ଆଇପିଏଲର ୨୦୧୯ ସଂସ୍କରଣ ପାଇଁ ଖେଳାଳି କିଣାବିକା ସରିଛି। ପୁଣି ଥରେ ଫଟାଫଟ୍ କ୍ରିକେଟରେ ଝୁମିବାକୁ ଦର୍ଶକ ଅପେକ୍ଷା କରିଛନ୍ତି। ପ୍ରତିବର୍ଷ ଆଇପିଏଲରେ କେହି ନା କେହି ଯୁବ କ୍ରିକେଟର ହେଡଲାଇନ୍ସ ହୋଇଥାଆନ୍ତି। ଦୁନିଆର ସବୁଠୁ ବଡ଼ ଟି-୨୦ ଲିଗ୍। ଏଠାରେ ଭଲ ପ୍ରଦର୍ଶନ କଲେ ଅନ୍ତର୍ଜାତୀୟ ଦିନିକିଆ ଓ ଟି-ଟ୍ୱେଣ୍ଟି ଦଳରେ ସ୍ଥାନ ମିଳିଯାଏ। ଏମିତି କିଛି ଭାଗ୍ୟବାନ ଖେଳାଳିଙ୍କ ପ୍ରତିବର୍ଷ ଆଇପିଏଲରେ ଆବିର୍ଭାବ ହୁଏ।କିନ୍ତୁ ଆଇପିଏଲରେ ଦବଦବା ଦେଖାଇଥିବା ଖେଳାଳି ନ୍ୟାସନାଲ୍ ଟିମରେ ପରେ ଫେଲ୍ ମାରନ୍ତି। ଏମିତି ୩ଜଣ ଭାରତୀୟ କ୍ରିକେଟର ଅଛନ୍ତି, ଯେଉଁମାନେ ଆଇପିଏଲରେ ସୁପରହିଟ୍। କିନ୍ତୁ ଦିନିକିଆରେ ଫ୍ଲପ୍। ଆଇପିଏଲରେ ଆଜି ବି ସେମାନଙ୍କ ଚମକ ଯେମିତି ସେମିତି। ଚଢ଼ା ଦରରେ ବିକ୍ରିହେଉଛନ୍ତି।
ରବିନ ଉତ୍ଥାପା
ଆଇପିଏଲର ସବୁଠୁ ଅନୁଭବୀ ଖେଳାଳିଙ୍କ ମଧ୍ୟରୁ ଜଣେ। ଏହି ଟୁର୍ଣ୍ଣାମେଣ୍ଟରେ ଏଯାଏଁ ରବିନ ଉତ୍ଥାପା ଖେଳିଛନ୍ତି ୧୬୫ ମ୍ୟାଚ୍। ମୋଟ୍ ୪୧୨୯ ରନ୍ କରିଛନ୍ତି। ଆଇପିଏଲର ଅଲଗା ଅଲଗା ଫ୍ରାଞ୍ଚାଇଜି ଟିମ୍ ପାଇଁ ଖେଳିଛନ୍ତି ଉତ୍ଥାପା। ଓ୍ୱିକେଟ କିପର-ବ୍ୟାଟ୍ସମ୍ୟାନ ଭାବରେ ୨୦୦୬ରେ ଅନ୍ତର୍ଜାତୀୟ ଦିନିକିଆରେ ପଦାର୍ପଣ କରିଥିଲେ।୨୦୧୫ରେ ଜିମ୍ବାଓ୍ୱେ ବିପକ୍ଷରେ ଶେଷ ମ୍ୟାଚ୍ ଖେଳିଥିଲେ। ଭାରତ ପାଇଁ ୪୬ଟି ଦିନିକିଆରୁ ହାସଲ କରିଛନ୍ତି ମାତ୍ର ୯୩୪ ରନ୍। କର୍ଣ୍ଣାଟକର ଏହି ବିସ୍ଫୋରକ କ୍ରିକେଟର ଆଇପିଏଲର ସବୁ ସିଜିନରେ କିନ୍ତୁ ସୁପରହିଟ୍ । ୫ବର୍ଷ ହେବ ସେ କୋଲକାତା ନାଇଟ ରାଇଡର୍ସର ସଦସ୍ୟ ଅଛନ୍ତି। କୋଲକାତା ତାଙ୍କୁ ୬ କୋଟି ୪୦ ଲକ୍ଷ ଟଙ୍କାରେ ରିଟେନ୍ କରିଛି।
ରିଦ୍ଧିମାନ ଶାହା
୩୪ ବର୍ଷୀୟ ଏହି କ୍ରିକେଟର ଟିମ୍ ଇଣ୍ଡିଆକୁ ଫେରିବା ଆଶା ମଉଳି ଗଲାଣି। ମହେନ୍ଦ୍ର ସିଂହ ଧୋନି ଥିବାରୁ ହାତ ଗଣିତ ମାତ୍ର କେତୋଟି ମ୍ୟାଚ୍ ଖେଳିଛନ୍ତି। ୨୦୧୦ନଭେମ୍ବରରେ ନ୍ୟୁଜିଲାଣ୍ଡ ବିପକ୍ଷରେ ଡେବ୍ୟୁ କରିଥିଲେ ରିଦ୍ଧିମାନ। ୯ଟି ଦିନିକିଆ ଖେଳିଥିବା ରିଦ୍ଧମାନ ୨୦୧୪ରେ ଶେଷ ଓ୍ୱାନ ଡେ ଖେଳିଥିଲେ। କିନ୍ତୁ ଆଇପିଏଲ ପ୍ରଦର୍ଶନ ଜବରଦସ୍ତ। ୧୧୫ଟି ଆଇପିଏଲ୍ ମ୍ୟାଚରୁ ହାସଲ କରିଛନ୍ତି ୧୬୭୯ ରନ୍।ଷ୍ଟ୍ରାଇକ୍ ରେଟ୍ ୧୨୯.୮୫। ଡାହାଣହାତୀ ବ୍ୟାଟସମ୍ୟାନ୍ ରିଦ୍ଧିମାନ କୋଲକାତା ନାଇଟ ରାଇଡର୍ସ,ଚେନ୍ନାଇ ସୁପରକିଙ୍ଗସ୍ ଓ କିଙ୍ଗସ୍ ଇଲେଭେନ ପଞ୍ଜାବର ଜର୍ସିରେ ନଜର ଆସିଛନ୍ତି। ଚଳିତବର୍ଷ ସନ୍ ରାଇଜର୍ସ ହାଇଦ୍ରାବାଦରେ ଖେଳିବେ। ତାଙ୍କୁ ୧କୋଟି ୨୦ଲକ୍ଷ ଟଙ୍କାରେ କିଣିଛି ହାଇଦ୍ରାବାଦ । ଧୋନିଙ୍କ ବିକଳ୍ପ ଭାବରେ ଟିମ୍ ଇଣ୍ଡିଆରେ ରୁଷଭ ପନ୍ଥ ଏଣ୍ଟ୍ରି ନେଇ ସାରିଥିବାରୁ ରିଦ୍ଧିମାନଙ୍କ କମବ୍ୟାକ୍ ଆଶା କ୍ଷୀଣ।
ମୋହିତ ଶର୍ମା
ମୋହିତ ଶର୍ମା ଆଇପିଏଲରେ ସଫଳ ବୋଲର୍ ହୋଇଥିଲେ ବି ଟିମ୍ ଇଣ୍ଡିଆରେ ସ୍ଥାନ ସୁରକ୍ଷିତ କରି ପାରିଲେ ନାହିଁ। ଆଇପିଏଲରେ କିନ୍ତୁ ଝଟକୁଛନ୍ତି ମୋହିତ। ଯେଉଁ ଦଳ ପାଇଁ ଖେଳୁଛନ୍ତି ସେ ଟିମକୁ ଫାଇଦା ମିଳୁଛି। କୋଲକାତା ନାଇଟ ରାଇଡର୍ସ, ଚେନ୍ନାଇ ସୁପରକିଙ୍ଗସ୍ ଓ କିଙ୍ଗସ୍ ଇଲେଭେନ୍ ପଞ୍ଜାବ ପାଇଁ ଆଇପିଏଲ୍ ମ୍ୟାଚ୍ ଖେଳିଛନ୍ତି। ଚଳିତ ସିଜିନରେ ସେ ଚେନ୍ନାଇ ସ୍କ୍ୱାଡକୁ ଫେରିଛନ୍ତି। ତାଙ୍କୁ ୫କୋଟି ଟଙ୍କାରେ କିଣିଛି ଚେନ୍ନାଇ। ତେବେ ଭୁବନେଶ୍ବର କୁମାର, ଯଶପ୍ରୀତ ବୁମରାହ, ମହମ୍ମଦ ସାମି, ଉମେଶ ଯାଦବ, ଇଶାନ୍ତ ଶର୍ମାଙ୍କ ଭଳି ଫାଷ୍ଟ ବୋଲର ଥିବାରୁ ଟିମ୍ ଇଣ୍ଡିଆରେ ନିଜ ପାଇଁ ସୁରକ୍ଷିତ ସ୍ଥାନଟିଏ ରଖି ପାରିଲେ ନାହିଁ ମୋହିତ ଶର୍ମା। ଫେରିବାର ରାସ୍ତା ବି ଏକ ପ୍ରକାର ବନ୍ଦ। କିନ୍ତୁ ଆଇପିଏଲରେ କମାଲ କରୁଛନ୍ତି। ତେବେ ଏମାନେ ଚଳିତ ସିଜିନରେ କି କରିସ୍ମା ଦେଖାଉଛନ୍ତି କ୍ରିକେଟ ଫ୍ୟାନ ଅପେକ୍ଷା କରିଛନ୍ତି।
