କ୍ରିକେଟ ମହାକୁମ୍ଭରେ ଯବନିକା ପଡ଼ିଛି।ନୂଆ ବିଶ୍ୱ ବିଜେତା ମିଳିଲା।ନ୍ୟୁଜିଲାଣ୍ଡକୁ ହରାଇ ପ୍ରଥମ ଥର କ୍ରିକେଟର ମକ୍କା ‘ଲର୍ଡସ’ରେ ବିଶ୍ୱକପ୍ ଉଠାଇଛି ଇଂଲଣ୍ଡ। ହୋମଗ୍ରାଉଣ୍ଡରେ ଚାମ୍ପିଅନ୍ ହେବାର ସୌଭାଗ୍ୟ ପାଇଛି।ଏହି ବିଜୟ ପାଇବାକୁ ଇଂଲଣ୍ଡକୁ ୪୪ ବର୍ଷ ଲାଗିଲା।ସେହିପରି ଓ୍ୱାର୍ଲଡ କପ୍ ଇତିହାସରେ ୨୩ବର୍ଷ ପରେ ମିଳିଲା ନୂଆ ଚାମ୍ପିଅନ୍।କ୍ରିକେଟରେ ରୋମାଞ୍ଚକର ଓ ସଂଘର୍ଷପୂର୍ଣ୍ଣ ଲଢ଼େଇ ଦେଖିଲା ସାରା ବିଶ୍ୱ।
ବାଉଣ୍ଡ୍ରି ବାଛିଲା ବିଶ୍ୱବିଜେତା
ଶହେ ଓଭରରେ ନିର୍ଣ୍ଣୟ ହୋଇ ପାରିଲା ନାହିଁ ବିଶ୍ୱକପ୍ ଚାମ୍ପିଅନ୍।ପ୍ରଥମ ଥର ବିଶ୍ୱକପରେ ଖେଳାଗଲା ସୁପର ଓଭର।ପୁଣି ମ୍ୟାଚ୍ ଟାଇ ରହିବାରୁ ଅଧିକ ବାଉଣ୍ଡ୍ରି ମାରିଥିବା ଇଂଲଣ୍ଡକୁ ବିଜେତା ଘୋଷଣା କରାଯାଇଥିଲା।କାରଣ ଫାଇନାଲ ମୁକାବିଲାରେ ଇଂଲଣ୍ଡ ୨୨ଟି ଚୌକା ଓ ୨ଟି ସିକ୍ସ ମାରିଥିଲା।ସୁପର ଓଭରରେ ମାରିଥିଲା ୨ଟି ଚୌକା। ନ୍ୟୁଜିଲାଣ୍ଡ ୫୦ ଓଭରରେ ୧୪ଚୌକା ଓ ୨ଟି ଛକା ମାରିଥିବା ବେଳେ ସୁପର ଓଭରରେ କେବଳ ଗୋଟିଏ ସିକ୍ସ ନିଜ ନାଁରେ କରିଥିଲେ।ବିଶ୍ୱକପ ଫାଇନାଲରେ ଏମିତି କାଣ୍ଟେ କା ଟକ୍କର ହେବ ବୋଧେ କେହି କେବେ କଳ୍ପନା କରିନଥିଲେ।
୪୪ବର୍ଷ ପରେ ବିଶ୍ୱ ଚାମ୍ପିଅନ୍
କ୍ରିକେଟ ଗଡଫାଦର ଇଂଲଣ୍ଡ।କିନ୍ତୁ କେବେ ବିଶ୍ୱକପ୍ ଚାମ୍ପିଅନ୍ ହେବାର ସୌଭାଗ୍ୟ ପାଇ ନଥିଲା।ଏଥିପାଇଁ ଅପେକ୍ଷା କରିବାକୁ ପଡ଼ିଲା ୪୪ ବର୍ଷ।ଶେଷରେ ୨୦୧୯ରେ ସ୍ୱପ୍ନ ସାକାର ହୋଇଛି।କ୍ରିକେଟର ମକ୍କା ‘ଲର୍ଡସ’ରେ ବିଶ୍ୱକପ୍ ଟ୍ରଫି ଉଠାଇ ଚଳିତ ବିଶ୍ୱକପକୁ ନିଜ ନାଁରେ କରିଛି ଇଂଲଣ୍ଡ।ଅନ୍ୟପଟେ ପୁଣି ଥରେ ଫାଇନାଲ୍ ଖେଳିଥିଲେ ବି ନ୍ୟୁଜିଲାଣ୍ଡର ଓ୍ୱାର୍ଲଡ କପ୍ ଆଶା ଧୂଳିସାତ ହୋଇଛି।
କ୍ରିକେଟ ଇତିହାସରେ ଏମିତି କେବେ ବିଶ୍ୱକପ୍ ଫାଇନାଲ୍ ହୋଇ ନଥିଲା। କାଣ୍ଟେ କା ଟକ୍କର।ପ୍ରଥମେ ନିର୍ଦ୍ଧାରିତ ଓଭରରେ ମ୍ୟାଚ୍ ଟାଇ ହୋଇଗଲା।ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂ କରି ୨୪୧ରନ୍ କରିଥିବା ବେଳେ ଚେଜ୍ କରି ଇଂଲଣ୍ଡ ବି ୨୪୧ରେ ସୀମିତ ରହିଗଲା।ଚାମ୍ପିଅନ୍ ବାଛିବାକୁ ପ୍ରଥମ ଥର ଖେଳାଗଲା ସୁପର ଓଭର୍।ପୁଣି ମ୍ୟାଚ୍ ବରାବର ରହିଲା।ଏହାପରେ ବାଉଣ୍ଡ୍ରି ଲାଇନ୍ ଅର୍ଥାତ୍ ଯିଏ ଅଧିକ ଚୌକା ମାରିଛି ତାକୁ ଆଧାର କରି ଫୈସଲାହେଲା।ଚାମ୍ପିଅନ୍ ହୋଇଗଲା ଇଂଲଣ୍ଡ।୧୯୭୫ରୁ କରିଥିବା ଅପେକ୍ଷାରେ ଅନ୍ତ ହୋଇଗଲା।
ମୋର୍ଗାନ ଦେଲେ ବିଶ୍ୱକପ୍
ଇୟନ ମୋର୍ଗାନଙ୍କ ନେତୃତ୍ୱାଧୀନ ଇଂଲଣ୍ଡକୁ ଓ୍ୱାର୍ଲଡ କପ୍ ଆରମ୍ଭରୁ ଟାଇଟଲ୍ ଦାବିଦାର କୁହାଯାଉଥିଲା। ପୂର୍ବରୁ ୩ଥର ବିଶ୍ୱକପ ଖେଳିଥିଲେ ବି ଇଂଲିଶ ଦଳ କେବେ ଚାମ୍ପିଅନ୍ ହୋଇ ନଥିଲା।ଏଥର ନିଜ ମାଟିରେ ଓ୍ୱାର୍ଲଡ କପ୍ ହେଉଥିବାରୁ କୌଣସି ମୌକା ହାତ ଛଡ଼ା କରିବାକୁ ଚାହିଁ ନଥିଲା। ଗ୍ରୁପ୍ ପର୍ଯ୍ୟାୟରେ ଭଲ ଖେଳିଥିଲା। ନକଆଉଟରେ ପାଞ୍ଚ ଥର ବିଜେତା ଅଷ୍ଟ୍ରେଲିଆକୁ ମାତ ଦେଇ ହାତେଇଥିଲା ବିଶ୍ୱକପ୍ ଫାଇନାଲ ଟିକେଟ୍।ଶେଷରେ ବିଶ୍ୱବିଜେତା ହୋଇଛି।ମ୍ୟାଚର ହିରୋ ସାଜିଥିଲେ ବେନ୍ ଷ୍ଟୋକ୍ସ। ୯୮ବଲରେ ସେ କରିଥିଲେ ୮୪ ରନ୍।
