କେନ୍ଦ୍ରାପଡ଼ା ଲୋକସଭା ଆସନକୁ ବାଦ ଦେଇ କଂଗ୍ରେସ,ଓଡ଼ିଶାରେ ନିର୍ବାଚନ ଲଢ଼ିଥାଏ।କାରଣ ଅଣକଂଗ୍ରେସର ଗଡ଼ ହେଉଛି କେନ୍ଦ୍ରାପଡ଼ା।୧୯୭୧ରୁ ବିଜୁ ପଟ୍ଟନାୟକଙ୍କ ସହ ରହିଛି କେନ୍ଦ୍ରାପଡ଼ା। ଏପରିକି ଇନ୍ଦିରା ଗାନ୍ଧିଙ୍କ ହତ୍ୟା ପରେ୧୯୮୪ ନିର୍ବାଚନରେ ଓଡ଼ିଶାର ଅନ୍ୟ ୨୦ଟି ଆସନରେ କଂଗ୍ରେସ ବିଜୟୀ ହୋଇଥିଲା।କିନ୍ତୁ କେନ୍ଦ୍ରାପଡ଼ା ଭୋଟର ବିଜୁ ପଟ୍ଟନାୟକଙ୍କୁ ଜିତାଇ ଥିଲେ। ଆଉ ସେହି ଧାରା ଏଯାଏଁ ବଳବତ୍ତର ରହିଛି।ଲାଗୁଛି କଂଗ୍ରେସର କେନ୍ଦ୍ରାପଡ଼ା ପଲିସି ବରଗଡ଼ରେ ଆପଣାଇଛି ବିଜେପି। ବରଗଡ଼ ଲୋକସଭା ଆସନଟି ବିଜେଡିକୁ BJP ଓ୍ୱାକଭର ଦେଲା ଭଳି ଲାଗୁଛି। କାରଣ ବିଜେପିର ରଣନୀତି ବିଜେଡିକୁ ସୁହାଇଲା ଭଳି ଲାଗୁଛି। ପ୍ରାର୍ଥୀ ଚୟନରୁ ଆରମ୍ଭ ହୋଇଛି ବିବାଦ।
ବିଜେପୁର ଉପନିର୍ବାଚନର ଭୁଲକୁ ପୁନରାବୃତ୍ତି କରିଛି ବିଜେପି।ପାରାଚ୍ୟୁଟ ଲିଡର ଅଶୋକ ପାଣିଗ୍ରାହୀଙ୍କୁ ବିଧାୟକ ପ୍ରାର୍ଥୀ କରିବାରୁ ୨୦୧୮ ଫେବ୍ରୁଆରୀରେ ଦଳ ଛାଡିଥିଲେ ବରଗଡ଼ ବିଜେପି ସଭାପତି ନାରାୟଣ ସାହୁ। ଏବେ ନିର୍ବାଚନ ମଣ୍ଡଳୀର ନେତାଙ୍କୁ ନଦେଇ ବାହାରିଆ ନେତା ସୁରେଶ ପୂଜାରୀଙ୍କୁ ବରଗଡ଼ ଲୋକସଭା ଆସନରେ ପ୍ରାର୍ଥୀ କରିବାରୁ,ଦଳ ଛାଡିଛନ୍ତି ସୁବାଷ ଚୌହାନ। ନାରାୟଣ ସାହୁଙ୍କ ପରି ସୁବାସ ମଧ୍ୟ ବିଜେଡିରେ ମିଶିଛନ୍ତି।
ସୁବାଷଙ୍କ ବିକଳ୍ପ ସୁରେଶ!
ଅଶୋକଙ୍କୁ ପ୍ରାର୍ଥୀ କରିବାରୁ ବିଜେପୁର ଉପନିର୍ବାଚନରେ ୪୧ହଜାର ୯୩୩ ଭୋଟ ବ୍ୟବଧାନରେ ବିଜେଡି ବିଜୟୀ ହୋଇଥିଲା। ଦୂରେଇ ଯାଇଥିଲେ ବିଜେପିର ପୁରୁଣା କର୍ମୀ ଏବଂ ସ୍ୱୟଂସେବକ। ଲଗାତର ୩ଥର ହାରୁଥିବା ଅଶୋକ ପାଣିଗ୍ରାହୀଙ୍କୁ ପ୍ରାର୍ଥୀ କରି,ପୁରୁଖା ନାରାୟଣ ସାହୁଙ୍କୁ ବିଜେପି ଅଣଦେଖା କରିଥିଲା।ଏବେ ଇତିହାସର ପୁନରାବୃତ୍ତି ହେଲା।ଗତ ନିର୍ବାଚନରେ ଓଡ଼ିଶାରେ ବିଜେପି ପ୍ରାର୍ଥୀଙ୍କ ମଧ୍ୟରେ ସର୍ବାଧିକ ଭୋଟ ପାଇଥିବା ସୁବାସ ଚୌହାନଙ୍କୁ ହତାଦର କଲା।କିନ୍ତୁ ଲଗାତର ୫ଥର ହାରିଥିବା ସମ୍ବଲପୁରର ସୁରେଶ ପୂଜାରୀଙ୍କୁ ବରଗଡ଼ରେ ବିଜେପି ପ୍ରାର୍ଥୀ କଲା। ଅନ୍ୟପଟେ ବିଜେଡିର ପ୍ରାର୍ଥୀ ହୋଇଛନ୍ତି ସ୍ଥାନୀୟ ନେତା ତଥା ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟ। ଯିଏକି ବରଗଡ଼ ବିଧାନସଭା ଆସନରୁ ଦୁଇ ଥର ବିଜୟୀ ହୋଇଛନ୍ତି। ବରଗଡ଼ ଅଞ୍ଚଳକୁ ଲୋକସଭାରେ ୩ଥର ପ୍ରତିନିଧିତ୍ୱ କରିଛନ୍ତି।
ଖେଳ ବିଗାଡ଼ିବେ ନବୀନ
ସେହିପରି ବରଗଡ଼ ଲୋକସଭା ଅଧିନରେ ଆସୁଥିବା ବିଜେପୁର ଲାଗି ମୁଖ୍ୟମନ୍ତ୍ରୀ ନିଜେ ପ୍ରାର୍ଥୀପତ୍ର ଦାଖଲ କରିଛନ୍ତି। ବାକି ୬ଟି ବିଧାନସଭା ଆସନରେ ପରିଚିତ ମୁହଁ ନବ ଦାସ,କିଶୋର ମହାନ୍ତି,ସୁଶାନ୍ତ ସିଂ,ସ୍ନେହାଙ୍ଗିନୀ ଛୁରିଆ,ଦେବେଶ ଆଚାର୍ଯ୍ୟ ଏବଂ ବିଜୟ ରଞ୍ଜନ ସିଂହ ବରିହା।କିନ୍ତୁ ବିଜେପି ପକ୍ଷରୁ ବରଗଡ଼ରେ ଅଶ୍ୱିନୀ ଷଡ଼ଙ୍ଗୀ,ପଦମପୁରରେ ପ୍ରଦୀପ ପୁରୋହିତ ଏବଂ ବ୍ରଜରାଜ ନଗରରେ ରାଧାରାଣୀ ପଣ୍ଡା ବିଜେଡିକୁ ଟକ୍କର ଦେଇ ପାରନ୍ତି।କିନ୍ତୁ ଭଟଲିରେ ସଂଗଠକ ସୁଶାନ୍ତ ମିଶ୍ରଙ୍କୁ ସାଇଡ୍ କରି ଇରାଶିଷ ଆଚାର୍ଯ୍ୟଙ୍କୁ ପ୍ରାର୍ଥୀ କରିଛି ବିଜେପି।ତେବେ ଗତ ପଞ୍ଚାୟତ ନିର୍ବାଚନରେ ବଡ଼ ସଫଳତା ପାଇ ଜିଲ୍ଲା ପରିଷଦ ଗଠନ କରିଥିବା ବିଜେପି ଏବେ ଅଡୁଆରେ ପଡିଛି।ବିଜେପିର ପ୍ରାର୍ଥୀ ଚୟନରୁ ଲାଗୁଛି ବରଗଡ଼ରେ ଶଙ୍ଖନାଦ ପ୍ରତିଧ୍ୱନିତ ହେବା ସୁନିଶ୍ଟିତ!
