୩/୨୦୨୬ ରୁଜୁ ହୋଇଛି। ଭାରତୀୟ ନ୍ୟାୟ ସଂହିତା-BNSର ଧାରା ୭୫(୨), ୩୫୧(୨) ଓ ୩(୫) ଅନୁଯାୟୀ ପୋଲିସ କେସ୍ ଫାଇଲ୍ କରିଛି। ଅନ୍ୟପଟେ ଓଡ଼ିଶାର DGP ହେବା ରେସରେ ଅଛନ୍ତି ସୁଶାନ୍ତ ନାଥ ।ମାତ୍ର ଯୌନ ନିର୍ଯାତନାର ଅଭିଯୋଗ, ନାଥ ବାବୁଙ୍କ ପାଇଁ କାଳ ହେଲାଣି।ଓଡ଼ିଶା ସରକାରଙ୍କ ପକ୍ଷରୁ UPSC ନିକଟକୁ ପଠା ଯାଇଥିବା ୧୧ଜଣିଆ IPS ଅଧିକାରୀଙ୍କ ଲିଷ୍ଟରେ 3ଜଣଙ୍କ ମଧ୍ୟରେ ଥିଲେ ନାଥ ବାବୁକିନ୍ତୁ SI ନିଯୁକ୍ତି ଦୁର୍ନୀତି ମାମଲାରେ ସୁଶାନ୍ତ ନାଥଙ୍କୁ CBI ପଚରା ଉଚରା କରିବାର ସଙ୍କେତ ମିଳିବା ପରେ, ରାଜ୍ୟ ସରକାର ନାଥ ବାବୁଙ୍କର ‘ଇଣ୍ଟିଗ୍ରିଟି ସାର୍ଟିଫିକେଟ୍‘ ପ୍ରତ୍ୟାହାର କରିଥିଲେ।ଯାହା ଫଳରେ ତାଙ୍କ ନାଁ DGP ଚୟନ ପ୍ରକ୍ରିୟାରୁ ବାଦ୍ ପଡ଼ିଥିଲା ।ସେହି ନିଷ୍ପତ୍ତି ବିରୋଧରେ ସୁପ୍ରିମକୋର୍ଟର ଦ୍ୱାରସ୍ଥ ହୋଇଛନ୍ତି ସୁଶାନ୍ତ ନାଥ।ତେବେ ଡିଜିପି ଚୟନ ପ୍ରକ୍ରିୟା ସୁପ୍ରିମକୋର୍ଟରେ ବିଚାରାଧୀନ ଥିବା ବେଳେ, ଚୌଦ୍ୱାର ଜେଲର ପୂର୍ବତନ ମହିଳା ଜେଲରଙ୍କ FIR ସୁଶାନ୍ତ ନାଥଙ୍କ କ୍ୟାରିୟର ବର୍ବାଦ କରିଦେଇ ପାରେ। ଯୌନ ନିର୍ଯାତନା ଅଭିଯୋଗ ଆଧାରରେ ତାଙ୍କୁ ଜେଲ୍ ଡିଜି ପଦରୁ ହଟାଇ ଗୃହ ବିଭାଗର ଓଏସଡି କଲେଣି ।ସେପଟେ ସଂସଦରେ ଷ୍ଟାଣ୍ଡିଂ କମିଟି ।ଏମିତି ହେବନି ତ ସରକାର ବାହଦୂର 1993 ବ୍ୟାଚର IPS ସୁଶାନ୍ତ ନାଥଙ୍କୁ ଚାକିରିରୁ ନିଲମ୍ବିତ କରିଦେବେ । ଆଉ ଦିନେ ଯେଉଁ ଜେଲ ବିଭାଗ ସମ୍ଭାଳୁଥିଲେ ନାଥ ବାବୁ, ସେହି ଜେଲକୁ ତାଙ୍କୁ ଏକ ଅଭିଯୁକ୍ତ ଭାବରେ ପଠାଇ ଦେବେ।
ଏ ଷ୍ଟୋରୀ ଲେଖିଛନ୍ତି-ବିଜୟ କେତନ ବରାଳ

ବାତ୍ୟାରେ OCS ପରୀକ୍ଷା : ରିସ୍କ ନେଇ ଝଟକା ଖାଇବେ କି ସରକାର ?

0 Comments read News, Politics

ପୂର୍ବ ନିର୍ଦ୍ଧାରିତ ଅକ୍ଟୋବର 31 ତାରିଖରେ ଓଡ଼ିଶା ସିଭିଲ ସର୍ଭିସର ମେନ୍ ଏକଜାମ୍ କରିଛନ୍ତି ଏକ-ଜିଦିଆ ଓଡ଼ିଶା ସରକାର। OPSC ଦ୍ୱାରା ଆୟୋଜିତ Odisha Civil Services ପରୀକ୍ଷାରେ କୌଣସି କାଣ୍ଟଛାଟ ହେଲା ନାହିଁ। ବାତ୍ୟା ଅର୍ଣ୍ଣବ ପ୍ରଭାବରେ କ୍ଷତିଗ୍ରସ୍ତ ପରୀକ୍ଷାର୍ଥୀଙ୍କର ସ୍ୱାର୍ଥକୁ  ଅଣଦେଖା କରାଯାଇଥିବା ଅଭିଯୋଗ। ନା’ କଂଗ୍ରେସ ସାଂସଦଙ୍କ ଦାବି ଶୁଣିଲେ, ନା’ ନିଜ ପାର୍ଟିର ଏମପିଙ୍କ କଥାକୁ ଗୁରୁତ୍ୱ ଦେଲେ ଓଡ଼ିଶାର ବିଜେପି ସରକାର। ବରଂ ପରୀକ୍ଷାର୍ଥୀଙ୍କର ନେବା-ଆଣିବା ପାଇଁ ହେଲ୍ପଲାଇନ୍ ନମ୍ବର ଜାରି କରି କ୍ରେଡିଟ୍ ନେବାକୁ ଚେଷ୍ଟା କରୁଛନ୍ତି ମୋହନ ମାଝୀ ସରକାର। ସରକାରଙ୍କ ଏକ ଜିଦିଆ ଆଟିଚୁଡ୍ କଣ ପାଇଁ ? ଯେଉଁଠି ବିନା ହେଲିକପ୍ଟରରେ ବାତ୍ୟାର ସ୍ଥିତି ସମୀକ୍ଷା କରିବା ସମ୍ଭବ ହେଉନି। ସେଠି ପାଣିଭର୍ତ୍ତି ଅଞ୍ଚଳରୁ ପରୀକ୍ଷାର୍ଥୀ ଆସିବେ କେମିତି? ସରକାରଙ୍କ ହେଲ୍ପ-ଲାଇନ୍ ନମ୍ବର କେବଳ ଧର୍ମକୁ ଆଖିଠାର ନୁହେଁ ତ? କାରଣ ବାତ୍ୟା ଦ୍ୱାରା ସର୍ବାଧିକ ପ୍ରଭାବିତ ଗଞ୍ଜାମ ଜିଲ୍ଲାରୁ ୩୨୫ଜଣ ଓଡ଼ିଶା ସିଭିଲ୍ ସର୍ଭିସର ମେନ୍ ଏକଜାମ୍ ଦେବାର ଥିଲା । ସେହିଭଳି ଗଜପତି, ରାୟଗଡ଼ା, କୋରାପୁଟ ନବରଙ୍ଗପୁର ଏବଂ ମାଲକାନଗିରି ଜିଲ୍ଲାରେ ଭୂସ୍ଖଳନ ସହ ଜଳବନ୍ଦୀ ସମସ୍ୟା ଦେଖାଦେଇଛି । ସେହି ସବୁ ଜିଲ୍ଲାରୁ ପ୍ରାୟ ୧୦୦ ଜଣ ପରୀକ୍ଷାର୍ଥୀ ଅଛନ୍ତି। ଗଞ୍ଜାମ ଜିଲ୍ଲାର ଅଧିକାଂଶ ଅଞ୍ଚଳ ଏବେ ଜଳମଗ୍ନ। ପରିସ୍ଥିତି ଏମିତି ଯେ ଅନେକ ରାସ୍ତାଘାଟ ବିଚ୍ଛିନ୍ନ, ଟ୍ରେନ୍ ବସ୍ ସବୁ ବାତିଲ୍। ଭୟାନକ ପରିସ୍ଥିତିକୁ ଆଖିରେ ରଖି ବ୍ରହ୍ମପୁରର ବିଜେପି ସାଂସଦ ପ୍ରଦୀପ ପାଣୀଗ୍ରାହୀ ଏକ୍ଜାମ୍ ପୋଷ୍ଟପନ୍ କରିବାକୁ OPSCକୁ ସୋସିଆଲ ମିଡିଆ ମାଧ୍ୟମରେ ରିକ୍ୟୁଏଷ୍ଟ କଲେ।

ବିଜୁ ଜନତା ଦଳ ଏବଂ କଂଗ୍ରେସ ତରଫରୁ ମଧ୍ୟ ଏପରି ପରିସ୍ଥିତିରେ ପରୀକ୍ଷା ନ କରିବାକୁ ଦାବି କରାଗଲା । ଅନ୍ୟପଟେ ଯାତାୟାତ ଦାୟିତ୍ଵ ରାଜ୍ୟ ସରକାର ନେବେ କହି ପ୍ରଭାବିତ ଅଞ୍ଚଳର ପରୀକ୍ଷାର୍ଥୀମାନେ ନିଜ ନିଜ ବ୍ଳକର ବିଡିଓଙ୍କ ସହ କଣ୍ଟାକ୍ଟ କରିବାକୁ ପରାମର୍ଶ ଦେଲେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ । କିନ୍ତୁ ବାତ୍ୟା ଯୋଗୁଁ ବହୁ ଟ୍ରେନ୍ ବାତିଲ ହେବା ସହ ବସ୍ ଚଳାଚଳ ମଧ୍ୟ ହୋଇପାରୁନି। ଅନେକ ଆଶାୟୀ ପରୀକ୍ଷା କେନ୍ଦ୍ରରେ ଠିକ୍ ସମୟରେ ପହଞ୍ଚିବା ନେଇ ଆଶଙ୍କାରେ ।ହେଲେ ସରକାରଙ୍କ ଏକା ଜିଦ୍, ଅକ୍ଟୋବର ୩୧ରୁ ନଭେମ୍ବର୭ ମଧ୍ୟରେ ଓସିଏସ୍ ମେନ୍ ପରୀକ୍ଷା ହେବ  । ଅପର ପକ୍ଷରେ ପରୀକ୍ଷା ନ କରିବାକୁ ଦାବି କରିବା ସହ ସରକାରଙ୍କୁ ସମାଲୋଚନା କରିଛନ୍ତି କଂଗ୍ରେସ ସାଂସଦ ସପ୍ତଗିରି ଉଲାକା। ଉକାକାଙ୍କର କହିବା କଥା ହେଲା, ବିନା ହେଲିକପ୍ଟରରେ ଯଦି ସରକାର ବାତ୍ୟାର ସ୍ଥିତି ସମୀକ୍ଷା କରି ପାରୁନାହାନ୍ତି ସେହି ସମୟରେ ପରୀକ୍ଷା ଦେବାକୁ କେମିତି ଆସିବେ ପରୀକ୍ଷାର୍ଥୀ? ପାଣିଭର୍ତ୍ତି ଅଞ୍ଚଳରୁ ପରୀକ୍ଷାର୍ଥୀଙ୍କୁ ଆଣିବାରେ ସରକାର ସଫଳ ହେଉଛନ୍ତି ନା’ ରିସ୍କ ନେଇ ଝଟକା ଖାଉଛନ୍ତି ?

ନବୀନଙ୍କ ରାସ୍ତାରେ ମୋହନ:ନେତା ନୁହଁନ୍ତି,ଅଫିସର ବିଶ୍ୱସ୍ତ

0 Comments read News, Politics

1996 ଲୋକସଭା ନିର୍ବାଚନ ସମୟର କଥା, ଓଡ଼ିଶା ଆସିଥିଲେ ତତ୍କାଳୀନ ପ୍ରଧାନମନ୍ତ୍ରୀ ପି.ଭି ନରସିଂହ ରାଓ । ବରଗଡ଼ ଜିଲ୍ଲାର ବରଡୋଲ ଏବଂ ଝାରସୁଗୁଡ଼ା ଜିଲ୍ଲାର ବନହରପାଲିର ନିର୍ବାଚନୀ ସଭାରେ ନରସିଂହ ରାଓ ଘୋଷଣା କଲେ ଯେ ପଶ୍ଚିମ ଓଡ଼ିଶା ବିକାଶ ପରିଷଦ ଗଠନ ହେବ । KBK ଢାଞ୍ଚାରେ ପଶ୍ଚିମ ଓଡ଼ିଶା ବିକାଶ ପରିଷଦ ଗଠନ ହେବ ବୋଲି ନିଷ୍ପତ୍ତି ହେଲା । କଂଗ୍ରେସର ଏହି ବ୍ରେନ୍ ଚାଇଲ୍ଡକୁ ସ୍ୱରୂପ ଦେଇଥିଲେ ପୂର୍ବତନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକ । ପଶ୍ଚିମ ଓଡ଼ିଶାର 10ଟି ଜିଲ୍ଲା ଏବଂ ଅନୁଗୁଳ ଜିଲ୍ଲାର ଆଠମଲ୍ଲିକ ସବଡିଭିଜନକୁ ନେଇ 1998 ନଭେମ୍ବର 11 ତାରିଖରେ ପ୍ରତିଷ୍ଠା ହେଲା ପଶ୍ଚିମ ଓଡ଼ିଶା ବିକାଶ ପରିଷଦ ବା WODC । ଏହାର ପ୍ରତିଷ୍ଠାତା ଅଧ୍ୟକ୍ଷ ହେଲେ ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର। ପଶ୍ଚିମ ଓଡ଼ିଶାର ସାମାଜିକ, ସାଂସ୍କୃତିକ ଓ ଆର୍ଥିକ କ୍ଷେତ୍ରରେ ବିକାଶ ନିମନ୍ତେ WODC କାର୍ଯ୍ୟ ଆରମ୍ଭ କଲା। ଏହା ଭିତରେ ପଶ୍ଚିମ ଓଡ଼ିଶା ବିକାଶ ପରିଷଦ ଗଠନକୁ 28ବର୍ଷ ବିତିବାକୁ ବସିଲାଣି, ହେଲେ ଏହାର କାର୍ଯ୍ୟାଳୟ ଭୁବନେଶ୍ୱରରେ ରହିଗଲା । ଆହୁରି ବିଡ଼ମ୍ବନା ଏବେ, WODC ଆଉ ରାଜନେତାଙ୍କର ନିୟନ୍ତ୍ରଣରେ ନାହିଁ। ଏବେ ଏଠି ଚାଲିଛି ଅଫିସର୍ ରାଜ୍ । ନବୀନ ପଟ୍ଟନାୟକଙ୍କ ପରି ମୁଖ୍ୟମନ୍ତ୍ରୀ ମୋହନ ମାଝୀ ମଧ୍ୟ WODCର ଅଧ୍ୟକ୍ଷ ପଦରେ IAS ଅଫିସର ମାନଙ୍କୁ ବସାଉଛନ୍ତି ।  ପ୍ରଥମେ ସଚୀନ ଯାଦବ ଆଉ ଏବେ ସଂଗ୍ରାମ ମହାପାତ୍ରଙ୍କୁ WODCର ଅଧ୍ୟକ୍ଷ ଭାବେ ନିଯୁକ୍ତି ଦେଇଛନ୍ତି ମୋହନ ମାଝୀ ସରକାର । ଏକଦା ନରସିଂହ ମିଶ୍ର, ଅଇଁଠି ସାହୁ, ସୁନ୍ଦରଗଡ଼ ରାଣୀ ପଦ୍ମିନୀ ଶେଖର ଦେଓ, କିଶୋର ମହାନ୍ତି, ଏବଂ ସୁଭାଷ ଚୌହାନଙ୍କ ପରି ବରିଷ୍ଠ ନେତାମାନେ ପଶ୍ଚିମ ଓଡ଼ିଶା ବିକାଶ ପରିଷଦ ଅଧ୍ୟକ୍ଷ ହୋଇଥିଲେ। ଏପରିକି ସମ୍ବଲପୁରର ଏକ ପ୍ରତିଷ୍ଠିତ ରାଜନୈତିକ ପରିବାରର ପ୍ରଫେସର ନିରଞ୍ଜନ ପଣ୍ଡାଙ୍କୁ WODCର ଅଧ୍ୟକ୍ଷ ପଦ ଦିଆଯାଇଥିଲା।

2020 ମେ’10 ତାରିଖରେ ତତ୍କାଳୀନ ଅଧ୍ୟକ୍ଷ ସୁଭାଷ ଚୌହାନଙ୍କ ପରଲୋକ ହେଲା। ସେବେଠାରୁ WODC ଚାଲିଯାଇଛି ଅଫିସର ମାନଙ୍କ ନିୟନ୍ତ୍ରଣକୁ । ଦୀର୍ଘ ସାଢ଼େ 6ବର୍ଷ ହେବ ଅଫିସରମାନେ ନିୟନ୍ତ୍ରଣ କରୁଛନ୍ତି WODCକୁ। ପ୍ରଥମେ ଅସିତ ତ୍ରିପାଠୀ, ଆଉ ଫେବ୍ରୁଆରୀ 2025ରୁ IAS ଅଫିସର ସଚିନ୍ ଯାଦବ WODC ଅଧ୍ୟକ୍ଷ ଦାୟିତ୍ୱ ତୁଲାଇଲେ । ଆଉ 27 ଅକ୍ଟୋବର 2026ରୁ WODCର ଅଧ୍ୟକ୍ଷ ହେଲେ IAS ଅଫିସର ସଂଗ୍ରାମ କେଶରୀ ମହାପାତ୍ର। ନବୀନ ପଟ୍ଟନାୟକ, ପ୍ରଥମେ ଅସ୍ଥାୟୀ ଭାବେ ସୁରେଶ ମହାପାତ୍ର ଏବଂ ପରବର୍ତ୍ତୀ ସମୟରେ ପୂର୍ବତନ ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କୁ WODCର ସ୍ଥାୟୀ ଅଧ୍ୟକ୍ଷ କରିଦେଲେ। ରିଟାୟର୍ଡ IAS ଅଫିସର ଅସିତ ତ୍ରିପାଠୀଙ୍କୁ ଅଧ୍ୟକ୍ଷ କରିବା ପଛରେ ଭୈରବ ପାଣ୍ଡିଆନଙ୍କର ପ୍ଲାନ୍। ଉଦ୍ଦେଶ୍ୟ ଥିଲା-ବଲାଙ୍ଗୀର ଜିଲ୍ଲାର ମୂଳନିବାସୀ ଅସିତ ତ୍ରିପାଠୀଙ୍କ ମାଧ୍ୟମରେ ବିଜେଡିର ହେଭିୱେଟ୍ ଅନଙ୍ଗ ଉଦୟ ସିଂହଦେଓଙ୍କ ପରିବାରକୁ କାଉଣ୍ଟର କରିବା । କିନ୍ତୁ ପାଣ୍ଡିଆନଙ୍କର ସେହି ପ୍ଲାନ୍, ବିଜୁ ଜନତା ଦଳକୁ ମହଙ୍ଗା ପଡ଼ିଲା । 2024 ନିର୍ବାଚନରେ ବଲାଙ୍ଗିରର କଣ୍ଟାବାଞ୍ଜି ଆସନରୁ ନବୀନ ପଟ୍ଟନାୟକ ପରାଜିତ ହେଲେ। ଅପରପକ୍ଷରେ ଅନଙ୍ଗ ଉଦୟଙ୍କ ପୁଅ କଳିକେଶ,ବଲାଙ୍ଗିର ଆସନରୁ ବିଜୟୀ ହେଲେ। କିନ୍ତୁ ପଶ୍ଚିମ ଓଡ଼ିଶା ବିକାଶ ପରିଷଦ ଅଧିନରେ ଥିବା 5ଟି ଯାକ ଲୋକସଭା ଆସନରେ ବିଜୁ ଜନତା ଦଳ ପରାଜିତ ହେଲା । ଏପରିକି WODC ଅଧିନରେ ଥିବା 36ଟି ବିଧାନସଭା ନିର୍ବାଚନ ମଣ୍ଡଳୀରେ 18ଟିରେ ବିଜେପି ଜିତିଥିଲା । ବିଜୁ ଜନତା ଦଳ ମାତ୍ର 15ଟି ଆସନରେ ବିଜୟୀ ହୋଇଥିଲା । ଅଫିସର ମାନଙ୍କ ଉପରେ ଭରସା କରି ଫଳ ଭୋଗିଲେ ନବୀନ ପଟ୍ଟନାୟକ। ଏବେ ନବୀନଙ୍କ ରାସ୍ତାରେ ମୁଖ୍ୟମନ୍ତ୍ରୀ ମୋହନ ମାଝୀ। ବିଜେପିର କୌଣସି ବରିଷ୍ଠ ନେତାଙ୍କୁ WODCର ଅଧ୍ୟକ୍ଷ କରାଯାଇ ପାରନ୍ତା । କିନ୍ତୁ ନିଜ ସରକାରର 28ମାସ ବିତିଥିଲେ ମଧ୍ୟ ବିଜେପିର କୌଣସି ନେତାଙ୍କୁ WODCର ଅଧ୍ୟକ୍ଷ କଲେ ନାହିଁ ମୁଖ୍ୟମନ୍ତ୍ରୀ । ବରଂ IAS ଅଫିସର ସଂଗ୍ରାମ ମହାପାତ୍ରଙ୍କୁ WODCର ଅଧ୍ୟକ୍ଷ କରିଛନ୍ତି ମୋହନ ମାଝୀ । ଯାହାର ଝଟକା ହୁଏତ ଆଗାମୀ ପଞ୍ଚାୟତ ନିର୍ବାଚନରେ ଦେଖିବାକୁ ମିଳିପାରେ। 
ଏ ଷ୍ଟୋରୀ ଲେଖିଛନ୍ତି- ବିଜୟ କେତନ ବରାଳ

ଓଡ଼ିଶାର ଆଇନଶୃଙ୍ଖଳା ହଲଚଲ, ଆକ୍ସନ୍ ମୋଡ୍‌ରେ କେନ୍ଦ୍ର ସରକାର

0 Comments read News, Politics

ଓଡ଼ିଶାର ଆଇନ ଶୃଙ୍ଖଳା ପରିସ୍ଥିତିକୁ ନେଇ ବିରୋଧୀ ଦଳ ତ ବିଜେପି ସରକାରକୁ ଟାର୍ଗେଟ କରୁଥିଲେ,ଏବେ କେନ୍ଦ୍ର ସରକାର ବି ଆଙ୍ଗୁଳି ଉଠେଇଲେଣି। ରାଜ୍ୟର ଆଇନ ଶୁଙ୍ଖଳା ପରିସ୍ଥିତିର ତଥ୍ୟ ଭିତ୍ତିକ ରିପୋର୍ଟ ଦେବାକୁ କେନ୍ଦ୍ର ଗୃହ ବିଭାଗ ଓଡ଼ିଶା ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ବିଶେଷକରି ଓଡ଼ିଶାର ହାଜତ ହିଂସା, ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନ ଭଳି ମାମଲାରେ ନ୍ୟାସନାଲ୍ କ୍ରାଇମ୍ ଇନଭେଷ୍ଟିଗେସନ୍ ବ୍ୟୁରୋ (NCBI) ପକ୍ଷରୁ କେନ୍ଦ୍ର ହୋମ୍ ଡିପାର୍ଟମେଣ୍ଟର ଦୃଷ୍ଟି ଆକର୍ଷଣ କରାଯାଇଥିଲା। ଏ ବିଷୟରେ ଗତ ସେପ୍ଟେମ୍ବର ୧୬ ତାରିଖରେ କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ଓଡ଼ିଶାର ମୁଖ୍ୟ ଶାସନ ସଚିବଙ୍କ ଠାରୁ ଜବାବ ମଗାଯାଇଛି । ତେବେ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ, ଓଡ଼ିଶାର ଆଇନ ଶୃଙ୍ଖଳା ପରିସ୍ଥିତିକୁ ଅତି ହାଲୁକା ଭାବେ ନେଉଥିଲା ଭଳି ମନେ ହେଉଛି । ନହେଲେ କେନ୍ଦ୍ର ଗୃହ ବିଭାଗ ଠାରୁ ଚିଠି ପାଇବାର ମାସକ ପରେ ଅର୍ଥାତ ଅକ୍ଟୋବର ୧୬ ତାରିଖରେ ତତ୍ପର ହୋଇନଥାନ୍ତେ ଓଡ଼ିଶା ପ୍ରଶାସନ । ରାଜ୍ୟର ଆଇନ ଶୃଙ୍ଖଳା ପରିସ୍ଥିତିର ତଥ୍ୟ ଭିତ୍ତିକ ରିପୋର୍ଟ ସଂଗ୍ରହ ପାଇଁ ଓଡ଼ିଶା ସରକାରଙ୍କ ଗୃହ ବିଭାଗ ଗତ ଅକ୍ଟୋବର ୧୬ ତାରିଖରେ ରାଜ୍ୟର ଡିଜି ପୋଲିସଙ୍କୁ ଚିଠି ଲେଖିଲେ।

ଅନ୍ୟପଟେ 28 ମାସର ବିଜେପି ସରକାରରେ ଓଡ଼ିଶାରେ ଆଇନ ଶୃଙ୍ଖଳା ବିଗିଡିଛି ବୋଲି ରାଜ୍ୟ ସରକାର ସ୍ୱୀକାର କରିଛନ୍ତି। ଗତ ମାର୍ଚ୍ଚ ମାସ 25 ତାରିଖରେ ରାଜ୍ୟ ସରକାରଙ୍କ ଶ୍ୱେତପତ୍ର ବା White Paper ସ୍ପଷ୍ଟ କରିଛି ଯେ ଓଡ଼ିଶାରେ ଅପରାଧିକ ହାର ବୃଦ୍ଧି ପାଉଛି। 2024 ତୁଳନାରେ 2025 ମସିହାରେ ଓଡ଼ିଶାରେ ଅପରାଧିକ ହାର 7 ଦଶମିକ 3 ପ୍ରତିଶତ ବୃଦ୍ଧି ପାଇଛି । 2025 ମସିହାରେ ହତ୍ୟାକାଣ୍ଡ ହାର 3 ଦଶମିକ 6 ପ୍ରତିଶତ ବୃଦ୍ଧି ପାଇଛି। 2025ରେ 1304 ଜଣଙ୍କର ବିଭିନ୍ନ ହତ୍ୟାକାଣ୍ଡରେ ପ୍ରାଣ ଯାଇଛି । ଅର୍ଥାତ ପ୍ରତ୍ୟେକ ଦିନ 4 ଜଣ ଲୋକ ବିଭିନ୍ନ ହତ୍ୟାକାଣ୍ଡରେ ଜୀବନ ହରାଇଲେ ।ଏପରିକି 2026 ମସିହାରେ ମଧ୍ୟ ସମାନ ଅବସ୍ଥା। ଭୁବନେଶ୍ୱର ଉପକଣ୍ଠ ବାଲିଅନ୍ତାରେ GRP କନେଷ୍ଟବଲ ସୌମ୍ୟରଞ୍ଜନ ସ୍ୱାଇଁଙ୍କ ପୋଲିସ ସାମ୍ନାରେ ହତ୍ୟା, ଗଞ୍ଜାମ ଜିଲ୍ଲାରେ ସୁଧୀର ପାତ୍ରଙ୍କ କିଡନାପ ପରେ ହତ୍ୟା, କଣାସରେ ମୃତ୍ୟୁଞ୍ଜୟଙ୍କୁ ରାସ୍ତା ଉପରେ ପନିକିରେ ଗୋଡ଼େଇ ଗୋଡ଼େଇ ଆକ୍ରମଣ ଭଳି ଅନେକ ଘଟଣା ଓଡ଼ିଶାର ଆଇନଶୃଙ୍ଖଳା ପରିସ୍ଥିତିର ସତ ସାମ୍ନାକୁ ଆଣିଛି।ଗୋଟିଏ ପଟେ ରାଜ୍ୟରେ ପୂର୍ଣ୍ଣକାଳୀନ ଡିଜିପି ନିଯୁକ୍ତି ପ୍ରସଙ୍ଗ ସୁପ୍ରିମକୋର୍ଟରେ ବିଚାରାଧୀନ ଥିବାବେଳେ ଅନ୍ୟପଟେ ପୋଲିସ ପ୍ରଶାସନରେ 33,000 କର୍ମଚାରୀ ପଦ ଫାଙ୍କା ପଡିଛି । ଅନ୍ୟପଟେ ଗୃହ ବିଭାଗର ପ୍ରମୁଖ ଶାସନ ସଚିବ ଦାୟିତ୍ୱରେ ଥିବା ହେମନ୍ତ ଶର୍ମା, ଶିଳ୍ପ ଏବଂ ସୂଚନା ଓ ଲୋକସଂପର୍କ ବିଭାଗ ସହ ଇପିକଲ୍ ଦାୟିତ୍ୱରେ ଅଛନ୍ତି । କହିବାକୁ ଗଲେ ଓଡ଼ିଶାରେ ପୂର୍ଣ୍ଣକାଳୀନ ଗୃହ ସଚିବ ମଧ୍ୟ କେହି ନାହାଁନ୍ତି। ଏଭଳି ସ୍ଥିତିରେ ଓଡ଼ିଶାର ଆଇନ ଶୃଙ୍ଖଳା ବିଗିଡ଼ିବା ନେଇ କେନ୍ଦ୍ର ସରକାରଙ୍କୁ କି ଉତ୍ତର ଦେବେ ଗୃହ ବିଭାଗ ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ ମୋହନ ମାଝୀ ?
ଏ ଷ୍ଟୋରୀ ଲେଖିଛନ୍ତି-ବିଜୟ କେତନ ବରାଳ